ന്യൂഡല്‍ഹി: ചില്ലറ വില്‍പ്പന വിലയെ അടിസ്ഥാനമാക്കിയുള്ള പണപ്പെരുപ്പ നിരക്ക് നാലുമാസത്തെ ഏറ്റവും ഉയര്‍ന്ന നിലയില്‍. ഏപ്രിലില്‍ 3.48 ശതമാനമായാണ് പണപ്പെരുപ്പ നിരക്ക് ഉയര്‍ന്നത്. മാര്‍ച്ചില്‍ ഇത് 3.40 ശതമാനമായിരുന്നു.

മെയ് 12 ന് സ്റ്റാറ്റിസ്റ്റിക്‌സ് ആന്‍ഡ് പ്രോഗ്രാം ഇംപ്ലിമെന്റേഷന്‍ മന്ത്രാലയം പുറത്തിറക്കിയ ഔദ്യോഗിക കണക്കുകള്‍ പ്രകാരം, ഭക്ഷ്യവസ്തുക്കളുടെ വില ഉയരാന്‍ തുടങ്ങിയതോടെയാണ് പണപ്പെരുപ്പ നിരക്ക് ഉയരാന്‍ തുടങ്ങിയത്. നിലവില്‍ റിസര്‍വ് ബാങ്കിന്റെ ലക്ഷ്യമായ 4 ശതമാനത്തിലേക്ക് അടുക്കുകയാണ് പണപ്പെരുപ്പ നിരക്ക്.

ഭക്ഷ്യവസ്തുക്കളുടെ വിലക്കയറ്റമാണ് പ്രധാനമായും ഈ വര്‍ധനയ്ക്ക് കാരണം. കഴിഞ്ഞ മാസത്തെ 3.87 ശതമാനത്തില്‍ നിന്ന് ഏപ്രിലില്‍ ഇത് 4.2 ശതമാനമായാണ് ഉയര്‍ന്നത്. നാലു മാസത്തിനിടയിലെ ഏറ്റവും ഉയര്‍ന്ന നിരക്കും കൂടിയാണിത്. ഗ്രാമീണ ഭക്ഷ്യവസ്തുക്കളുടെ വിലക്കയറ്റം 4.26 ശതമാനവും നഗരപ്രദേശങ്ങളിലെ ഭക്ഷ്യവസ്തുക്കളുടെ വിലക്കയറ്റം 4.1 ശതമാനവുമാണ്.

ഭക്ഷണ വസ്തുക്കളിലെയും ഭക്ഷണ പാനീയങ്ങളിലെയും പണപ്പെരുപ്പനിരക്ക് 4.01 ശതമാനമായാണ് ഉയര്‍ന്നത്. തക്കാളി വില 35.3 ശതമാനവും തേങ്ങ വില 44.6 ശതമാനവുമാണ് വര്‍ധിച്ചത്.