മുംബൈ: തുടര്‍ച്ചയായി നാലു ദിവസം നേട്ടം രേഖപ്പെടുത്തിയ ഓഹരി വിപണി ഇന്ന് നഷ്ടത്തില്‍ ക്ലോസ് ചെയ്തു. ഫ്യൂച്ചേഴ്‌സ് ആന്റ് ഓപ്ഷന്‍സ് കോണ്‍ട്രാക്ടുകളുള്ള ഓഹരികള്‍ക്കായി പുതിയ ലേല സംവിധാനം ഏര്‍പ്പെടുത്തിയതാണ് വിപണിയില്‍ പ്രതിഫലിച്ചത്. സെന്‍സെക്‌സ് 210 പോയിന്റ് നഷ്ടത്തോടെ 78,500ല്‍ താഴെയാണ് ക്ലോസ് ചെയ്തത്. ഒരു ഘട്ടത്തില്‍ സെന്‍സെക്‌സ് 79,000 കടന്ന് മുന്നേറിയിരുന്നു. നിഫ്റ്റി 24,614 പോയിന്റിലാണ് വ്യാപാരം അവസാനിപ്പിച്ചത്.

ഇക്വിറ്റി ക്യാഷ് സെഗ്മെന്റിലെ പുതിയ സംവിധാനമായ ക്ലോസിങ് ഓക്ഷന്‍ സെക്ഷന്‍ തിങ്കളാഴ്ചയാണ് നിലവില്‍ വന്നത്. വില നിര്‍ണയ പ്രക്രിയ കൂടുതല്‍ സുതാര്യമാക്കാന്‍ ഓഹരികളുടെ ക്ലോസിങ് വിലകള്‍ നിര്‍ണയിക്കുന്നതിന് പുതിയ ലേലാധിഷ്ഠിത സംവിധാനമാണ് അവതരിപ്പിച്ചത്. ഹിന്ദുസ്ഥാന്‍ യൂണിലിവര്‍, എന്‍ടിപിസി, എച്ച്ഡിഎഫ്‌സി ബാങ്ക്, റിലയന്‍സ് ഇന്‍ഡസ്ട്രീസ്, ഇന്റര്‍ഗ്ലോബ് ഏവിയേഷന്‍, ടെക് മഹീന്ദ്ര ഓഹരികളാണ് പ്രധാനമായി നഷ്ടം നേരിട്ടത്. ട്രെന്റ്, ബജാജ് ഫിനാന്‍സ്, ഭാരത് ഇലക്ട്രോണിക്‌സ്, ടാറ്റ സ്റ്റീല്‍ ഓഹരികള്‍ നേട്ടം ഉണ്ടാക്കി.

അതേസമയം കഴിഞ്ഞ ദിവസം 85 ഡോളറില്‍ താഴെ വന്ന ബ്രെന്‍ഡ് ക്രൂഡ് വില ഇന്ന് രണ്ടരശതമാനം ഉയര്‍ന്നു. ബാരലിന് 85.86 ഡോളര്‍ ആണ് പുതിയ എണ്ണവില. അതിനിടെ ഡോളറിനെതിരെ രൂപയുടെ മൂല്യവും താഴ്ന്നു. മൂന്ന് പൈസയുടെ നഷ്ടത്തോടെ 95.40ലാണ് രൂപ ക്ലോസ് ചെയ്തത്. എണ്ണവില ഉയര്‍ന്നത് അടക്കമുള്ള ഘടകങ്ങളാണ് രൂപയ്ക്ക് വിനയായത്.