'പ്രശ്‌നം തോന്നിയാല്‍ അവർക്ക് പിന്മാറാമായിരുന്നു, അത് ചെയ്യാതെ ഇപ്പോൾ കുറ്റം പറയുന്നത് ശരിയല്ല'; നടിമാർക്കെതിരെ റെജീന കസാൻഡ്ര

തെലുങ്കിൽ തങ്ങൾ ചെയ്ത സിനിമകളെക്കുറിച്ച് ബോളിവുഡ് നടിമാരായ ജാൻവി കപൂറും രാധിക ആപ്തെയും പറഞ്ഞ പ്രസ്താവനകൾ വലിയ ചർച്ചയായി മാറിയിരുന്നു. 'പെദ്ദി' എന്ന ചിത്രത്തെക്കുറിച്ച് ജാന്‍വി പറഞ്ഞതും നന്ദമൂരി ബാലകൃഷ്ണയുമായി അഭിനയിച്ചതിനെക്കുറിച്ച് രാധിക ആപ്‌തെ പറഞ്ഞ വാക്കുകളുമാണ് ചര്‍ച്ചയായത്.

'പെദ്ദി'യുടെ സ്‌ക്രിപ്റ്റ് മുഴുവന്‍ തനിക്ക് വായിക്കാന്‍ തന്നില്ലായിരുന്നെന്നും കാമറ ആംഗിളുകളെക്കുറിച്ച് തനിക്ക് അറിയില്ലായിരുന്നെന്നുമായിരുന്നു ജാന്‍വി കപൂര്‍ പറഞ്ഞത്. തന്റെ ഇരട്ടി പ്രായമുള്ള നടനുമായി റൊമാന്‍സ് ചെയ്യേണ്ടി വന്ന അനുഭവത്തെക്കുറിച്ചാണ് രാധിക പങ്കുവച്ചത്. ഇതിന് പിന്നാലെ തെലുങ്ക് സിനിമക്ക് നേരെ വലിയ രീതിയില്‍ വിമര്‍ശനങ്ങള്‍ ഉയരുകയും ചെയ്തു.

ഇപ്പോഴിതാ ഈ വിഷയത്തില്‍ തന്റെ നിലപാട് വ്യക്തമാക്കുകയാണ് തമിഴ് താരം റെജീന കസാന്‍ഡ്ര. താന്‍ ഒരു സ്ത്രീയാണെന്നും ജാന്‍വിക്കും രാധികക്കുമൊപ്പമാണ് താനെന്നും റെജീന പറഞ്ഞു. എന്നാല്‍ അവര്‍ പറഞ്ഞ രീതിയില്‍ ചില പ്രശ്‌നങ്ങളുണ്ടെന്നും അത് എടുത്തുപറയേണ്ടത് അത്യാവശ്യമാണെന്നും താരം കൂട്ടിച്ചേര്‍ത്തു. 'മൂക്കുത്തി അമ്മൻ 2' വിന്റെ പ്രൊമോഷന്റെ ഭാ​ഗമായി ഇന്ത്യ ടുഡേയുടെ യൂട്യൂബിന് നൽകിയ അഭിമുഖത്തിൽ സംസാരിക്കുകയായിരുന്നു റെജീന.

"ഞാന്‍ എപ്പോഴും സ്ത്രീകള്‍ക്കൊപ്പമാണ്. പക്ഷേ, അവര്‍ പറഞ്ഞതിലെ ചില പ്രശ്‌നങ്ങള്‍ ചൂണ്ടിക്കാണിക്കണമെന്ന് എനിക്ക് തോന്നി. ജാന്‍വിയുടെയും രാധികയുടെയും ഇന്റര്‍വ്യു മുഴുവന്‍ ഞാന്‍ കണ്ടിട്ടില്ല. സോഷ്യല്‍ മീഡിയയില്‍ വൈറലായ ക്ലിപ്പുകള്‍ മാത്രമേ കണ്ടിട്ടുള്ളൂ. അറിഞ്ഞിടത്തോളം പെദ്ദി എന്ന സിനിമയെക്കുറിച്ചാണ് ജാന്‍വി സംസാരിച്ചത്.

രാധിക ഒരു തെലുങ്ക് സിനിമയെക്കുറിച്ചും സംസാരിച്ചു. അവര്‍ക്ക് സ്‌ക്രിപ്റ്റ് വായിക്കുമ്പോള്‍ ഇത്തരം കാര്യങ്ങളില്‍ പ്രശ്‌നം തോന്നിയാല്‍ പിന്മാറാമായിരുന്നു. തങ്ങള്‍ക്ക് ചെയ്യാന്‍ പറ്റാത്ത കാര്യമാണ് ഇതെന്ന് പറഞ്ഞ് മാറാമായിരുന്നു. അത് ചെയ്യാതെ, പിന്നീട് അതിനെക്കുറിച്ച് കുറ്റം പറയുന്നത് ശരിയായ നടപടിയായി തോന്നിയിട്ടില്ല.

സൗത്ത് ഇന്ത്യയില്‍ ബൗണ്ട് സ്‌ക്രിപ്റ്റ് ഇല്ലെന്ന് ജാന്‍വി പറഞ്ഞു. ബോളിവുഡില്‍ എന്താണ് ഷൂട്ട് ചെയ്യുന്നതെന്ന് ആ ദിവസം മാത്രമേ നമ്മളോട് പറയുള്ളൂ. കഥ മുഴുവന്‍ നമ്മളോട് പറയണമെന്ന നിര്‍ബന്ധം അവര്‍ക്കില്ല".- റെജീന കസാന്‍ഡ്ര പറഞ്ഞു.

നോര്‍ത്ത് ഇന്ത്യയിലെ ആര്‍ട്ടിസ്റ്റുകള്‍ ഇത്തരത്തില്‍ സൗത്ത് ഇന്ത്യന്‍ സിനിമകളെക്കുറിച്ച് പറയുന്നത് വലിയ പ്രശ്‌നങ്ങള്‍ക്ക് വഴിവെക്കുമെന്നും താരം പറഞ്ഞു. ഇപ്പോള്‍ തന്നെ സോഷ്യല്‍ മീഡിയയില്‍ നോര്‍ത്ത്- സൗത്ത് എന്ന് വേര്‍തിരിവുണ്ടെന്നും ഇത്തരം പ്രസ്താവനകള്‍ ഇതിനെ കൂടുതല്‍ സങ്കീര്‍ണമാക്കുമെന്നും റെജീന കൂട്ടിച്ചേര്‍ത്തു.