മുംബൈ: വ്യാപാരത്തിനിടെ വീണ്ടും 91 എന്ന നിലവാരം കടന്ന് രൂപ. ഡോളറിനെതിരെ 91.1 എന്ന നിലയിലേക്കാണ് രൂപ കൂപ്പുകുത്തിയത്. ഈ മാസത്തില്‍ ഇത് രണ്ടാം തവണയാണ് രൂപ 91 കടക്കുന്നത്. ഒടുവില്‍ 14 പൈസയുടെ നഷ്ടത്തോടെ 90.92 എന്ന നിലയിലാണ് ഇന്ന് രൂപയുടെ വ്യാപാരം അവസാനിച്ചത്.

ആഗോള വിപണിയില്‍ നിലനില്‍ക്കുന്ന അനിശ്ചിതത്വമാണ് രൂപയെ ബാധിച്ചത്. എണ്ണവില കുറയുകയും ഡോളര്‍ ദുര്‍ബലമാകുകയും ചെയ്തിട്ടും ഓഹരി വിപണിയില്‍ നിലനില്‍ക്കുന്ന വില്‍പ്പന സമ്മര്‍ദ്ദമാണ് രൂപയെ സ്വാധീനിച്ച മറ്റൊരു ഘടകം. ഗ്രീന്‍ലാന്‍ഡിനെ നിയന്ത്രിക്കാനുള്ള അമേരിക്കന്‍ നീക്കത്തെ പ്രതിരോധിക്കാന്‍ ശ്രമിച്ചാല്‍ യൂറോപ്യന്‍ രാജ്യങ്ങളില്‍ നിന്ന് ഇറക്കുമതി ചെയ്യുന്ന ഉല്‍പ്പന്നങ്ങള്‍ക്ക് മേല്‍ അധിക തീരുവ ഏര്‍പ്പെടുത്തുമെന്ന പ്രസിഡന്റ് ഡോണള്‍ഡ് ട്രംപിന്റെ പ്രഖ്യാപനത്തെ നിക്ഷേപകര്‍ ആശങ്കയോടെയാണ് കാണുന്നത്. ഇതാണ് വിപണിയില്‍ പ്രതിഫലിക്കുന്നതെന്ന് വിദഗ്ധര്‍ അഭിപ്രായപ്പെട്ടു. വെള്ളിയാഴ്ച രൂപ 44 പൈസയുടെ നഷ്ടമാണ് നേരിട്ടത്.

അതിനിടെ ഓഹരി വിപണിയും നഷ്ടത്തിലാണ് ക്ലോസ് ചെയ്തത്. സെന്‍സെക്‌സ് 324 പോയിന്റ് നഷ്ടത്തോടെ 83,246 പോയിന്റിലാണ് വ്യാപാരം അവസാനിച്ചത്. നിഫ്റ്റി 25,585ല്‍ ക്ലോസ് ചെയ്തു. വിപ്രോ, ടാറ്റ മോട്ടോഴ്‌സ് പാസഞ്ചര്‍ വെഹിക്കിള്‍, ഐസിഐസിഐ ബാങ്ക്, മാക്‌സ് ഹെല്‍ത്ത് കെയര്‍ ഓഹരികളാണ് പ്രധാനമായി നഷ്ടം നേരിട്ടത്.