ന്യൂഡല്‍ഹി: ഉപഭോക്താക്കള്‍ക്കും ചെറുകിട വ്യാപാരികള്‍ക്കും യുപിഐ തുടര്‍ന്നും സൗജന്യമായി ഉപയോഗിക്കാമെന്ന് കേന്ദ്രസര്‍ക്കാര്‍. ഒരു നിശ്ചിത പരിധിക്ക് മുകളിലുള്ള പരിമിതമായ വിഭാഗം വ്യാപാരികളുടെ ഇടപാടുകള്‍ക്ക് മാത്രമേ ഭാവിയില്‍ ഏതെങ്കിലും തരത്തിലുള്ള ചാര്‍ജ് ബാധകമാകുകയുള്ളൂ. ഏതെങ്കിലും തരത്തിലുള്ള മര്‍ച്ചന്റ് ഡിസ്‌കൗണ്ട് റേറ്റ് (എംഡിആര്‍) കൊണ്ടുവന്നാല്‍ മാത്രമേ ഇതിന് സാധ്യതയുള്ളൂ. എങ്കിലും ചാര്‍ജ് നാമമാത്രമായിരിക്കുമെന്നും ധനമന്ത്രാലയം വ്യക്തമാക്കി.

2007ലെ പേയ്‌മെന്റ് ആന്റ് സെറ്റില്‍മെന്റ് സിസ്റ്റംസ് ആക്ട് ഭേദഗതി ചെയ്യാനുള്ള പാര്‍ലമെന്റിന്റെ നീക്കത്തെ തുടര്‍ന്ന് ഉയര്‍ന്നുവന്ന ആശങ്കകള്‍ ദൂരീകരിക്കുന്നതിന് വേണ്ടിയാണ് കേന്ദ്രത്തിന്റെ വിശദീകരണം. ഡെബിറ്റ് ആന്റ് ക്രെഡിറ്റ് കാര്‍ഡ് എംഡിആര്‍ നിരക്കുകളേക്കാള്‍ വളരെ കുറഞ്ഞ നാമമാത്ര നിരക്ക് മാത്രമേ, നിശ്ചിത പരിധിക്ക് മുകളിലുള്ള പരിമിതമായ വ്യാപാരി ഇടപാടുകള്‍ക്കും ഈടാക്കൂ. യുപിഐയുടെ ദീര്‍ഘകാല സുസ്ഥിരതയും സാങ്കേതിക പുരോഗതിയും ഉറപ്പാക്കാന്‍ ലക്ഷ്യമിട്ടാണ് പുതിയ ഭേദഗതി. സാധാരണ ഉപഭോക്താക്കളുടെമേല്‍ തടസ്സമില്ലാതെ നിരക്കുകള്‍ അടിച്ചേല്‍പ്പിക്കാനുള്ള പെട്ടെന്നുള്ള തീരുമാനമല്ലെന്നും കേന്ദ്രസര്‍ക്കാര്‍ വ്യക്തമാക്കി.

യുപിഐയുടെ അതിവേഗമുള്ള വളര്‍ച്ചയുടെ പശ്ചാത്തലത്തില്‍ സൈബര്‍ സുരക്ഷ, തട്ടിപ്പുകള്‍ തടയല്‍, ഡിജിറ്റല്‍ അടിസ്ഥാന സൗകര്യങ്ങള്‍ എന്നിവയില്‍ നിരന്തരമായ നിക്ഷേപം ആവശ്യമാണ്. അടുത്ത ഘട്ട വളര്‍ച്ചയ്ക്ക് സബ്‌സിഡികളെ മാത്രം ആശ്രയിക്കുന്നത് പ്രായോഗികമല്ല. യുപിഐയെ ശക്തവും ഭാവിക്ക് അനുയോജ്യവുമാക്കി മാറ്റാന്‍ സന്തുലിതമായ ചട്ടക്കൂട് ആവശ്യമാണെന്നും ധനമന്ത്രാലയം വ്യക്തമാക്കി. ഈ നയപരമായ മാറ്റത്തിന് പിന്നില്‍ ബാഹ്യസമ്മര്‍ദ്ദം ഉണ്ടെന്ന ഊഹാപോഹങ്ങള്‍ തള്ളിക്കളഞ്ഞ സര്‍ക്കാര്‍ ആരോപണങ്ങള്‍ അടിസ്ഥാനരഹിതവും തികച്ചും വ്യാജവുമാണെന്നും ചൂണ്ടിക്കാട്ടി.