ന്യൂഡല്‍ഹി: ഉപഭോക്താവിന് മെച്ചപ്പെട്ട സേവനം നല്‍കുന്നതിന് കഴിഞ്ഞ വര്‍ഷം നിരവധി ഫീച്ചറുകളാണ് ഇന്‍സ്റ്റന്റ് മെസേജിങ് ആപ്പായ വാട്സ്ആപ്പ് അവതരിപ്പിച്ചത്. ഈ വര്‍ഷവും ഉപഭോക്താവിന് സുഗമമായി ചാറ്റ് ചെയ്യുന്നതിന് നിരവധി ഫീച്ചറുകള്‍ അവതരിപ്പിക്കാനുള്ള ശ്രമത്തിലാണ് വാട്സ്ആപ്പ്.
പിക്ചര്‍- ഇന്‍- പിക്ചര്‍ ഫോര്‍ വീഡിയോ കോള്‍സ്
നിലവില്‍ ആന്‍ഡ്രോയിഡ് ഫോണുകളില്‍ ഈ ഫീച്ചര്‍ ലഭ്യമാണ്. വാട്സ്ആപ്പ് വീഡിയോ കോളിനിടെ തന്നെ മറ്റു ആപ്പുകള്‍ ബ്രൗസ് ചെയ്യാന്‍ അനുവദിക്കുന്നതാണ് ഈ ഫീച്ചര്‍. വീഡിയോ കോള്‍ വിന്‍ഡോ ചെറുതാക്കി മൊബൈല്‍ സ്‌ക്രീനിന്റെ സൗകര്യപ്രദമായ ഏതെങ്കിലും ഭാഗത്തേയ്ക്ക് വലിച്ചുമാറ്റാന്‍ സാധിക്കുന്നതാണ് സംവിധാനം. ഐഒഎസ് ഉപയോക്താക്കള്‍ക്കും ഈ ഫീച്ചര്‍ പ്രയോജനപ്പെടുത്താന്‍ കഴിയുംവിധം പരിഷ്‌കാരം കൊണ്ടുവരുമെന്നാണ് വാട്സ്ആപ്പ് അറിയിക്കുന്നത്. നിലവില്‍ ഐഒഎസില്‍ ബീറ്റാ വേര്‍ഷനില്‍ ഇത് അവതരിപ്പിച്ചിട്ടുണ്ട്.
വ്യൂ വണ്‍സ് ടെക്സ്റ്റ്
വ്യൂ വണ്‍സ് മീഡിയ ഫീച്ചറിന് സമാനമായാണ് ഇത് അവതരിപ്പിക്കാന്‍ പോകുന്നത്. അയക്കുന്ന ടെക്സ്റ്റ് മെസേജ് കാണുന്ന മാത്രയില്‍ തന്നെ സ്വമേധയാ ഡിലീറ്റ് ആയി പോകുന്നതാണ് ഫീച്ചര്‍. ഉപഭോക്താവിന്റെ സ്വകാര്യത സംരക്ഷിക്കുന്നതിന് വേണ്ടിയാണ് ഈ ഫീച്ചര്‍.
കംപാനിയന്‍ മോഡ്
ഒരു വാട്സ്ആപ്പ് അക്കൗണ്ട് തന്നെ ഒന്നിലധികം ഇലക്ട്രോണിക് ഉപകരണങ്ങളില്‍ ഉപയോഗിക്കാന്‍ കഴിയുന്നതാണ് ഈ ഫീച്ചര്‍. ഒരേ പ്രൊഫൈല്‍ ഉപയോഗിച്ച് തന്നെ ഐഫോണിലും ആന്‍ഡ്രോയിഡ് ഫോണുകളിലും ഒരേ സമയം ഉപയോഗിക്കാന്‍ കഴിയുന്നതാണ് സംവിധാനം. നിലവില്‍ പരീക്ഷണാടിസ്ഥാനത്തില്‍ ഈ ഫീച്ചര്‍ അവതരിപ്പിച്ചിട്ടുണ്ട്. ഉടന്‍ തന്നെ ഈ ഫീച്ചര്‍ എല്ലാവര്‍ക്കും പ്രയോജനപ്പെടുത്താന്‍ കഴിയുമെന്നാണ് റിപ്പോര്‍ട്ട്. വാട്സ്ആപ്പ് ഡേറ്റ ലിങ്ക് ചെയ്യാനും സിങ്ക് ചെയ്യാന്‍ കഴിയും എന്നതാണ് പ്രത്യേകത.
തീയതി ഉപയോഗിച്ച് തെരച്ചില്‍
നിലവില്‍ വാട്‌സ്ആപ്പില്‍ പഴയ മെസേജുകള്‍ തെരഞ്ഞ് കണ്ടുപിടിക്കുന്നത് ബുദ്ധിമുട്ടേറിയ കാര്യമാണ്.തീയതി ഉപയോഗിച്ച് മെസേജുകള്‍ തെരഞ്ഞ് കണ്ടുപിടിക്കുന്നതിനുള്ള ഫീച്ചര്‍ അവതരിപ്പിക്കാന്‍ ഒരുങ്ങുകയാണ് വാട്സ്ആപ്പ്.
വോയ്‌സ് നോട്ട്
നിലവില്‍ ഫോട്ടോയും വീഡിയോകളും ലിങ്കുകളുമാണ് പ്രധാനമായി സ്റ്റാറ്റസ് ആയി ഇടുന്നത്. വോയ്‌സ് നോട്ടുകളും സ്റ്റാറ്റസ് ആയി ഇടാന്‍ കഴിയുന്ന ഫീച്ചര്‍ അവതരിപ്പിക്കാനുള്ള ശ്രമത്തിലാണ് വാട്സ്ആപ്പ്
സ്‌ക്രീന്‍ലോക്ക്
നിലവില്‍ ആന്‍ഡ്രോയിഡ് ഫോണുകളില്‍ വാട്‌സ്ആപ്പിന് സ്‌ക്രീന്‍ലോക്ക് സംവിധാനമുണ്ട്. സ്വകാര്യത സംരക്ഷിക്കുന്നതിന് വേണ്ടി നിരവധി ഉപയോക്താക്കള്‍ ഈ ഫീച്ചര്‍ പ്രയോജനപ്പെടുത്തുന്നുണ്ട്. ഡെസ്ക് ടോപ്പ് ആപ്പ് ഉപയോഗിക്കുന്നവര്‍ക്കും ഈ ഫീച്ചര്‍ പ്രയോജനപ്പെടുത്താന്‍ കഴിയുംവിധം മാറ്റത്തിന് ഒരുങ്ങുകയാണ് വാട്സ്ആപ്പ്
കോള്‍ ടാബ്
ഡെസ്ക് ടോപ്പ് ആപ്പിലും കോള്‍ ടാബ് ഫീച്ചര്‍ അവതരിപ്പിക്കാനുള്ള ശ്രമത്തിലാണ് വാട്സ്ആപ്പ്. ഉപയോക്താക്കള്‍ക്ക് അവരുടെ വാട്സ്ആപ്പ് കോളിന്റെ ഡാറ്റ മൊബൈലും വെബ് ആപ്പും ഉപയോഗിച്ച് ട്രാക്ക് ചെയ്യാനും സിങ്ക് ചെയ്യാനും കഴിയും.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates