ലണ്ടൻ: യുവാക്കളുടെ ഇഷ്ട സൈറ്റായ ഡബ്മാഷടക്കമുള്ള 16 സൈറ്റുകളിലെ 60 കോടിയോളം അക്കൗണ്ടുകളിലെ വിവരങ്ങൾ ഹാക്കർമാർ ചോർത്തിയതായി റിപ്പോർട്ട്. ഡബ്മാഷിന് പുറമെ മൈ ഫിറ്റ്നസ് പാൽ, മൈ ഹെറിറ്റേജ്, ഷെയർ ദിസ്, ഹൗട്ട്ലുക്ക്, അനിമോട്ടോ, ഐഎം, എയ്റ്റ്ഫിറ്റ്, വൈറ്റ്പേജസ്, ഫോട്ടോലോ​ഗ്, 500 പിഎക്സ്, അർമർ ​ഗെയിംസ്, ബുക്ക്മേറ്റ്, കോഫി മീറ്റ്സ് ബാ​ഗെൽ, ആർട്സി, ഡേറ്റാ ക്യാമ്പ് തുടങ്ങിയ വെബ്സൈറ്റുകളിൽ നിന്നുള്ള വിവരങ്ങളും ചോർന്നതായി ബ്രിട്ടീഷ് മാധ്യമം ദി രജിസ്റ്റർ റിപ്പോർട്ട് ചെയ്തു. 

അക്കൗണ്ട് ഉടമയുടെ പേര്, ഇ മെയിൽ, പാസ്‌വേഡുകള്‍ എന്നിവയാണ് ചോർന്നത്. ചോർത്തിയ വിവരങ്ങൾ ഹാക്കർമാർ ‍‍ഡ്രീം മാർക്കറ്റ് സൈബർ സൂക്ക് എന്ന പേരിലുള്ള സൈറ്റിൽ 20,000 ഡോളറിന് വിൽപ്പനയ്ക്ക് വച്ചതായും റിപ്പോർട്ടിൽ വ്യക്തമാക്കുന്നു. ബിറ്റ്കോയിനിൽ പണം നൽകാനാണ് ഹാക്കർമാർ ആവശ്യപ്പെട്ടിട്ടുള്ളത്.