ഇന്ത്യൻ സിവിൽ സർവീസിൽ നിരവധി തസ്തികകൾ ഒഴിഞ്ഞു കിടക്കുന്നതായി കേന്ദ്ര സർക്കാർ കണക്കുകൾ. 2025 ജനുവരി 1 ലെ കണക്കനുസരിച്ച്, ഐ എഎസ്, ഐ പി എസ്, ഇന്ത്യൻ ഫോറസ്റ്റ് സർവീസ് എന്നീ മൂന്ന് അഖിലേന്ത്യാ സർവീസുകളിലുമായി 2,800-ലധികം തസ്തികകൾ ഒഴിഞ്ഞു കിടക്കുന്നുവെന്നാണ് കണക്ക്.

കണക്കുകൾ പ്രകാരം ഏറ്റവും കൂടുതൽ തസ്തികകൾ ഒഴിഞ്ഞു കിടക്കുന്നത് ഐ എ എസ് തസ്തികയിലാണ്. കുറവ് ഐ പി എസ് തസ്തികയിലും.

ഇന്ത്യൻ ഉദ്യോഗസ്ഥമേഖലയിലെ ഏറ്റവും ഉയർന്ന തസ്തികയിൽ പെട്ട കേഡറുകളിലുള്ള മൂന്ന് ജോലികളിലാണ് ഇത്രയധികം തസ്തികകൾ ഒഴിഞ്ഞുകിടക്കുന്നത്.

കേഡർ തിരിച്ചുള്ള ഒഴിവുകൾ ഇങ്ങനെയാണ്: ഇന്ത്യൻ അഡ്മിനിസ്ട്രേറ്റീവ് സർവീസിൽ (ഐഎഎസ്) 1,300 ഉം, ഇന്ത്യൻ പൊലീസ് സർവീസിൽ (ഐപിഎസ്) 505 ഉം, ഇന്ത്യൻ ഫോറസ്റ്റ് സർവീസിൽ (ഐഎഫ്എസ്) 1,029 ഉം ആണ്.കേന്ദ്ര സഹമന്ത്രി ഡോ. ജിതേന്ദ്ര സിങ് രാജ്യസഭയിൽ രേഖാമൂലം നൽകിയ മറുപടിയിലാണ് ഈ വിവരങ്ങൾ പങ്കുവെച്ചത്.

അഖിലേന്ത്യാ സർവീസുകളിലേക്കുള്ള അംഗീകൃത ജീവനക്കാരുടെ എണ്ണം, തസ്തികകളിലെ ഉദ്യോഗസ്ഥർ, കാറ്റഗറി തിരിച്ചുള്ള നേരിട്ടുള്ള നിയമനം എന്നിവയെക്കുറിച്ചുള്ള പുതിയ കണക്കുകളാണ് കേന്ദ്ര സർക്കാർ വ്യാഴാഴ്ച അറിയിച്ചത്. 2025 ജനുവരി 1-ലെ സിവിൽ ലിസ്റ്റ് പ്രകാരമുള്ള കണക്കുകളാണിത്.

അനുവദിക്കപ്പെട്ടിട്ടുള്ള ഉദ്യോഗസ്ഥരുടെ എണ്ണവും തസ്തികയിലുള്ള ഉദ്യോഗസ്ഥരുടെ എണ്ണവും സംബന്ധിച്ച് സർക്കാർ നൽകിയ കണക്കുകൾ ഇങ്ങനെയാണ്: ഐഎഎസിൽ 6,877 ഉം ഐപിഎസിൽ 5,099 ഉം ഐഎഫ്എസിൽ 3,193 ഉം കേഡറുകളിൽ ഇന്ത്യയൊട്ടാകെ ഉള്ള അംഗീകൃത എണ്ണം. ഇതിൽ 2025 ജനുവരി 1 ലെ കണക്കനുസരിച്ച് 5,577 ഐഎഎസ് ഉദ്യോഗസ്ഥരും 4,594 ഐപിഎസ് ഉദ്യോഗസ്ഥരും 2,164 ഐഎഫ്എസ് ഉദ്യോഗസ്ഥരുമാണ് നിലവിൽ സർവീസിലുള്ളത്.

ഇതേ സമയം ഈ വർഷത്തെ അഖിലേന്ത്യാ സിവിൽ സർവീസിൽ ഈ തസ്തികകളിലേക്ക് അപേക്ഷ ക്ഷണിച്ച് യു പി എസ് സി വിജ്ഞാപനം പുറപ്പെടുവിച്ചിട്ടുണ്ട്. ഇന്ത്യൻ ഫോറസ്റ്റ് സർവീസിൽ 80 ഒഴിവുകളും ഐഎഎസ്. ഐപിഎസ്, ഇന്ത്യൻ ഫോറിൻ സർവീസ്, മറ്റ് കേന്ദ്ര സർവീസുകൾ എന്നിവയിലേക്കുമായി 993 ഒഴിവുകളിലേക്കുമാണ് അപേക്ഷ ക്ഷണിച്ചിട്ടുള്ളത്.