കേരളത്തിലെ മുഴുവൻ ഗവണ്മെന്റ്‌,എയ്ഡഡ്,ഐഎച്ച്ആർഡി കേപ്,സ്വാശ്രയ പോളിടെക്‌നിക് കോളേജുകളിലേക്ക് റഗുലർ ഡിപ്ലോമ പ്രവേശനത്തിന് അപേക്ഷ ക്ഷണിച്ചു. എസ്എസ്എൽസി/ടിഎച്ച്എസ്എൽസി/സിബിഎസ്ഇ-എക്സ് മറ്റ് തുല്യ പരീക്ഷകളിൽ ഉപരി പഠനത്തിന് അർഹത നേടിയ കണക്ക്, സയൻസ്, ഇംഗ്ലീഷ് മുതലായ വിഷയങ്ങൾ ഓരോ വിഷയങ്ങളായി പഠിച്ചവർക്ക് എൻജിനീയറിങ് സ്ട്രീമിലേയ്ക്കും (സ്ട്രീം.1) കണക്ക്, ഇംഗ്ലീഷ് എന്നിവ പഠിച്ചവർക്ക് മാനേജ്‌മെന്റ്‌ സ്ട്രീമിലേയ്ക്കും (സ്ട്രീം.2) അപേക്ഷിക്കാം.

പ്രവേശനം പ്രധാനമായും രണ്ട് സ്ട്രീമുകളിലായാണ് നടക്കുന്നത്. കണക്ക്, സയൻസ്, ഇംഗ്ലീഷ് എന്നീ വിഷയങ്ങൾ ഓരോന്നായി പഠിച്ച വിദ്യാർത്ഥികൾക്ക് എൻജിനീയറിങ് സ്ട്രീമിലേക്കും (സ്ട്രീം-1), കണക്ക്, ഇംഗ്ലീഷ് വിഷയങ്ങൾ പഠിച്ചവർക്ക് മാനേജ്‌മെന്റ് സ്ട്രീമിലേക്കും (സ്ട്രീം-2) അപേക്ഷിക്കാം.

എന്നാൽ സി.ബി.എസ്.ഇ പാഠ്യപദ്ധതിയിൽ മാത്തമാറ്റിക്സ് ബേസിക് തെരഞ്ഞെടുത്ത് പഠിച്ച വിദ്യാർത്ഥികൾക്ക് എൻജിനീയറിങ് ഡിപ്ലോമ പ്രവേശനത്തിന് അപേക്ഷിക്കാനാവില്ല. വി.എച്ച്.എസ്.ഇ പാസായ വിദ്യാർത്ഥികൾക്ക് അവർ പഠിച്ച ട്രേഡുകൾക്ക് അനുയോജ്യമായ ബ്രാഞ്ചുകളിലേക്കാണ് അപേക്ഷിക്കാൻ സാധിക്കുക.

കേരളത്തിലെ ഗവൺമെന്റ്, ഐഎച്ച്ആർഡി, കേപ് പോളിടെക്‌നിക് കോളേജുകളിലെ മുഴുവൻ സീറ്റുകളിലേക്കും എയ്ഡഡ് പോളിടെക്‌നിക്കുകളിലെ 85 ശതമാനം സീറ്റുകളിലേക്കും സ്വാശ്രയ പോളിടെക്‌നിക്കുകളിലെ 50 ശതമാനം ഗവൺമെന്റ് സീറ്റുകളിലേക്കുമാണ് കേന്ദ്രവത്കൃത ഓൺലൈൻ പ്രവേശന നടപടിയിലൂടെ അഡ്മിഷൻ നടക്കുക.

ഇതിലൂടെ സംസ്ഥാനത്തെ വിവിധ ജില്ലകളിലെ കോളേജുകളിലേക്ക് പ്രവേശനത്തിനായി വിദ്യാർത്ഥികൾക്ക് ഒരൊറ്റ അപേക്ഷയിലൂടെ അവസരം ലഭിക്കും.

സംവരണ വിഭാഗങ്ങൾക്കായി പ്രത്യേക സീറ്റുകളും അനുവദിച്ചിട്ടുണ്ട്. ടി.എച്ച്.എസ്.എൽ.സി പാസായ വിദ്യാർത്ഥികൾക്ക് 10 ശതമാനവും വി.എച്ച്.എസ്.ഇ വിദ്യാർത്ഥികൾക്ക് 2 ശതമാനവും സംവരണം ലഭിക്കും. കൂടാതെ ഭിന്നശേഷിക്കാർക്കായി 5 ശതമാനം സീറ്റുകൾ മാറ്റിവെച്ചിട്ടുണ്ട്.

എസ്.സി, എസ്.ടി, ഒ.ഇ.സി, എസ്.ഇ.ബി.സി വിഭാഗങ്ങളിലെ വിദ്യാർത്ഥികൾക്ക് സർക്കാർ മാനദണ്ഡങ്ങൾ പ്രകാരമുള്ള സംവരണ ആനുകൂല്യങ്ങളും ലഭിക്കും. സാമ്പത്തികമായി പിന്നാക്കം നിൽക്കുന്ന മുന്നാക്ക വിഭാഗക്കാർക്ക് (EWS) 10 ശതമാനം സംവരണവും അനുവദിച്ചിട്ടുണ്ട്.

അഡ്മിഷനിലേക്കുള്ള തെരഞ്ഞെടുപ്പ് വിദ്യാർത്ഥികളുടെ എസ്.എസ്.എൽ.സി മാർക്കിന്റെ അടിസ്ഥാനത്തിലാണ്. എൻജിനീയറിങ് സ്ട്രീമിലേക്കുള്ള ഇൻഡക്സ് സ്കോർ തയ്യാറാക്കുമ്പോൾ കണക്ക്, സയൻസ് വിഷയങ്ങളിലെ മാർക്കുകൾക്ക് കൂടുതൽ പ്രാധാന്യം നൽകും. മാനേജ്‌മെന്റ് സ്ട്രീമിൽ കണക്ക്, ഇംഗ്ലീഷ് വിഷയങ്ങൾക്കാണ് മുൻഗണന. ഇതിന്റെ അടിസ്ഥാനത്തിലാണ് റാങ്ക് ലിസ്റ്റ് തയ്യാറാക്കി പ്രവേശനം നൽകുന്നത്.

അപേക്ഷാ ഫീസ് പൊതുവിഭാഗക്കാർക്ക് 200 രൂപയും പട്ടികജാതി, പട്ടികവർഗ വിഭാഗക്കാർക്ക് 100 രൂപയുമാണ്. അപേക്ഷ സമർപ്പിക്കുന്നതിന് മുമ്പ് polyadmission.org എന്ന വെബ്സൈറ്റിലൂടെ One-Time Registration (OTR) നിർബന്ധമായും പൂർത്തിയാക്കണം.

ഒരിക്കൽ രജിസ്റ്റർ ചെയ്താൽ പിന്നീട് വിവിധ കോളേജുകളിലേക്കും കോഴ്സുകളിലേക്കും അതേ രജിസ്ട്രേഷൻ ഉപയോഗിച്ച് അപേക്ഷിക്കാം. ഒരു വിദ്യാർത്ഥിക്ക് പരമാവധി 30 ഓപ്ഷനുകൾ വരെ നൽകാൻ അവസരമുണ്ട്. അതിനാൽ താൽപര്യമുള്ള ബ്രാഞ്ചുകളും കോളേജുകളും മുൻഗണനാക്രമത്തിൽ തെരഞ്ഞെടുക്കേണ്ടതാണ്.

എൻ.സി.സി, സ്പോർട്സ് ക്വാട്ടകളിൽ പ്രവേശനം ആഗ്രഹിക്കുന്ന വിദ്യാർത്ഥികൾ ഓൺലൈൻ അപേക്ഷ സമർപ്പിച്ചതിന് ശേഷം അപേക്ഷയുടെ പകർപ്പ് ബന്ധപ്പെട്ട അധികാരികൾക്ക് അയച്ചുനൽകണം. സ്വകാര്യ സ്വാശ്രയ പോളിടെക്‌നിക് കോളേജുകളിലെയും സർക്കാർ എയ്ഡഡ് കോളേജുകളിലെയും മാനേജ്‌മെന്റ് സീറ്റുകളിലേക്ക് പ്രവേശനം ആഗ്രഹിക്കുന്നവർ അതത് കോളേജുകളിലേക്ക് പ്രത്യേകം ഓൺലൈൻ അപേക്ഷ നൽകേണ്ടതുമാണ്.

പത്താം ക്ലാസിന് ശേഷം വേഗത്തിൽ തൊഴിൽ സാധ്യതകൾ നേടാനും പിന്നീട് ബി.ടെക് ഉൾപ്പെടെയുള്ള ഉയർന്ന സാങ്കേതിക പഠനങ്ങളിലേക്ക് കടക്കാനും ആഗ്രഹിക്കുന്ന വിദ്യാർത്ഥികൾക്ക് പോളിടെക്‌നിക് ഡിപ്ലോമ കോഴ്സുകൾ മികച്ച തെരഞ്ഞെടുപ്പാണ്. അതിനാൽ യോഗ്യതയുള്ള വിദ്യാർത്ഥികൾ അവസാന തീയതിക്ക് മുമ്പായി അപേക്ഷ സമർപ്പിച്ച് ഈ അവസരം പ്രയോജനപ്പെടുത്തണമെന്ന് അധികൃതർ അറിയിച്ചു.