കേരള സംസ്ഥാന പട്ടികജാതി പട്ടികവർഗ്ഗ വികസന കോർപ്പറേഷൻ മിൽമയുമായി ചേർന്ന് പട്ടികജാതി–പട്ടികവർഗ്ഗ വിഭാഗത്തിൽപ്പെട്ട തൊഴിൽരഹിതർക്കായി സ്വയംതൊഴിൽ പദ്ധതി നടപ്പിലാക്കുന്നു. ഈ പദ്ധതിയുടെ ഭാഗമായി യോഗ്യരായവരിൽ നിന്ന് അപേക്ഷകൾ ക്ഷണിച്ചിട്ടുണ്ട്. അപേക്ഷകർ പട്ടികജാതി/പട്ടികവർഗ്ഗ വിഭാഗത്തിൽപ്പെട്ടവരും സംരംഭകത്വഗുണമുള്ളവരും 18 മുതൽ 60 വയസ് വരെ പ്രായമുള്ളവരുമായിരിക്കണം.

പാലിനും അനുബന്ധ ഉൽപ്പന്നങ്ങൾക്കും വിപണന സാധ്യതയുള്ള അനുയോജ്യമായ സ്ഥലങ്ങളിൽ ‘മിൽമ ഷോപ്പി’ അല്ലെങ്കിൽ ‘മിൽമ പാർലർ’ ആരംഭിക്കുന്നതിനാണ് അവസരം നൽകുന്നത്. തെരഞ്ഞെടുക്കപ്പെടുന്നവർക്ക് കോർപ്പറേഷന്റെ നിബന്ധനകൾക്ക് വിധേയമായി ആവശ്യമായ വായ്പ അനുവദിക്കും.

വായ്പയുടെ തിരിച്ചടവ് കാലാവധി അഞ്ച് വർഷമായിരിക്കും. കോർപ്പറേഷനും മിൽമ അധികൃതരും സംയുക്തമായി തെരഞ്ഞെടുക്കുന്ന സ്ഥലങ്ങളിലായിരിക്കും സംരംഭം ആരംഭിക്കാൻ അനുമതി നൽകുക.

സംരംഭത്തിന് ആവശ്യമായ സ്ഥലവും കെട്ടിടവും അനുബന്ധ സൗകര്യങ്ങളും അപേക്ഷകൻ സ്വന്തമായി സജ്ജീകരിക്കണം. തെരഞ്ഞെടുക്കപ്പെടുന്ന അപേക്ഷകർക്ക് ഉൽപ്പന്നങ്ങൾ, സാങ്കേതിക സഹായം എന്നിവ മിൽമ ലഭ്യമാക്കും. കൂടാതെ ഫ്രീസർ, കൂളർ തുടങ്ങിയ ഉപകരണങ്ങൾ സബ്സിഡി നിരക്കിൽ നൽകുകയും ഷോപ്പി/പാർലറിന് ആവശ്യമായ സൈനേജ് മിൽമ ഒരുക്കുകയും ചെയ്യും.

താൽപ്പര്യമുള്ളവർ അപേക്ഷാ ഫോറത്തിനും കൂടുതൽ വിവരങ്ങൾക്കുമായി കോർപ്പറേഷന്റെ തിരുവനന്തപുരം ജില്ലാ ഓഫീസുമായി ബന്ധപ്പെടണം. ഫോൺ: 0471 2723155, മൊബൈൽ: 9400068501.