കടലയോ പപ്പടമോ പഴമോ മീനോ ചിക്കനോ എന്തുമാകട്ടെ, പുട്ടിനൊപ്പം കിടിലൻ കോംമ്പിനേഷൻ ആണ്. എന്നാൽ വീട്ടിൽ പുട്ട് ഉണ്ടാക്കുമ്പോൾ പലരും നേരിടുന്ന ഒരു പ്രശ്നമാണ് പുട്ട് കട്ടിയാകുന്നതും വരണ്ടുപോകുന്നതും. കടയിൽ നിന്ന് വാങ്ങുന്ന പുട്ടിന്റെ അതേ മൃദുത്വവും പഞ്ഞിപോലുള്ള ഘടനയും വീട്ടിൽ ലഭിക്കണമെങ്കിൽ ചില കാര്യങ്ങൾ ശ്രദ്ധിക്കേണ്ടതുണ്ട്.

ആരോ​ഗ്യ വാർത്തകൾ കൂടുതൽ അറിയാൻ വാട്സ്ആപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

പൊടിയുടെ നനവ് ശ്രദ്ധിക്കാം

മൃദുവായ പുട്ട് ലഭിക്കുന്നതിൽ ഏറ്റവും പ്രധാനപ്പെട്ട ഘടകമാണ് പൊടിയുടെ നനവ്. പുട്ടുപൊടിയിലേക്ക് ഒരുമിച്ച് ധാരാളം വെള്ളം ഒഴിക്കരുത്. പകരം, ആവശ്യത്തിന് വെള്ളം കുറേശ്ശെയായി തളിച്ചുകൊണ്ട് പൊടി കൈകൊണ്ട് നന്നായി തിരുമ്മിയെടുക്കാം. പൊടിയിൽ ഈർപ്പം ഒരുപോലെ എത്തണം.

പൊടി കൈയിലെടുത്ത് അമർത്തുമ്പോൾ ചെറിയൊരു ഉരുളയായി രൂപപ്പെടുകയും തൊട്ടാൽ വീണ്ടും പൊടിഞ്ഞുപോകുകയും ചെയ്യുന്ന പരുവമാണ് വേണ്ടത്. അമിതമായി വെള്ളം ചേർത്താൽ പുട്ട് കട്ടിയാകാനും ഒട്ടിപ്പിടിക്കാനും സാധ്യതയുണ്ട്.

ഉപ്പ് ചേർക്കാൻ മറക്കരുത്

പുട്ടുപൊടി നനയ്ക്കുമ്പോൾ ആവശ്യത്തിന് ഉപ്പ് ചേർക്കണം. വെള്ളത്തിൽ ഉപ്പ് കലക്കിയശേഷം പൊടിയിലേക്ക് തളിക്കുന്നത് ഉപ്പ് ഒരുപോലെ ചേരാൻ സഹായിക്കും. രുചിക്കൊപ്പം പൊടിയുടെ നനവും കൃത്യമായി ക്രമീകരിക്കാൻ ഇതിലൂടെ സാധിക്കും.

തേങ്ങ ചേർക്കുന്നത് രുചിയും മൃദുത്വവും കൂട്ടും

പുട്ട് മൃദുവും രുചികരവുമാക്കാൻ തേങ്ങ ഉപയോഗിക്കാം. പുട്ടുകുറ്റിയിൽ ആദ്യം അല്പം തേങ്ങ ചിരകിയത് ഇടുക. അതിനു ശേഷം നനച്ച പുട്ടുപൊടി നിറയ്ക്കുക. വീണ്ടും തേങ്ങ ചേർത്ത് പാളികളായി നിറയ്ക്കാം. തേങ്ങയുടെ സാന്നിധ്യം പുട്ടിന് നല്ല രുചിയും ഈർപ്പവും നൽകും.

പൊടി അരിപ്പയിലൂടെ അരിച്ചെടുക്കാം

പുട്ടുപൊടി നനച്ചശേഷം കൈകൊണ്ട് നന്നായി തിരുമ്മിയെടുക്കുക. വലിയ കട്ടകൾ ഉണ്ടെങ്കിൽ അവ ഉടച്ചുകളയണം. ശേഷം അരിപ്പയിലൂടെ അരിച്ചെടുക്കാം. ഇത് പൊടി ഒരേപോലെയുള്ള തരികളായി ലഭിക്കാനും പുട്ട് മൃദുവാകാനും സഹായിക്കും.

അൽപസമയം വിശ്രമിക്കാൻ അനുവദിക്കാം

പൊടി നനച്ച ഉടൻ പുട്ടുകുറ്റിയിൽ നിറയ്ക്കുന്നതിനുപകരം ഏകദേശം 10–15 മിനിറ്റ് മാറ്റിവയ്ക്കാം. ഇതിലൂടെ പൊടിയിലെ ഈർപ്പം ഒരുപോലെ ആഗിരണം ചെയ്യപ്പെടും. അതിനുശേഷം വീണ്ടും കൈകൊണ്ട് ചെറുതായി തിരുമ്മി കട്ടകൾ മാറ്റാം.

ആവിയിൽ ശരിയായ രീതിയിൽ വേവിക്കാം

പുട്ടുകുറ്റിയിൽ പൊടി നിറയ്ക്കുമ്പോൾ അമർത്തി ഉറപ്പിക്കരുത്. അയഞ്ഞ രീതിയിൽ നിറയ്ക്കുന്നതാണ് നല്ലത്. വെള്ളം നന്നായി തിളച്ചശേഷം പുട്ടുകുറ്റി വെച്ച് ആവിയിൽ വേവിക്കാം. ഏകദേശം 5–8 മിനിറ്റ് വേവിക്കുന്നത് സാധാരണയായി മതിയാകും. പുട്ടിന്റെ മുകളിൽ നിന്ന് നല്ല രീതിയിൽ ആവി പുറത്തുവരുമ്പോൾ വെന്തുവെന്ന് മനസ്സിലാക്കാം. പുട്ട് അധികനേരം വേവിക്കുന്നത് ഒഴിവാക്കണം.

പുട്ടുപൊടി നനയ്ക്കുമ്പോൾ വെള്ളം കുറേശ്ശെയായി ചേർക്കുന്നതാണ് ഏറ്റവും പ്രധാനം. പൊടി അമിതമായി നനയാതെയും വരണ്ടുപോകാതെയും ശ്രദ്ധിച്ചാൽ നല്ല മൃദുവായ പുട്ട് വീട്ടിൽ തന്നെ തയ്യാറാക്കാം.