മുംബൈ: വിവോ സബ് ബ്രാന്‍ഡായ ഐക്യൂഒഒ, അവരുടെ ഐക്യൂഒഒ 15 മോഡലിന് പിന്നാലെ ഐക്യൂഒഒ 15ആര്‍ പുറത്തിറക്കാന്‍ ഒരുങ്ങുന്നതായി റിപ്പോര്‍ട്ട്. പുതിയ ഫോണ്‍ എന്ന് പുറത്തിറക്കുമെന്നതിനെ കുറിച്ച് വ്യക്തമായ വിവരങ്ങള്‍ കൈമാറിയിട്ടില്ലെങ്കിലും ഇത് ഒരു കോംപാക്റ്റ് ഫ്‌ലാഗ്ഷിപ്പ് ഉപകരണമായിരിക്കുമെന്നാണ് സൂചന.

റിപ്പോര്‍ട്ടുകള്‍ അനുസരിച്ച് ഫെബ്രുവരിയില്‍ ഇത് വിപണിയില്‍ എത്തിയേക്കാം. ഐക്യൂഒഒ 15ല്‍ നിന്ന് പ്രചോദനം ഉള്‍ക്കൊണ്ട് വൃത്താകൃതിയിലുള്ള അരികുകളുള്ള ചതുരാകൃതിയിലുള്ള കാമറ മൊഡ്യൂള്‍ ഇത് വാഗ്ദാനം ചെയ്യുമെന്നാണ് ടീസര്‍ സൂചിപ്പിക്കുന്നത്. കാമറ മൊഡ്യൂളിന് പുറത്ത് ഒരു എല്‍ഇഡി ഫ്‌ലാഷും ഇത് വാഗ്ദാനം ചെയ്‌തേക്കാം.

1.5കെ റെസല്യൂഷനും 144ഹെര്‍ട്സ് റിഫ്രഷ് റേറ്റും ഉള്ള 6.59 ഇഞ്ച് അമോലെഡ് ഫ്‌ലാറ്റ് ഡിസ്പ്ലേയാണ് അവതരിപ്പിക്കുന്നത്. 5,000 നിറ്റ്സ് പീക്ക് ബ്രൈറ്റ്നസ് ഈ ഡിവൈസ് വാഗ്ദാനം ചെയ്‌തേക്കാം. ക്വാല്‍കോം സ്നാപ്ഡ്രാഗണ്‍ 8 ജെന്‍ 5 ചിപ്സെറ്റും ക്യു3 ചിപ്സെറ്റും ഇതിന് കരുത്ത് പകരും. 16ജിബി എല്‍പിഡിഡിആര്‍5എക്സ് റാമുമായി ഇതിനെ ജോടിയാക്കാനും സാധ്യതയുണ്ട്. 100w ചാര്‍ജിങ് പിന്തുണയുള്ള 7,600 എംഎഎച്ച് ബാറ്ററിയും ഈ ഡിവൈസില്‍ ഉണ്ടായിരിക്കാം. ആന്‍ഡ്രോയിഡ് 16 അടിസ്ഥാനമാക്കിയുള്ള ഒറിജിനസ് ഒഎസ് 6ല്‍ ആയിരിക്കാം ഇത് പ്രവര്‍ത്തിക്കുക.

കാമറയെ സംബന്ധിച്ചിടത്തോളം, ഡിവൈസിന് 200എംപി മെയിന്‍ കാമറയും 8എംപി സെക്കന്‍ഡറി കാമറയും ലഭിച്ചേക്കാം. സെല്‍ഫികള്‍ക്കായി, ഡിവൈസിന് 32എംപി ഫ്രണ്ട് കാമറ ഉണ്ടായിരിക്കാം. ഏകദേശം 45,000 രൂപ വിലയില്‍ ഇത് പുറത്തിറങ്ങുമെന്നാണ് സൂചന.