കുറഞ്ഞ ചെലവിൽ മികച്ച പ്രോട്ടീൻ കിട്ടാനുള്ള ഏറ്റവും എളുപ്പമുള്ള മാർ​ഗമാണ് മുട്ട. പ്രോട്ടീൻ മാത്രമല്ല, 13 സുപ്രധാന വിറ്റാമിനുകളും ധാതുക്കളും അടങ്ങിയ മുട്ട ആരോ​ഗ്യത്തെ പലവിധത്തിൽ ​ഗുണം ചെയ്യുന്നുണ്ട്. ഇപ്പോഴിതാ, അൽഷിമേഴ്സ് സാധ്യത കുറയ്ക്കാനും മുട്ടയ്ക്ക് സാധിക്കുമെന്നാണ് പുതിയ കണ്ടെത്തൽ.

ജേണൽ ഓഫ് ന്യൂട്രിഷനിൽ പ്രസിദ്ധീകരിച്ച ദീർഘകാല പഠനത്തിലാണ് ഈ കണ്ടെത്തൽ. മുട്ടയിൽ അടങ്ങിയ കൊളിൻ, ഒമേ​ഗ-3 ഫാറ്റി ആസിഡുകൾ, വിറ്റമിൻ ബി12, ല്യൂട്ടിൻ പോലുള്ള പോഷകങ്ങൾ തലച്ചോറിന്റെ ആരോ​ഗ്യത്തെ പോഷിപ്പിക്കുന്നതാണ്. ആഴ്ചയിൽ അഞ്ചോ അതിലധികമോ തവണ മുട്ട കഴിച്ചവരിൽ അൽഷിമേഴ്സ് സാധ്യത ഏകദേശം 27 ശതമാനം വരെ കുറഞ്ഞതായി പഠനം വ്യക്തമാക്കുന്നു.

ആയിരക്കണക്കിന് ആളുകളുടെ ഭക്ഷണശീലങ്ങളും ആരോ​ഗ്യവിവരങ്ങളും 15 വർഷം നിരീക്ഷച്ച ശേഷമാണ് നി​ഗമനമെന്ന് ​ഗവേഷകർ പറഞ്ഞു. എന്നാൽ മുട്ട കൊണ്ട് മാത്രം അൽഷിമേഴ്സ് സാധ്യത കുറയ്ക്കാൻ സാധിക്കുമെന്ന തരത്തിൽ ഈ പഠനത്തെ വ്യാഖ്യാനിക്കാനാകില്ലെന്ന് വി​ദ​ഗ്ധർ പറയുന്നു.

പാരമ്പര്യം, ഉറക്കം, പ്രമേഹം, രക്തസമ്മർദം, പുകവലി, ജീവിതശൈലി പോലുള്ള ഘടകങ്ങൾ രോ​ഗസാധ്യതയെ സ്വാധീനിക്കുന്ന മറ്റ് ഘടകങ്ങളാണ്. സാൽമൺ, സാർഡിൻ, പോലുള്ള കൊഴുപ്പുള്ള മീനുകൾ, ഇലക്കറികൾ, ബെറികൾ, നട്സ്, ഒലിവ് ഓയിൽ തുടങ്ങിയ ഭക്ഷണവിഭവങ്ങൾ ഡയറ്റിൽ ചേർക്കുന്നത് തലച്ചോറിന്റെ ആരോ​ഗ്യത്തിന് ​ഗുണകരമാണെന്ന് വിദ​ഗ്ധർ ചൂണ്ടിക്കാണിക്കുന്നു.

എന്താണ് അൽഷിമേഴ്സ്

ഒരു വ്യക്തിയുടെ ഓർമ്മശക്തിയെയും ചിന്താശേഷിയെയും സാവധാനം നശിപ്പിക്കുന്ന ഒരു മസ്തിഷ്ക വൈകല്യമാണ് അൽഷിമേഴ്സ്. നാഷണൽ ഇൻസ്റ്റിറ്റ്യൂട്ട് ഓൺ ഏജിങ് പ്രകാരം, അൽഷിമേഴ്‌സ് ആണ് ഏറ്റവും സാധാരണമായ ഡിമെൻഷ്യ രൂപം. വൈജ്ഞാനിക പ്രവർത്തനത്തിന്റെ നഷ്ടം- ചിന്തിക്കൽ, ഓർമിക്കൽ, തീരുമാനം എടുക്കൽ എന്നിവയിൽ ബുദ്ധിമുട്ട് നേരിടുന്നു.

മുട്ടയും തലച്ചോറും തമ്മിൽ

മുട്ടയിൽ അടങ്ങിയ കോളിൻ തലച്ചോറിന്റെ ആരോ​ഗ്യത്തെ മെച്ചപ്പെടുത്താൻ സഹായിക്കുന്ന ഒരു അവശ്യ പോഷകമാണ്. ശരീരം സ്വന്തമായി ചെറിയ അളവിൽ കോളിൻ ഉൽപാദിപ്പിക്കുന്നുണ്ടെങ്കിലും ഭക്ഷണത്തിലൂടെയാണ് പ്രധാനമായും ശരീരത്തിൽ എത്തേണ്ടതെന്ന് ​ഗവേഷകർ പറയുന്നു. തലച്ചോറിന്റെ ആരോഗ്യത്തിന് സഹായിക്കുന്നതിനൊപ്പം, കോളിൻ വീക്കം കുറയ്ക്കുകയും മാനസികാവസ്ഥയും മാനസികാരോഗ്യവും നിയന്ത്രിക്കുകയും പേശികളുടെ പ്രവർത്തനത്തെ പിന്തുണയ്ക്കുകയും കൊഴുപ്പ് രാസവിനിമയത്തെ പോലും സഹായിക്കുകയും ചെയ്യുന്നു.