വ്യായാമം ചെയ്യണമെന്നൊക്കെ ഉണ്ട്, പക്ഷെ സമയമില്ലെന്നാണ് നിങ്ങളുടെ പരാതി. ലിഫ്റ്റിനും എസ്കലേറ്ററിനും പകരം ദിവസവും കുറച്ചു സമയം പടികൾ കയറുന്ന ശീലം വളർത്തിയെടുക്കുന്നത് ശരീരത്തിനും മനസ്സിനും ഒരുപോലെ ​ഗുണകരമായിരിക്കും. പ്രത്യേക ഉപകരണങ്ങളോ ചെലവോ ആവശ്യമില്ലാത്ത ഈ ലളിതമായ വ്യായാമം ഹൃദയാരോഗ്യം മെച്ചപ്പെടുത്താനും ശരീരഭാരം നിയന്ത്രിക്കാനും പേശികളെ ശക്തിപ്പെടുത്താനും സഹായിക്കും. സ്ഥിരമായി പടികൾ കയറുന്നത് ദീർഘകാല ആരോഗ്യത്തിനും മികച്ചതാണ്.

ഹൃദയാരോഗ്യം മെച്ചപ്പെടുത്തുന്നു

പടികൾ കയറുന്നത് മികച്ച കാർഡിയോ വ്യായാമമാണ്. ഇത് ഹൃദയമിടിപ്പ് വർധിപ്പിക്കുകയും രക്തയോട്ടം മെച്ചപ്പെടുത്തുകയും ചെയ്യുന്നു. സ്ഥിരമായി ചെയ്യുന്നത് ഹൃദ്രോഗ സാധ്യത കുറയ്ക്കാനും ഹൃദയത്തിന്റെ പ്രവർത്തനക്ഷമത വർധിപ്പിക്കാനും സഹായിക്കും.

കൂടുതൽ കലോറി കത്തിക്കും

സാധാരണ നടക്കുന്നതിനേക്കാൾ കൂടുതൽ ഊർജം പടികൾ കയറുമ്പോൾ ചെലവാകുന്നു. അതുകൊണ്ട് ശരീരത്തിലെ അധിക കൊഴുപ്പ് കുറയ്ക്കാനും ഭാരം നിയന്ത്രിക്കാനും ഇത് ഫലപ്രദമാണ്.

കാലുകളിലെ പേശികൾക്ക് കരുത്ത്

തുടകൾ, കാൽപ്പാദങ്ങൾ, ഇടുപ്പ്, നിതംബം എന്നിവയിലെ പേശികൾ പടികൾ കയറുമ്പോൾ കൂടുതൽ പ്രവർത്തിക്കുന്നു. ഇതിലൂടെ പേശികളുടെ കരുത്തും ബലവും വർധിക്കും.

അസ്ഥികളുടെ ആരോഗ്യം

ശരീരഭാരം താങ്ങിക്കൊണ്ടുള്ള വ്യായാമമായതിനാൽ അസ്ഥികളുടെ സാന്ദ്രത നിലനിർത്താൻ സഹായിക്കുന്നു. പ്രായം കൂടുമ്പോൾ അസ്ഥികളുടെ ബലം കുറയുന്നത് മന്ദഗതിയിലാക്കാനും ഈ വ്യായാമം ഉപകാരപ്പെടും.

ശ്വാസകോശത്തിന്റെ പ്രവർത്തനം

പടികൾ കയറുമ്പോൾ ശരീരത്തിന് കൂടുതൽ ഓക്സിജൻ ആവശ്യമായി വരും. ഇത് ശ്വാസകോശത്തിന്റെ പ്രവർത്തനക്ഷമത വർധിപ്പിക്കുകയും സഹിഷ്ണുത മെച്ചപ്പെടുത്തുകയും ചെയ്യും.

രക്തത്തിലെ പഞ്ചസാര നിയന്ത്രം

ശാരീരിക പ്രവർത്തനം വർധിക്കുന്നതിനാൽ ശരീരം ഗ്ലൂക്കോസ് കൂടുതൽ ഫലപ്രദമായി ഉപയോഗിക്കുന്നു. ഇതിലൂടെ രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായകമാകാം.

മാനസികാരോഗ്യത്തിന് ഗുണം

വ്യായാമം ചെയ്യുമ്പോൾ ശരീരത്തിൽ 'ഫീൽ ഗുഡ്' ഹോർമോണുകളായ എൻഡോർഫിനുകൾ പുറത്തുവരുന്നു. ഇത് മാനസിക സമ്മർദ്ദം കുറയ്ക്കാനും ഉന്മേഷം നൽകാനും സഹായിക്കും.

ശരീരസന്തുലിതാവസ്ഥ

പടികൾ കയറുകയും ഇറങ്ങുകയും ചെയ്യുന്നത് ശരീരത്തിന്റെ ബാലൻസ്, ഏകോപനം എന്നിവ മെച്ചപ്പെടുത്താൻ സഹായിക്കുന്നു. പ്രായമായവർ വീഴാനുള്ള സാധ്യത കുറയ്ക്കുന്നതിനും ഈ വ്യായാമം സഹായകരമാണ്.

ദിവസേനയുടെ ഫിറ്റ്നസ് വർധിപ്പിക്കുന്നു

കുറച്ച് ദിവസങ്ങൾക്കുള്ളിൽ തന്നെ ദൈനംദിന ജോലികൾ ചെയ്യുമ്പോൾ ക്ഷീണം കുറയുന്നതായി പലർക്കും അനുഭവപ്പെടാം. ശരീരത്തിന്റെ സഹിഷ്ണുതയും ഊർജനിലയും ക്രമേണ മെച്ചപ്പെടും.

സമയം ലാഭിക്കുന്ന മികച്ച വ്യായാമം

ജിമ്മിൽ പോകേണ്ട ആവശ്യമോ പ്രത്യേക ഉപകരണങ്ങളുടെ സഹായമോ ഇല്ലാതെ ഓഫീസിലും വീട്ടിലും പടികൾ ഉപയോഗിച്ച് ദിവസവും 10–15 മിനിറ്റ് ചെലവഴിച്ചാൽ നല്ലൊരു വ്യായാമം ലഭിക്കും.

പടികൾ കയറുമ്പോൾ ശ്രദ്ധിക്കേണ്ട കാര്യങ്ങൾ

• ആദ്യം പതുക്കെ ആരംഭിക്കുക.

• സുഖപ്രദമായ ഷൂ ധരിക്കുക.

• കൈപ്പിടിയുള്ള പടികൾ തിരഞ്ഞെടുക്കുക.

• ശ്വാസം പിടിച്ചുവെക്കാതെ സ്വാഭാവികമായി ശ്വസിക്കുക.

• തലകറക്കം, നെഞ്ചുവേദന, കടുത്ത ശ്വാസതടസ്സം എന്നിവ അനുഭവപ്പെട്ടാൽ ഉടൻ നിർത്തുക.

• മുട്ടുവേദന, ഹൃദ്രോഗം, ഗുരുതരമായ സന്ധിവേദന തുടങ്ങിയ ആരോഗ്യപ്രശ്നങ്ങൾ ഉള്ളവർ ഡോക്ടറുടെ നിർദേശപ്രകാരം മാത്രം ആരംഭിക്കുക.

എത്ര സമയം പടികൾ കയറണം?

ലിഫ്റ്റിന് പകരം പടികൾ തിരഞ്ഞെടുക്കുന്നത് തന്നെ നല്ല തുടക്കമാണ്.

• തുടക്കക്കാർ: 5–10 മിനിറ്റ്.

• സ്ഥിരമായി വ്യായാമം ചെയ്യുന്നവർ: 10–20 മിനിറ്റ്.

• ആഴ്ചയിൽ കുറഞ്ഞത് 5 ദിവസം ചെയ്യാൻ ശ്രമിക്കുക.

പടികൾ കയറുന്നത് വളരെ ലളിതവും ചെലവില്ലാത്തതുമായ ഒരു വ്യായാമമാണ്. ദിവസവും ഏതാനും മിനിറ്റ് ഈ ശീലം പിന്തുടരുന്നത് ഹൃദയാരോഗ്യം മെച്ചപ്പെടുത്താനും ശരീരഭാരം നിയന്ത്രിക്കാനും പേശികളെയും അസ്ഥികളെയും ശക്തിപ്പെടുത്താനും മാനസിക ഉന്മേഷം വർധിപ്പിക്കാനും സഹായിക്കും. ചെറിയൊരു മാറ്റമായ ലിഫ്റ്റിന് പകരം പടികൾ തിരഞ്ഞെടുക്കുന്നത്, ദീർഘകാല ആരോഗ്യത്തിലേക്കുള്ള വലിയൊരു ചുവടുവെയ്പ്പായിരിക്കും.