ഹോട്ടലിലോ റസ്റ്റോറന്റിലോ പോകുമ്പോൾ മൂക്കുമുട്ടെ കഴിച്ചാലും അവസാനം ഒരു ഫ്രഷ് ലൈം അല്ലെങ്കിൽ സോഡാ ലൈം കൂടി ഓർഡർ ചെയ്യുന്നവരെ ശ്രദ്ധിച്ചിട്ടില്ലേ? ഈ കഴിച്ചതൊന്നും തികയാഞ്ഞിട്ടാണ് ഇനി നാരങ്ങാ വെള്ളം കൂടിയെന്ന് സംശയിക്കരുത്. ഇതിന് പിന്നിലൊരു രഹസ്യമുണ്ട്.

ഭക്ഷണം അമിതമാകുമ്പോൾ ദഹനം മന്ദ​ഗതിയിലാകാനുള്ള സാധ്യതയുണ്ട്. എന്നാൽ ഭക്ഷണ ശേഷം നാരങ്ങ വെള്ളം കുടിക്കുന്നത് ദഹനം വേ​ഗത്തിലാക്കാനും നെഞ്ചെരിച്ചിൽ, വയറുവേദന, ദേഹനക്കേട് എന്നിവ ഉണ്ടാവാതെ സംരക്ഷിക്കുകയും ചെയ്യുന്നു.

നാരങ്ങയിലെ സിട്രിക് ആസിഡ് വയറ്റിലെ ആസിഡിന്റെ ഉത്പാദനം വർധിപ്പിക്കുന്നു, ഇത് ഭക്ഷണം എളുപ്പത്തിൽ വിഘടിപ്പിക്കാനും ദഹിക്കാനും സഹായിക്കുന്നു. പോഷകങ്ങളുടെ ആഗിരണം വേഗത്തിലാക്കാനും നാരങ്ങാ വെള്ളം നല്ലതാണ്. ഇത് വയർ വീർക്കുന്നത് (bloating) കുറയ്ക്കുന്നു. കൂടാതെ കൊഴുപ്പ് കുറയ്ക്കാനും അമിതമായി വയറ് നിറഞ്ഞ അവസ്ഥ കുറയ്ക്കാനും നല്ലതാണ്.

കൂടാതെ നാരങ്ങയിൽ വിറ്റാമിൻ സി ധാരാളം അടങ്ങിയിട്ടുണ്ട്. ഇത് ശരീരത്തിന്റെ പ്രതിരോധശേഷി മെച്ചപ്പെടുത്താനും ഊർജ്ജനില നൽകാനും സഹായിക്കും. കട്ടിയുള്ള നോൺവെജ്ജ് ഭക്ഷണങ്ങൾ കഴിച്ചാലും ക്ഷീണം തോന്നില്ല. നിർജ്ജലീകരണം തടയാനും ഇത് സഹായിക്കും.

എങ്കിലും സ്ഥിരമായി നാരങ്ങാ വെള്ളം കുടിക്കുന്നത് അത്ര നല്ലതല്ലതാനും. അമിതമായ അളവിൽ നാരങ്ങാ വെള്ളം കുടിച്ചാൽ അസിഡിറ്റി, വയറുവേദന, ഓക്കാനം, വായ്പുണ്ണ് എന്നിവ ഉണ്ടാകാം. നാരങ്ങയുടെ ആസിഡ് പല്ലിന്റെ ഇനാമലിനെ ദോഷകരമായി ബാധിക്കാം, അതിനാൽ കുടിച്ച ശേഷം വായ കഴുകുന്നത് നല്ലതാണ്.ഉചിതമായ അളവിൽ, മിതമായി കഴിച്ചാൽ നാരങ്ങാവെള്ളം നിങ്ങളുടെ ആരോഗ്യത്തിന് വലിയ ഗുണങ്ങൾ നൽകും.