ശരീരഭാരം നിയന്ത്രിക്കുന്ന കാലത്ത് ഓണസദ്യ ആസ്വദിച്ചു കഴിക്കാനാകുമോ എന്ന സംശയം മിക്കവർക്കുമുണ്ടാകും. എന്നാൽ സദ്യ ഒഴിവാക്കാനാകില്ല. കഴിക്കുന്ന ഭക്ഷണത്തിന്റെ അളവു എന്താണ് കഴിക്കുന്നതെന്നും ശ്രദ്ധിച്ചാൽ ഈ പരിഹരിക്കാം.

• വളരെയധികം വിശന്നിട്ടു സദ്യ കഴിക്കാൻ ഇരിക്കരുത്. അങ്ങനെ ചെയ്താൽ അളവു നിയന്ത്രിച്ചു ഭക്ഷണം കഴിക്കാൻ ബുദ്ധിമുട്ടായിരിക്കും.

• സദ്യ കഴിക്കുന്നതിന് 15–20 മിനിറ്റിനു മുൻപു ഒരു ഗ്ലാസ് വെള്ളം കുടിക്കുന്നത് ഭക്ഷണത്തിൻ്റെ അളവു നിയന്ത്രിക്കാൻ സഹായിക്കും.

• സദ്യയ്ക്കായി ചുവന്ന അരി (തവിടുള്ളത്– മട്ട അരി) തിരഞ്ഞെടുക്കാം. ഇതിൽ നാരുകളും പോഷകമൂല്യവും കൂടുതലാണ്.

• സദ്യയിൽ പച്ചക്കറികൾ കൂടുതൽ ഉൾപ്പെടുത്തി ചോറിന്റെ അളവു നിയന്ത്രിക്കാം.

• തോരൻ, അവിയൽ, പച്ചടി, കിച്ചടി, സാമ്പാർ എന്നിങ്ങനെയുള്ള കറികൾ കൂടുതലായി കഴിക്കാം. എന്നാൽ ഇവ തേങ്ങയും എണ്ണയും കുറയ്ക്കാം.

• പരിപ്പ് ഒഴിച്ചു ചോറു കഴിക്കുമ്പോൾ നെയ്യ് ഒഴിവാക്കുകയോ കുറയ്ക്കുകയോ ചെയ്യാം.

• പപ്പടം ഒരെണ്ണം മതിയാകും.

• ഉപ്പേരി, ശർക്കര വരട്ടി എന്നിവയിൽ ഊർജ്ജത്തിന്റെ തോതു കൂടുതലായതിനാൽ അവ വളരെ ചെറിയ അളവു മാത്രം ഉപയോഗിക്കുക.

• അച്ചാറുകൾ തയാറാക്കുമ്പോൾ‌ എണ്ണയും ഉപ്പും കുറയ്ക്കണം.

• പായസം സദ്യയിൽ ഒഴിച്ചു കൂടാനാകാത്തതാണ്. മില്ലറ്റുകൾ, പയർവർഗങ്ങള്‍ എന്നിവ കൊണ്ടുള്ള പായസം തയാറാക്കാം. പായസം നിയന്ത്രിതമായ അളവിൽ കഴിക്കാം.

• പാട നീക്കിയ പാൽ ഉപയോഗിച്ചു പാൽ പായസം തയാറാക്കാം. എന്നാൽ പഞ്ചസാരയുടെ അളവു വളരെ കുറച്ചു മാത്രം മതിയാകും

• പായസം കഴിച്ചു കഴിഞ്ഞു ഹൽവ, ജിലേബി പോലുള്ള മധുരപലഹാരങ്ങൾ ഒഴിവാക്കാം.

• പായസം തയാറാക്കുമ്പോൾ നെയ്യ് വളരെ കുറച്ചു മാത്രം ഉപയോഗിക്കുക. അണ്ടിപരിപ്പ് വറുത്തെടുത്തു മാറ്റി വച്ച നെയ്യ് , വീണ്ടും പായസത്തിലേക്ക് ഒഴിക്കാതിരിക്കുക.

• മോര് നല്ല ഒരു പ്രോബയോട്ടിക്കാണ്. അധികം ഉപ്പു ചേർക്കാതെ മോരു കഴിക്കാം.

• ഭക്ഷണം സാവധാനം കഴിക്കുക. ഏകദേശം 20 മിനിറ്റെങ്കിലും എടുത്തു കഴിക്കാൻ ശ്രമിക്കുക. നന്നായി ചവച്ചരച്ച് ആഹാരം കഴിക്കുന്നതിനു ശ്രദ്ധിക്കുക.

• സദ്യ കഴിഞ്ഞ ഉടൻ കിടക്കരുത്.

• ഭക്ഷണത്തിനു ശേഷം 10–20 മിനിറ്റ് എന്തെങ്കിലും ചെറിയ വ്യായാമത്തിൽ ഏർപ്പെടാം. അൽപദൂരം നടന്നാലും മതി.

• പാൽ, ചായ, കാപ്പി എന്നിവയുടെ ഉപയോഗം പരമാവധി കുറയ്ക്കാം. സദ്യയ്ക്കു ശേഷം വൈകിട്ടു ചുക്കുകാപ്പി കുടിക്കുന്നതു നല്ലതാണ്. ഇതിൽ കുറച്ചു കുരുമുളക്, മല്ലി എന്നിവ കൂടി ചേർക്കാം. പഞ്ചസാര ചേർത്ത പാനീയങ്ങൾ ഒഴിവാക്കണം.