രാത്രിയിലെ ഉറക്കം ശരിയാകുന്നില്ലേ? ​ഗുണനിലവാരമുള്ള ഉറക്കത്തിന് നമ്മുടെ ബെഡ് റൂമിന് വലിയ പങ്കുണ്ട്. ബെഡ് റൂമിലെ ചില മാറ്റങ്ങൾ ഉറക്കം മെച്ചപ്പെടുത്താൻ സഹായിക്കും. ഒന്ന്, രാത്രി കിടപ്പുമുറിയിൽ റെഡ് എൽഇഡി ബൾബുകൾ കത്തിക്കുക. രണ്ട്, ബ്ലാക്ക്ഔട്ട് കർട്ടനുകൾ ഉപയോ​ഗിക്കുക. രാത്രി ബെഡ‍് റൂമിൽ ഈ രണ്ട് മാറ്റങ്ങൾ കൊണ്ടുവരുന്നത് നിങ്ങൾക്ക് മെച്ചപ്പെട്ട ഉറക്കം നൽകാനും ഊർജ്ജസ്വലരായി ഉണരാനും സഹായിക്കും.

വൈകുന്നേരങ്ങളിൽ ഫോൺ, ടിവി അല്ലെങ്കിൽ സാധാരണ ബൾബുകൾ എന്നിവയിൽ നിന്നുള്ള ബ്രൈറ്റ്, ബ്ലൂ ലൈറ്റുകൾ ഉറക്കത്തിന് കാരണമാകുന്ന ഹോർമോണായ മെലാറ്റോണിന്റെ ഉത്പാദനത്തെ തടസപ്പെടുത്തുന്നു. എന്നാൽ ചുവന്ന ലൈറ്റുകൾക്ക് കൂടുതൽ തരം​ഗദൈർഘ്യമുണ്ട്. അതേസമയം, മെലാറ്റോണിന്റെ ഉൽപാദനത്തെ ബാധിക്കുകയുമില്ല.

രാത്രി ചുവന്ന എൽഇഡി ലൈറ്റുകൾ ഉപയോ​ഗിക്കുന്നത് വിശ്രമിക്കാനുള്ള സമയമാണെന്ന് തലച്ചോറിനെ തിരിച്ചറിയാൻ സഹായിക്കുകയും ചെയ്യുന്നു. മാത്രമല്ല, ഇത് കിടപ്പുമുറിയിൽ ശാന്തവും ഉറക്കത്തിന് അനുകൂലവുമായ ഒരു അന്തരീക്ഷം സൃഷ്ടിക്കുന്നു.

ഇനി രാത്രി ബ്ലാക്ക്ഔട്ട് കർട്ടനുകൾ ഉപയോ​ഗിക്കുന്നത്, പുറത്തു നിന്നുള്ള സ്ട്രീറ്റ് ലൈറ്റുകളിൽ നിന്നുള്ള വെളിച്ചം, പുലർച്ചെ വരുന്ന സൂര്യപ്രകാശം തുടങ്ങിയ ബാഹ്യ പ്രകാശ സ്രോതസ്സുകളെ തടയുന്നതിന് ഇത്തരം ബ്ലാക്ക്ഔട്ട് കർട്ടനുകൾ ഫലപ്രദമാണ്. ഇരുട്ടിന്റെ സാന്നിധ്യം കൊണ്ട്, തലച്ചോർ മെലാറ്റോണിൻ ഉൽപാദനം വർധിപ്പിക്കുകയും മെച്ചപ്പെട്ട ഉറക്കം നൽകുകയും ചെയ്യുന്നു. മുറി ഇരുട്ടായി സൂക്ഷിക്കുന്നതിലൂടെ, ബ്ലാക്ക്ഔട്ട് കർട്ടനുകൾ ശരീരത്തെ സ്ഥിരമായ ഒരു സർക്കാഡിയൻ താളം നിലനിർത്താൻ സഹായിക്കുന്നു, ഇത് ഉറക്കത്തിന്റെ ദൈർഘ്യവും ഗുണനിലവാരവും മെച്ചപ്പെടുത്തുന്നു.

ഉറക്കത്തിന് മുമ്പും ശേഷവും പ്രകാശം ഒപ്റ്റിമൽ ആയി ഉപയോഗിക്കുന്നത് മൂലം ഉറക്കത്തിന്റെ ഗുണനിലവാരവും ദൈർഘ്യവും മെച്ചപ്പെടുമെന്ന് നിരവധി പഠനങ്ങൾ തെളിയിച്ചിട്ടുണ്. ഇത് മാനസികാവസ്ഥ, ശ്രദ്ധ, മൊത്തത്തിലുള്ള ആരോഗ്യം എന്നിവയിൽ സ്വാധീനം ചെലുത്തുന്നു.