മേലധികാരികളുടെ പ്രതീക്ഷയ്‌ക്കൊത്ത് ഉയരുന്നതും ഏല്‍പ്പിച്ച ദൗത്യങ്ങള്‍ കൃത്യമായി പൂര്‍ത്തീകരിക്കുന്നതുമെല്ലാം തൊഴിലിടത്തില്‍ അഭനന്ദനം നേടിത്തരുന്ന കാര്യങ്ങളാണ്. ഉല്‍പ്പാദനക്ഷമത, കാര്യക്ഷമത, ഗുണനിലവാരം തുടങ്ങി കൃത്യ സമയത്ത് ജോലി ചെയ്തു തീര്‍ക്കുന്നതടക്കമുള്ള ഘടകങ്ങള്‍ ഇതില്‍ ഉള്‍പ്പെടുന്നു. ജോലിയില്‍ മികച്ച പ്രകടനം കാഴ്ചവയ്ക്കാന്‍ ആരോഗ്യകരമായ ജീവിതശൈലി പ്രയോജനപ്പെടും എന്നകാര്യത്തില്‍ തര്‍ക്കമില്ല. സ്ഥിരമായ വ്യായാമം, മതിയായ ഉറക്കം എന്നിവയൊക്കെ സമ്മര്‍ദ്ദത്തെ അതിജീവിച്ച് ഫോക്കസ് മെച്ചപ്പെടുത്താനും ഊര്‍ജനിലവാരം വര്‍ധിപ്പിക്കാനുമൊക്കെ സഹായിക്കും. 

സ്ഥിരമായി ശാരീരിക പ്രവര്‍ത്തനങ്ങളില്‍ ഏര്‍പ്പെടുന്നത് എന്‍ഡോര്‍ഫിന്‍ പുറപ്പെടുവിക്കും. ഇത് മാനസികാവസ്ഥ മെച്ചപ്പെടുത്തുകയും സമ്മര്‍ദ്ദവും ഉത്കണ്ഠയും കുറയ്ക്കുകയും ചെയ്യും. കൂടുതല്‍ ശ്രദ്ധയും വ്യക്തതയും നേടാന്‍ ഇത് സഹായിക്കും. മാത്രമല്ല, വ്യായാമം മെച്ചപ്പെട്ട ഹൃദയാരോഗ്യം ഉറപ്പാക്കാനും സഹായിക്കും. ജോലിചെയ്യാനുള്ള ഊര്‍ജ്ജവും സ്റ്റാമിനയും കൂട്ടാന്‍ ഇതുവഴി കഴിയും. ഉറക്കത്തിന്റെ ഗുണനിലവാരവും മെച്ചപ്പെടുന്നതോടെ ക്ഷീണം തടയാനും ജാഗ്രത വര്‍ദ്ധിപ്പിക്കാനും അതുവഴി ജോലിയിലെ പ്രകടനം മെച്ചപ്പെടുത്താനും കഴിയും. 

ശാരീരിക പ്രവര്‍ത്തനങ്ങള്‍ സര്‍ഗ്ഗാത്മക വര്‍ദ്ധിപ്പിക്കുകയും പുതിയ ചിന്തകളെ ഉണര്‍ത്തുകയും ചെയ്യും. പുതിയ ആശയങ്ങളും പുതിയ കാഴ്ചപ്പാടുകളും ഉത്തേജിപ്പിക്കാന്‍ ഇത് സഹായിക്കും. വ്യായാമം ആത്മാഭിമാനവും ആത്മവിശ്വാസവും വര്‍ദ്ധിപ്പിക്കാനും സഹായിക്കും. നിങ്ങളെക്കുറിച്ച് നിങ്ങള്‍ക്കുതന്നെ ഉണ്ടാകുന്ന പോസിറ്റീവ് ചിന്താഗതി ജോലിയില്‍ അനുകൂല ഘടകമായി മാറും. ഇത് നിങ്ങളുടെ പ്രകടനത്തിലും പ്രതിഫലിക്കും. 

സ്ഥിരമായ വ്യായാമശീലം പ്രതിരോധശേഷി വര്‍ദ്ധിപ്പിക്കുമെന്നതിനാല്‍ അസുഖം പിടിമുറുക്കാനുള്ള സാധ്യതകളും കുറവായിരിക്കും. ജോലിയില്‍ നിന്ന് അപ്രതീക്ഷിതമായി മാറിനില്‍ക്കേണ്ടി വരുന്നതടക്കമുള്ള പ്രതികൂല ഘടകങ്ങളെ ഒരുപരിധിവരെ നേരിടാനാകും. അതുമാത്രമല്ല, സ്ഥിരതയാര്‍ന്ന വ്യായാമം നിങ്ങളുടെ ജീവിതരീതിയെയും സ്വാധീനിക്കും. ശരിയായി സമയം വിനിയോഗിക്കാനും കൃത്യ സമയം പാലിക്കാനുമെല്ലാം ഇതുവഴി നിങ്ങള്‍ ശീലിക്കും.

ഈ വാര്‍ത്ത കൂടി വായിക്കൂ 

സ്ത്രീകളിൽ ഹൃദ്രോ​ഗ സാധ്യത വർധിക്കുന്നു, ഇക്കാര്യങ്ങൾ ശ്രദ്ധിക്കുക

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ