നടുവേദന കാരണം ബുദ്ധിമുട്ടുന്നവരുടെ എണ്ണം ഓരോ വർഷവും കൂടി വരികയാണ്. അപകടങ്ങൾ, ജീവിതശൈലി, പോഷകാഹാരക്കുറവ്, കൃത്യമല്ലാത്ത പോസ്‌ചർ തുടങ്ങി നിരവധി കാരണങ്ങൾ കൊണ്ട് സുഷുമ്‌ന നാഡിക്ക് (Spinal Cord) ഉണ്ടാകുന്ന ആഘാതങ്ങളാണ് നടുവേദനയ്‌ക്ക് കാണമാകുന്നത്. ക്രമേണ ഉണ്ടാകുന്നതു കൊണ്ട് തന്നെ ആദ്യ ഘട്ടത്തിൽ നടുവേദനയെ അ​വ​ഗണിക്കുകയാണ് പതിവ്.

നമ്മൾ ഇരിക്കുന്നതിലും ചലിക്കുന്നതിലും ഉറങ്ങുന്നതിലുമുള്ള മാറ്റങ്ങൾ വരെ നടുവിനെ ബാധിക്കാം. ചില സമയങ്ങളിൽ സുഷുമ്‌ന നാഡിക്കുണ്ടാകുന്ന പ്രശ്‌നങ്ങൾ വ്യക്തികളിൽ ചിലപ്പോള്‍ വൈകല്യങ്ങള്‍ വരെയുണ്ടാക്കാം.

നടുവിനെ സംരക്ഷിക്കാൻ ചില ശീലങ്ങൾ

ഇരുത്തത്തില്‍ ശ്രദ്ധവേണം

മണിക്കൂറുകളോളം ഒരേയിരപ്പ്, പ്രത്യേകിച്ച് പുറം വളഞ്ഞ്, കഴുത്ത് കുനിഞ്ഞ് ഇരിക്കുന്നത് നടുവിന് പിരിമുറക്കം ഉണ്ടാക്കും. ക്രമേണ ഇത് നട്ടെല്ലിന്റെ പേശികളിലേക്ക് തുളച്ചുകയറുകയും, നട്ടെല്ലിൻ്റെ ആരോഗ്യത്തെ ബാധിക്കുകയും തേയ്മാനം വേഗത്തിലാക്കുകയും ചെയ്യുന്നു. ഇത് മൂലം പുറംഭാഗം വലിഞ്ഞു മുറുകുന്നതായും, ക്ഷീണവും, ഡിസ്ക് പ്രോലാപ്സും അനുഭവപ്പെടാം.

ഫോൺ ഉപയോ​ഗത്തിന് പരിധി വേണം

ഫോണിൽ മണിക്കൂറുകളോളം കഴുത്ത് വളച്ച് നോക്കുന്നത് നട്ടെല്ലിന് സമ്മർദമുണ്ടാക്കും. 'ടെക് നെക്ക്' എന്നാണ് ഈ അവസ്ഥയെ വിളിക്കുന്നത്. ഇത് കഴുത്ത് വേദന, തോളിൽ കാഠിന്യം, സെർവിക്കൽ സ്പോണ്ടിലോസിസ് എന്നിവയിലേക്ക് നയിക്കുന്നു.

മടി പി‌ടിച്ചുള്ള ഇരിപ്പ്

ഉദാസീനമായ ജീവിതശൈലി ബാക്ക് എക്സ്റ്റെൻസറുകൾ, കോർ തുടങ്ങിയ നട്ടെല്ലിനെ സ്ഥിരപ്പെടുത്തുന്ന പേശികളെ ദുർബലപ്പെടുത്തും. ഇത് ഡിസ്ക്കുകളിലും ലിഗമെന്റുകളിലും സമ്മർദം ഉണ്ടാക്കും. ഇത് വിട്ടുമാറാത്ത നടുവേദനയ്ക്ക് കാരണമാകുന്നു.

വശം തെറ്റി വസ്തുക്കൾ പൊക്കരുത്

ഭാരമുള്ള വസ്തുക്കൾ ഉയർത്താൻ അരക്കെട്ട് വളയ്ക്കുന്നത് നട്ടെല്ലിന് കടുത്ത സമ്മർദം ഉണ്ടാക്കുകയും ഡിസ്കിന് പരിക്കേൽക്കുകയോ പെട്ടെന്നുള്ള പേശി സങ്കോചം ഉണ്ടാകുകയോ ചെയ്തേക്കാം.

മെത്തയുടെ കാര്യത്തിലും വേണം ശ്രദ്ധ

അമിതമായ മൃദുവായ മെത്തയിൽ കിടക്കുന്നത് നട്ടെല്ലിന് അസ്വസ്ഥത ഉണ്ടാക്കുകയും ഉറക്കത്തിൽ പിന്നിലെ പേശികളെ നീട്ടും.ഇത് നടുവേദനയെ വഷളാക്കും.

കമഴ്ന്ന് കിടക്കുക

കമിഴ്ന്ന് കിടക്കുന്നത് കഴുത്തിനും പുറംഭാഗത്തിനും അമിതമായി സമ്മർദം ഉണ്ടാക്കും.