വീക്കൻഡ് മിക്കവാറും ആളുകൾക്ക് വിശ്രമത്തിന്റെയും വിനോദത്തിന്റെ സമയമാണ്. ഈ ദിവസങ്ങളിൽ ആരോ​ഗ്യത്തിനും മാനസികാവസ്ഥയ്ക്കും വേണ്ടി അൽപം സമയം മാറ്റിവയ്ക്കുന്നത് ഉൽപ്പാദനക്ഷമതയിൽ വലിയ മാറ്റങ്ങൾ ഉണ്ടാക്കും.

മണിക്കൂറുകളോളം ഉറങ്ങുകയോ മൊബൈൽ ഫോണിൽ സമയം ചെലവഴിക്കുകയോ ചെയ്യുന്നതിന് പകരം ചില സിംപിൾ ആയ ശീലങ്ങൾ ജീവിതത്തിന്റെ ​ഗുണനിലവാരം ഉയർത്താൻ സഹായിക്കും.

വീക്കൻഡിൽ ചെയ്യാവുന്ന ചെറിയ ശീലങ്ങൾ

കുറച്ച് നേരത്തെ എഴുന്നേൽക്കുക

വീക്കെൻഡ് ആയതുകൊണ്ട് ഉച്ചവരെ ഉറങ്ങുന്ന ശീലം ശരീരത്തിന്റെ ബയോളജിക്കൽ ക്ലോക്കിനെ ബാധിക്കാം. പതിവിൽ നിന്ന് ഒരു മണിക്കൂർ മാത്രം വൈകി എഴുന്നേൽക്കുന്നത് മതിയാകും. ഇതിലൂടെ തിങ്കളാഴ്ച വീണ്ടും സാധാരണ റൂട്ടീനിലേക്ക് മടങ്ങുക എളുപ്പമാകും.

ദിവസത്തിൻ്റെ തുടക്കം വെള്ളം കുടിച്ച് ആകാം

ഉറക്കമുണർന്ന ഉടൻ ഒരു ഗ്ലാസ് വെള്ളം കുടിക്കുന്നത് ശരീരത്തിലെ ജലാംശം നിലനിർത്താനും മെറ്റബോളിസം സജീവമാക്കാനും സഹായിക്കും. പിന്നീട് പോഷകസമൃദ്ധമായ പ്രഭാതഭക്ഷണവും ഉൾപ്പെടുത്തുക.

കുറഞ്ഞത് 30 മിനിറ്റ് വ്യായാമം ചെയ്യുക

ജിം പോകാൻ കഴിയില്ലെങ്കിൽ പോലും നടക്കുക, സൈക്കിൾ ഓടിക്കുക, യോഗ ചെയ്യുക, വീട്ടിൽ ലളിതമായ സ്‌ട്രെച്ചിങ് ചെയ്യുക എന്നിവ ശരീരത്തിന് പുതുമ നൽകും. ഇത് മാനസിക സമ്മർദ്ദവും കുറയ്ക്കും.

ഡിജിറ്റൽ ഡിറ്റോക്സ് പരീക്ഷിക്കുക

വാരാന്ത്യത്തിലെ കുറച്ച് മണിക്കൂറെങ്കിലും മൊബൈൽ ഫോൺ, സോഷ്യൽ മീഡിയ, ലാപ്ടോപ്പ് എന്നിവയിൽ നിന്ന് വിട്ടുനിൽക്കുക. ഈ സമയം കുടുംബത്തോടൊപ്പം ചെലവഴിക്കുകയോ ഒരു പുസ്തകം വായിക്കുകയോ ചെയ്യാം.

അടുത്ത ആഴ്ചയ്ക്കായി പ്ലാൻ തയ്യാറാക്കാം

അടുത്ത ആഴ്ചത്തെക്കുള്ള പ്രധാന ജോലികൾ, മീറ്റിങ്ങുകൾ, വ്യക്തിപരമായ ലക്ഷ്യങ്ങൾ എന്നിവ കുറിച്ചുവയ്ക്കുക. ഇതിലൂടെ തിങ്കളാഴ്ചയുള്ള സമ്മർദ്ദം കുറയ്ക്കാനും സമയം കൂടുതൽ ഫലപ്രദമായി ഉപയോഗിക്കാനും കഴിയും.

ആരോഗ്യകരമായ ഭക്ഷണം ഒരുക്കാം

വീക്കെൻഡിൽ ആരോഗ്യകരമായ വിഭവങ്ങൾ പാകം ചെയ്യുകയും അടുത്ത ദിവസങ്ങൾക്കായി ചിലത് തയ്യാറാക്കി വയ്ക്കുകയും ചെയ്യാം. ഇത് അനാവശ്യമായ ജങ്ക് ഫുഡ് കഴിക്കുന്ന ശീലം കുറയ്ക്കും.

പ്രകൃതിയോടൊപ്പം കുറച്ച് സമയം ചെലവഴിക്കുക

ഒരു പാർക്കിലോ തോട്ടത്തിലോ കടൽത്തീരത്തോ സമയം ചെലവഴിക്കുന്നത് മനസ് ശാന്തമാകാൻ സഹായിക്കും. ശുദ്ധവായുവും സൂര്യപ്രകാശവും ശരീരത്തിനും മനസ്സിനും ഒരുപോലെ ഗുണകരമാണ്.

ഇഷ്ടമുള്ള ഒരു ഹോബി പിന്തുടരുക

ചിത്രരചന, സംഗീതം, പാചകം, ഗാർഡനിങ്, ഫോട്ടോഗ്രാഫി പോലുള്ള ഹോബികൾ മാനസിക സന്തോഷം വർധിപ്പിക്കുകയും സൃഷ്ടിപരമായ ചിന്ത വളർത്തുകയും ചെയ്യും.

വീടും ഡസ്ക്കും ക്രമപ്പെടുത്തുക

മുറിയോ ജോലി ചെയ്യുന്ന ഡസ്ക്കോ വൃത്തിയാക്കുന്നത് മനസ്സിന് ആശ്വാസം നൽകും. ക്രമത്തിലുള്ള അന്തരീക്ഷം കൂടുതൽ ശ്രദ്ധയോടെ ജോലി ചെയ്യാൻ സഹായിക്കുന്നു.

കുടുംബത്തിനും സുഹൃത്തുകൾക്കും സമയം മാറ്റിവയ്ക്കുക

തിരക്കുപിടിച്ച ജീവിതത്തിനിടെ ബന്ധങ്ങൾ ശക്തമാക്കാൻ വീക്കൻഡ് മികച്ച അവസരമാണ്. ഒരുമിച്ച് ഭക്ഷണം കഴിക്കുകയോ ചെറിയ യാത്ര പോകുകയോ വെറുതെ സംസാരിക്കുകയോ ചെയ്യുന്നത് മാനസികാരോഗ്യത്തിന് നല്ലതാണ്.

നല്ല ഉറക്കത്തിന് പ്രാധാന്യം നൽകുക

വീക്കെൻഡിൽ രാത്രി ഏറെ വൈകി ഉറങ്ങുന്ന ശീലം ഒഴിവാക്കുക. മതിയായ ഉറക്കം ശരീരത്തിന്റെ പുനരുജ്ജീവനത്തിനും രോഗപ്രതിരോധശേഷി വർധിപ്പിക്കാനും സഹായിക്കുന്നു.

നന്ദി പറയാനുള്ള ശീലം വളർത്തുക

ആഴ്ചയിൽ സംഭവിച്ച നല്ല കാര്യങ്ങളിൽ മൂന്ന് കാര്യങ്ങളെങ്കിലും കുറിച്ചുവയ്ക്കുക. ഈ ചെറിയ ശീലം പോസിറ്റീവ് ചിന്ത വളർത്താനും മാനസിക സന്തോഷം വർധിപ്പിക്കാനും സഹായിക്കും.

ഒരു പുതിയ കാര്യം പഠിക്കുക

ഓരോ വീക്കൻഡിലും എന്തെങ്കിലും പുതിയത് പഠിക്കാൻ ശ്രമിക്കുക. ഇത് ആത്മവിശ്വാസവും അറിവും വർധിപ്പിക്കും.

മനസ്സിനെ ശാന്തമാക്കാൻ മെഡിറ്റേഷൻ

10 മുതൽ 15 മിനിറ്റ് വരെ മെഡിറ്റേഷനോ ആഴത്തിലുള്ള ശ്വസനവ്യായാമ പരിശീലനമോ ചെയ്യുന്നത് മാനസിക സമ്മർദ്ദം കുറയ്ക്കുകയും ശ്രദ്ധ വർധിപ്പിക്കുകയും ചെയ്യും.

വീക്കൻഡ് ശീലങ്ങൾ പാലിക്കുമ്പോൾ ശ്രദ്ധിക്കേണ്ട കാര്യങ്ങൾ

• എല്ലാ കാര്യങ്ങളും ഒരേസമയം തുടങ്ങാൻ ശ്രമിക്കരുത്.

• എളുപ്പത്തിൽ പാലിക്കാനാകുന്ന രണ്ടോ മൂന്നോ ശീലങ്ങൾ ആദ്യം തിരഞ്ഞെടുക്കുക.

• സ്ഥിരതയാണ് ഏറ്റവും പ്രധാനം.

• വിശ്രമത്തിനും വിനോദത്തിനും വേണ്ട സമയം കൂടി മാറ്റിവയ്ക്കുക.

• റൂട്ടീൻ നിങ്ങളുടെ ജീവിതശൈലിക്ക് അനുസരിച്ച് ക്രമീകരിക്കുക.