ഇഷ്ടപ്പെട്ട വസ്ത്രങ്ങൾ കടയിൽ നിന്ന് വാങ്ങിയ ഉടൻ പുതുമ നഷ്ടപ്പെടാതെ തന്നെ അണിയണമെന്നതാണ് മിക്കയാളുകളുടെയും രീതി. എന്നാൽ അങ്ങനെ പുതിയ വസ്ത്രങ്ങൾ നേരിട്ട് ഉപയോ​ഗിക്കുന്നതിന് പിന്നിൽ ചില അപകടങ്ങൾ ഒളിഞ്ഞിരിപ്പുണ്ടെന്നാണ് വിദ​ഗ്ധർ പറയുന്നത്.

നമ്മളുടെ മനം കവർന്ന വസ്ത്രങ്ങൾ കടകളിലെ വൃത്തിയുള്ള ഷെൽഫിൽ കയറുന്നതിന് മുൻപ് പല ഘട്ടങ്ങളിലായി വിവിധ മെഷീനുകളിലൂടെ കയറിയിറങ്ങി വരുന്ന തുണിത്തരങ്ങളാണ്. ഇതിനിടെ പല തരത്തിലുള്ള രാസ പദാർത്ഥങ്ങളും പൊടിപടലങ്ങളുമായും തുണികൾ സമ്പർക്കപ്പെട്ടേക്കാം. ഇത് ദോഷകരമായ പല രോ​ഗാണുക്കളെയും വഹിക്കാനും കാരണമാകുന്നു.

പുതിയ വസ്ത്രങ്ങൾ നേരിട്ട് ചർമവുമായി സ്പർശിക്കുമ്പോൾ ചർമത്തിലെ ചെറിയ സുഷിരങ്ങളിലൂടെ തണിയിൽ പറ്റിപ്പിടിച്ച രോ​ഗാണുക്കളോ രാസ പദാർത്ഥങ്ങളോ ശരീരത്തിന് ഉള്ളിലേക്ക് പ്രവേശിക്കാം. ഇത് അലർജി, ശ്വാസകോശപ്രശ്‌നങ്ങൾ, ചർമ്മ രോഗങ്ങൾ തുടങ്ങിയ പല അവസ്ഥകൾക്കും കാരണമാകാം.

നാഷണൽ ലൈബ്രറി ഓഫ് മെഡിസിനിൽ പ്രസിദ്ധീകരിച്ച പഠനമനുസരിച്ച്, ചില പുതിയ വസ്ത്രങ്ങളിൽ സ്റ്റാഫൈലോകോക്കസ് ഓറിയസ് പോലുള്ള ബാക്ടീരിയകൾ അടങ്ങിയിരിക്കാം. ഇത് ചർമത്തിൽ അണുബാധകൾക്കും മറ്റ് ആരോഗ്യ പ്രശ്നങ്ങൾക്കും കാരണമാകും.വസ്ത്രങ്ങൾ നിർമ്മിക്കുന്നത് വലിയ ഫാക്ടറികളിലാണ്.

വസ്ത്ര നിർമ്മാതാക്കൾ തുണിയുടെ രൂപം, ഘടന, ഈട് എന്നിവ വർധിപ്പിക്കുന്നതിന് ഉൽ‌പാദന പ്രക്രിയയിൽ വിവിധ രാസവസ്തുക്കൾ ഉപയോഗിക്കാറുണ്ടെന്ന് പറയപ്പെടുന്നു. വസ്ത്രത്തിന്റെ ചുളിവുകൾ തടയാൻ ഫോർമാൽഡിഹൈഡ് പോലെ അലർജി പ്രതിപ്രവർത്തനങ്ങൾക്ക് കാരണമാകുന്ന ചായങ്ങൾ ഉപയോഗിക്കാറുണ്ട്. ഇത് വലിയ ആരോ​ഗ്യപ്രശ്നങ്ങൾക്ക് കാരണമാകും.

പുതിയ വസ്ത്രം ധരിക്കുമ്പോൾ

പുതിയ വസ്ത്രങ്ങൾ വാങ്ങുമ്പോൾ അവ നേരിട്ട് ധരിക്കുന്നതിന് പകരം, അവ സോപ്പ് ഉപയോ​ഗിച്ച് വൃത്തിയായ കഴുകി വെയിലത്തിട്ട് ഉണക്കിയ ശേഷം മാത്രം ധരിക്കുക. കുട്ടികളുടെ വസ്ത്രത്തിന്റെ കാര്യത്തിൽ പ്രത്യേകം ശ്രദ്ധ ഉണ്ടാവണം.