മതിയായ വിശ്രമം പോലും ലഭിക്കാതെ ആരോ​ഗ്യ പ്രവർത്തകർ ഒരു വർഷത്തിലധികമായി കഠിനമായി ജോലി ചെയ്യുകയാണ്. കോവിഡ് പൊട്ടിപ്പുറപ്പെട്ട ശേഷം ശരിക്കൊന്നു വിശ്രമിക്കാൻ പലർക്കും അവസരം കിട്ടിയിട്ടില്ല. 

ഇപ്പോഴിതാ, കിട്ടിയ വിശ്രമ വേളയെ ആനന്ദകരമാക്കിയ രണ്ട് മെഡിക്കൽ വിദ്യാർത്ഥികളുടെ വീഡിയോ വൈറലായി മാറി. 'റാ റാ റാസ്പുടിൻ, ലവർ ഓഫ് ദി റഷ്യൻ ക്വീൻ' എന്ന തകർപ്പൻ ​ഗാനത്തിന് ചുവടു വച്ച് ശ്രദ്ധ നേടുകയാണ് തൃശൂർ മെ‍ഡിക്കൽ കോളജിലെ വിദ്യാർഥികളായ ജാനകിയും നവീനും. 

തങ്ങളുടെ വീഡിയോ ഒരൊറ്റ രാത്രി കൊണ്ട് വൈറലായി മാറിയതിന്റെ ത്രില്ലിലാണ് ഇരുവരും. പാട്ടിന്റെ താളത്തിനൊത്ത് അനായാസ മെയ്വഴക്കത്തോടെ ചുവടുകൾവെക്കുന്ന ഇരുവർക്കും അഭിനന്ദന പ്രവാഹമാണ് സാമൂഹിക മാധ്യമങ്ങളിൽ ലഭിക്കുന്നത്.