ചട്ടീം കലോം ആയാല്‍ തട്ടീം മുട്ടീം ഇരിക്കും എന്ന് പറയുന്നത് പോലെ പങ്കാളികള്‍ക്കിടയില്‍ വഴക്കുകള്‍ വളരെ സ്വാഭാവികമാണ്. വഴക്കുകള്‍ അനാരോഗ്യകരമാണെന്നാണ് പൊതുവിലുള്ള ധാരണം, എന്നാല്‍ ഇതിന് വിപരീതമാണ് യാഥാര്‍ത്ഥ്യം. വഴക്കുകള്‍ രണ്ടുപേരുടെയും കാഴ്ച്ചപാടുകളും അഭിപ്രായങ്ങളും കൂടുതല്‍ വ്യക്തതയോടെ മനസ്സിലാക്കാന്‍ അവസരമൊരുക്കുന്നതിനാല്‍ അവ ആരോഗ്യകരമായ സംഗതിയാണ്. പക്ഷെ, വഴക്ക് ദീര്‍ഘകാലം മനസ്സിലിട്ട് നടന്നാല്‍ കാര്യങ്ങള്‍ കൈവിട്ടുപോകും.
ആരാദ്യം സംസാരിക്കും?
വഴക്കിട്ടാല്‍ പിന്നെ ആരാദ്യം സംസാരിക്കും?, എങ്ങനെ പ്രശ്‌നം തീര്‍ക്കും? തുടങ്ങിയ ചിന്തകളാണ് പ്രശ്‌നങ്ങള്‍ കൂടുതല്‍ നാള്‍ നീട്ടിക്കൊണ്ടുപോകാന്‍ കാരണം. ഞാന്‍ മിണ്ടുമ്പോള്‍ തിരിച്ച് മിണ്ടിയില്ലെങ്കിലോ എന്ന് ചിന്തിച്ചാണ് പലരും സംസാരിക്കാനുള്ള ശ്രമം പോലും വേണ്ടെന്നുവയ്ക്കുന്നത്. എന്നാല്‍, പങ്കാളിയുടെ അടുത്ത് ഇത്തരം ചിന്തകള്‍ക്ക് സ്ഥാനമില്ല. ഒരു വഴക്കുണ്ടായെന്ന് തിരിച്ചറിയുകയും അതേക്കുറിച്ച് സംസാരിക്കാന്‍ തയ്യാറാകുകയുമാണ് ആദ്യം ചെയ്യേണ്ടത്. വഴക്ക് പരിഹരിക്കുന്നതില്‍ നിങ്ങള്‍ക്കുള്ള പങ്ക് മനസ്സിലാക്കുകയും അതനുസരിച്ച് പെരുമാറുകയും വേണം.
സംസാരിക്കുന്നതിനിടെ എതിര്‍വശത്ത് നില്‍ക്കുന്ന വ്യക്തിക്ക് പറയാനുള്ള കാര്യങ്ങള്‍ ശ്രദ്ധയോടെയും സമാധാനത്തോടെയും കേള്‍ക്കാനും ശ്രദ്ധിക്കണം. അവരുടെ കാഴ്ച്ചപ്പാട് മനസ്സിലാക്കാനും കഴിയണം. സംസാരിക്കുമ്പോള്‍ പല കാര്യങ്ങള്‍ പറഞ്ഞ് യഥാര്‍ത്ഥ പ്രശ്‌നത്തില്‍ നിന്ന് ശ്രദ്ധ മാറിപ്പോകാതിരിക്കാനും ശ്രദ്ധിക്കണം. ഇതേ പ്രശ്‌നം വീണ്ടും ആവര്‍ത്തിക്കാതിരിക്കാന്‍ എന്ത് ചെയ്യാമെന്നും ഒന്നിച്ചിരുന്ന് ചര്‍ച്ച ചെയ്യുന്നത് ഗുണകരമാകും. പഴയ കാര്യങ്ങള്‍ വീണ്ടും എടുത്തിടുന്നതിന് പകരം പ്രശ്‌നം പരിഹരിച്ച് മുന്നോട്ട് പോകാന്‍ ശ്രമിക്കണം.
പിണക്കം മാറ്റാന്‍ എന്തുചെയ്യും?
• വഴക്കിട്ടുകഴിയുമ്പോള്‍ എതിര്‍പ്പ് നേരിടേണ്ടിവരുമോ എന്ന ചിന്തയില്‍ സംസാരിക്കാതിരിക്കരുത്. സംസാരിച്ചുകൊണ്ട് മാത്രമേ ഏതൊരു വഴക്കും പരിഹരിക്കാന്‍ കഴിയുകയുള്ളു. പ്രശ്‌നത്തെ രമ്യതയില്‍ പരിഹരിക്കാനും ജീവിതം മെച്ചപ്പെടുത്താനും രണ്ടുപേര്‍ക്കും അനുയോജ്യമായ ഒരു വഴി കണ്ടെത്തിയേ മതിയാകൂ.
• ഒരു വഴക്കുണ്ടായാല്‍ ആദ്യം ചെയ്യേണ്ടത് അവിടെ ഒരു പ്രശ്‌നമുണ്ടെന്ന് സമ്മതിക്കുകയാണ്. അംഗീകരിച്ചുകഴിഞ്ഞാല്‍ പിന്നെ അതേക്കുറിച്ച് സംസാരിക്കാന്‍ തുടങ്ങാം.
• നമുക്ക് പറ്റിയ പിഴവുകള്‍ സ്വയം അംഗീകരിക്കണം. എവിടെയാണ് പിഴവുണ്ടായതെന്ന് മനസ്സിലാക്കുകയും അത് സമ്മതിക്കുകയും ചെയ്താല്‍ കാര്യങ്ങള്‍ കുറച്ചുകൂടി വ്യക്തതയോടെ മനസ്സിലാക്കാന്‍ കഴിയും.
• പലപ്പോഴും പങ്കാളിയുടെ കാഴ്ച്ചപ്പാട് മനസ്സിലാക്കാന്‍ കഴിയാതെവരുമ്പോഴാണ് നമുക്ക് സ്വന്തം തെറ്റ് തിരിച്ചറിയാന്‍ പറ്റാത്തത്. അവരെ അംഗീകരിക്കാന്‍ തയ്യാറാകുകയാണ് ആദ്യം ചെയ്യേണ്ടത്.
• ചിലപ്പോള്‍, ഒരു തലോടലിലൂടെയോ ജോലിയില്‍ നിന്ന് ഇടവേളയെടുത്ത് പങ്കാളിക്കൊപ്പം സമയം ചിലവഴിക്കുന്നതിലൂടെയോ ഒക്കെ പ്രശ്‌നം രമ്യതയില്‍ അവസാനിപ്പിക്കാന്‍ കഴിയും.
ഈ വാർത്ത കൂടി വായിക്കൂ
സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates