തുണി തേക്കാൻ മാത്രമല്ല, ഓംലേറ്റ് ഉണ്ടാക്കാനും ബ്രെഡ് ചൂടാക്കനുമൊക്കെ അയൺബോക്സ് ഉപയോ​ഗിക്കാമെന്നത് ഹോസ്റ്റൽ ജീവികളുടെ കണ്ടുപിടിത്തങ്ങളായിരുന്നു. ഇപ്പോൾ കാലം മാറി, ഇലക്ടിക് കെറ്റിൽ ചിക്കൻ കറിയാണ് ലേറ്റസ്റ്റ്. ഇൻസ്റ്റ​ഗ്രാമിലൂടെ പങ്കുവെച്ച വിഡിയോ വളരെ വേ​ഗമാണ് സോഷ്യൽമീഡിയയുടെ മനം കവർന്നത്.

ഒരു കൂട്ടം വിദ്യർഥിനികളാണ് ഈ പുത്തൻ പരീക്ഷണത്തിന് പിന്നിൽ. ചിക്കൻ കറിക്ക് വേണ്ട സവോളയും ഉരുളക്കിഴങ്ങും ഇഞ്ചിയും മുളകുമെല്ലാം കഴുകി അരിഞ്ഞുവൃത്തിയാക്കി വെച്ച ശേഷം കെറ്റിലിൽ ചിക്കനും വെള്ളവും ഒഴിച്ചു. ശേഷം അരിഞ്ഞു വെച്ച സാധനസാമി​ഗ്രികളും മസാലയും കൂട്ടി ചേർത്തു വേവിച്ചു. അൽപ സമയത്തിനുള്ളിൽ ചിക്കൻക്കറി റെഡി. പിന്നെ സമയം കളഞ്ഞില്ല. എല്ലാവരും വട്ടത്തിലിരുന്ന് കെറ്റിൽ ചിക്കൻ കഴിക്കുന്നതു വരെയാണ് വിഡിയോ.

വിഡിയോ വൈറലായതോടെ നിരവധി ആളുകളാണ് രസകരമായ കമന്റുകളുമായി രം​ഗത്തെത്തുന്നത്. ഇലക്ട്രിക് കെറ്റിലിനെ ഇങ്ങനെയും ഉപയോ​ഗിക്കമെന്ന് അത് ഉണ്ടാക്കിയവർ പോലും ചിന്തിച്ചിട്ടുണ്ടാവില്ലന്നായിരുന്നു ഒരാളുടെ കമന്റ്. ഇത്തരത്തിലെ രസകരമായ ഹോസ്റ്റൽ കഥകൾ അയവിറക്കിയും നിരവധി ആളുകൾ കമന്റുകൾ ചെയ്തു.