കൂർക്ക പ്രേമികളുടെ കാലമാണിത്. സീസൺ തുടങ്ങിയതോടെ കേരളത്തിലെ വഴിയോരങ്ങളിൽ കൂർക്ക വിൽപ്പന തകൃതിയായി നടക്കുകയാണ്. രുചി പോലെ ​പോഷക​ഗുണങ്ങളുടെ കാര്യത്തിലും കൂർക്ക താരമാണ്. എന്നാൽ കൂർക്ക വൃത്തിയാക്കാനുള്ള മെനക്കേട് ഓർക്കുമ്പോഴാണ് പലരും ഒന്ന് മടിക്കുന്നത്. എന്നാൽ ഇനി ആ ടെൻഷൻ വേണ്ട കൂർക്ക നിമിഷങ്ങൾക്കകം വൃത്തിയാക്കിയെടുക്കാം. അതും കറയോ ചെളിയോ കയ്യിൽ പുരളാതെ തന്നെ.

ആദ്യ രീതി

• കൂർക്കയിൽ പറ്റിപ്പിടിച്ചിരിക്കുന്ന മണ്ണും ചെളിയും നീക്കം ചെയ്യുക എന്നതാണ് ആദ്യപടി. അതിനായി കൂർക്ക വെള്ളത്തിൽ നന്നായി കഴുകിയെടുക്കാം.

• ശേഷം ഒരു പ്രഷർ കുക്കറിൽ ആവശ്യത്തിന് വെള്ളം എടുത്ത് കൂർക്ക അതിലിട്ട് ഒന്നോ രണ്ടോ വിസിൽ അടിപ്പിക്കുക (കൂർക്ക ചെറുതാണെങ്കിൽ ഒരു വിസിൽ മതിയാകും).

• കുക്കറിൽ നിന്നു പ്രഷർ പോയ ശേഷം വെള്ളം കളഞ്ഞ് കൂർക്കയുടെ തൊലികളയാം.

• തൊലി കളഞ്ഞ ശേഷം, ആവശ്യാനുസരണം കഷ്ണങ്ങളാക്കി കറിയോ മെഴുക്കുപരുട്ടിയോ വെയ്ക്കാവുന്നതാണ്.

രണ്ടാമത്തെ രീതി

• കൂർക്ക നന്നായി കഴുകി വൃത്തിയാക്കി, മണ്ണെല്ലാം കളഞ്ഞെടുക്കണം.

• ഇനി രണ്ടു മണിക്കൂർ നേരം വെള്ളത്തിൽ കുതിർത്തുവെയ്ക്കാം.

• ശേഷം ഒരു വൃത്തിയുള്ള കോട്ടൺ തുണി എടുക്കുക, അതിലേക്ക് കൂർക്കിട്ട് തുണി മൂടുക

• ശേഷി നന്നായി തിരുമി അല്ലെങ്കിൽ തുണി നിലത്തിട്ട് തല്ലിയെടുക്കാം. കൂർക്കയിൽ നിന്ന് പൂർണമായും തോലി നീങ്ങിയിട്ടുണ്ടാവും.

• അല്ലെങ്കിൽ ഓൺലൈൻ സൈറ്റുകളിൽ വാങ്ങാൻ കിട്ടുന്ന ഗ്ലൗസ് ഉപയോഗിച്ച് അധികം ബലം കൊടുക്കാത്ത കൈകൾ തമ്മിൽ കൂട്ടി ഉരയ്ക്കണം. ഇത് പെട്ടെന്ന് തൊലി മുഴുവനും പോകാൻ സഹായിക്കും.