പോഷകങ്ങളുടെ കലവറയാണ് മധുരക്കിഴങ്ങ്. വിറ്റാമിൻ എ, സി, ബി6, പൊട്ടാസ്യം, ഫൈബർ, ആന്റിഓക്‌സിഡന്റുകൾ എന്നിവ മധുരക്കിഴങ്ങിൽ ധാരാളം അടങ്ങിയിട്ടുണ്ട്. സാധാരണ മധുരക്കിഴങ്ങ് പുഴുങ്ങിയും വറുത്തും കഴിച്ചു ശീലിച്ചവർക്കായി ഒരു പുതിയ റെസിപ്പിയുണ്ട്.

മധുരക്കിഴങ്ങ് ബ്രൗണി.., ശരീരത്തിന് ആവശ്യമായ മാക്രോന്യൂട്രിയൻ്റുകളും നാരുകളും അടങ്ങിയ ഈ ബ്രൗണിയിൽ മൈദയോ എണ്ണയോ ഉപയോഗിച്ചിട്ടില്ല. കുട്ടികൾക്കും മുതിർന്നവർക്കും ധൈര്യമായി ഈ ബ്രൗണികൾ കഴിക്കാം.

ചേരുവകൾ

• വേവിച്ചുടച്ച മധുരക്കിഴങ്ങ് - 1 കപ്പ്

• പീനട്ട് ബട്ടർ (അല്ലെങ്കിൽ ബദാം ബട്ടർ) - 1/2 കപ്പ്

• കൊക്കോ പൗഡർ - 1/2 കപ്പ്

• ബേക്കിങ് സോഡ-1/2 ടീസ്പൂൺ

• ശർക്കരപ്പാനി - 2/3 കപ്പ്

• വാനില എസ്സെൻസ് - 1 ടീസ്പൂൺ

• ഉപ്പ് - ഒരു നുള്ള്

• ചോക്ലേറ്റ് ചിപ്സ് (ഓപ്ഷണൽ)

തയ്യാറാക്കേണ്ട വിധം

• ഒരു പാത്രത്തിൽ വേവിച്ചുടച്ച മധുരക്കിഴങ്ങ്, പീനട്ട് ബട്ടർ, ശർക്കരപ്പാനി, വാനില എസ്സെൻസ് എന്നിവ നന്നായി യോജിപ്പിക്കുക. ഇതിലേക്ക് കൊക്കോ പൗഡറും ബേക്കിങ് സോഡയും ചേർത്ത് കട്ടകെട്ടാതെ ഇളക്കുക.

• ഓവൻ 180°C (350°F) ലേക്ക് പ്രീഹീറ്റ് ചെയ്യുക. ഒരു ബേക്കിംഗ് ട്രേയിൽ ബട്ടർ പേപ്പർ വയ്ക്കുക.

• ബേക്കിങ് ട്രേയിലേക്ക് നേരത്തെ തയ്യാറാക്കി വെച്ചിരിക്കുന്ന മിശ്രിതം ഒഴിച്ച് മുകളിൽ ചോക്ലേറ്റ് ചിപ്സ് അല്ലെങ്കിൽ നട്സ് വിതറുക. 25-30 മിനിറ്റ് ബേക്ക് ചെയ്തെടുക്കാം.

• ഓവനിൽ നിന്നും എടുത്ത് പൂർണ്ണമായും തണുത്ത ശേഷം ചെറിയ കഷ്ണങ്ങളായി മുറിച്ചെടുക്കാം.