പഞ്ചസാര കട്ടപിടിച്ചുപോകുന്നെന്ന പരാതി പല അടുക്കളകളിലും ഉയരാറുണ്ട്. മഴക്കാലത്ത് ഈ പ്രശ്‌നം കുറച്ചധികം അലട്ടാറുണ്ട്. കട്ടപിടിച്ച് കണ്ടയുടന്‍ ഉള്ള പഞ്ചസാര മുഴുവന്‍ കളഞ്ഞ് വേറെ വാങ്ങുക എന്നത് അത്ര എളുപ്പമുള്ള കാര്യമല്ല. അതുകൊണ്ട് ഈ പ്രശ്‌നം എങ്ങനെ മറികടക്കാം എന്ന് നോക്കാം. 

ചപ്പാത്തികോല്‍

ചപ്പാത്തി പരത്താന്‍ ഉപയോഗിക്കുന്ന കോല്‍ ഉപയോഗിച്ച് പഞ്ചസാരയെ രക്ഷപെടുത്തിയെടുക്കാം. ഒരു സിപ്പ്‌ലോക്ക് കവറില്‍ പഞ്ചസാരയെടുത്ത് നന്നായി അടച്ചശേഷം ചപ്പാത്തികോല്‍ ഉപയോഗിച്ച് പരത്തണം. ഇത് പഞ്ചസാരയെ ചെറിയ കഷ്ണങ്ങളാക്കും. അങ്ങനെ ചെയ്തശേഷം മിക്‌സിയില്‍ ഒന്ന് ചെറുതായി അടിച്ചെടുക്കുകയും ചെയ്യാം. 

ഒരു കഷ്ണം ബ്രെഡ്

പഞ്ചസാര ഇട്ടുവയ്ക്കുന്ന പാത്രത്തിലേക്ക് ഒരു കഷ്ണം ബ്രെഡ് കൂടി ഇടുമ്പോഴും കാര്യം നടക്കും. പഞ്ചസാരയ്ക്ക് മുകളിലായി ഒരു കഷ്ണം ബ്രെഡ് വച്ച് പാത്രം നന്നായി അടയ്ക്കുക. കുറച്ച് മണിക്കൂറുകള്‍ക്ക് ശേഷം നോക്കിയാല്‍ പഞ്ചസാര പൂര്‍വ്വാവസ്ഥയില്‍ എത്തിയിട്ടുണ്ടാകും. ഇങ്ങനെ ഒരു രാത്രി മുഴുവന്‍ വയ്ക്കാവുന്നതാണ്. 

ആപ്പിള്‍

ബ്രെഡ് പോലെതന്നെ ആപ്പിള്‍ കഷ്ണങ്ങളും പഞ്ചസാരപാത്രത്തിലെ ഈര്‍പ്പം നീക്കാന്‍ സഹായിക്കും. ആപ്പിള്‍ ചെറിയ കഷ്ണങ്ങളാക്കി മുറിച്ചശേഷം പഞ്ചസാരപാത്രത്തില്‍ ഇട്ട് അടച്ചുവയ്ക്കണം. കുറച്ച് മണിക്കൂറുകള്‍ക്ക് ശേഷം തുറന്നുനോക്കിയാല്‍ പഞ്ചസാരയിലെ കട്ടമാറിക്കിട്ടും.

ടിഷ്യൂ പേപ്പര്‍

കട്ടപിടിച്ചുപോയ പഞ്ചസാരയെ തിരിച്ചുപിടിക്കാന്‍ ടിഷ്യൂ പേപ്പറും സഹായിക്കും. പഞ്ചസാര ഇട്ടുവച്ചിരിക്കുന്ന പാത്രത്തില്‍ ഒരു ടിഷ്യൂപേപ്പര്‍ ഇട്ട് ഒരു രാത്രി നന്നായി അടച്ചുവയ്ക്കണം. പിറ്റേന്ന് രാവിലെ ഈ പേപ്പര്‍ എടുത്തുമാറ്റുമ്പോള്‍ പഞ്ചസാര കട്ടപോയി മൃദുലമായിട്ടുണ്ടാകും. 

മൈക്രോവേവ്

വീട്ടില്‍ മൈക്രോവേവ് ഉള്ളത് നമ്മുടെ പല ജോലികളും എളുപ്പമാക്കും. ഒരു വലിയ പാത്രത്തില്‍ പഞ്ചസാരയെടുത്ത് നേര്‍ത്ത നനവുള്ള തുണി ഉപയോഗിച്ച് മൂടിവച്ചശേഷം കുറച്ചുസമയം മൈക്രോവേവ് ചെയ്യാം. ഒരുപാട് സമയം ഇങ്ങനെ ചെയ്യാതിരിക്കാനും ശ്രദ്ധിക്കണം, പഞ്ചസാര അലിഞ്ഞുപോകും. ഒരു മിനിറ്റ് വച്ചശേഷം കൂടുതല്‍ നേരം വയ്ക്കണമെങ്കില്‍ മാത്രം വീണ്ടും ഇത് ആവര്‍ത്തിക്കാം. 

ഈ വാര്‍ത്ത കൂടി വായിക്കൂ 

‌‌‌'നീ പോയി ആ പാത്രങ്ങൾ കഴുക്‌‌‌', കളിയാക്കിയ വ്യക്തിക്ക് കിടിലൻ മറുപടി നൽകി പെൺകുട്ടി

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ