ആഗോള വിപണിയില്‍ വീണ്ടും വനിലയുടെ പ്രിയവും വിലയും കുതിച്ചുയരുകയാണ്. കൃത്രിമ ഫ്‌ലേവറുകള്‍ക്ക് പകരം പ്രകൃതിദത്ത ഉത്പന്നങ്ങളോടുള്ള ആഗോള താത്പര്യം കൂടിയതും, ഭക്ഷ്യ-സൗന്ദര്യവര്‍ധക വിപണിയിലെ ഉയര്‍ന്ന ഡിമാന്‍ഡുമാണ് വനിലയെ വീണ്ടും കര്‍ഷകരുടെ ശ്രദ്ധാകേന്ദ്രമാക്കുന്നത്. അനുയോജ്യമായ കാലാവസ്ഥയും ശാസ്ത്രീയ പരിചരണവുമുണ്ടെങ്കില്‍ കേരളത്തിലെ കര്‍ഷകര്‍ക്ക് മികച്ച വരുമാനം നേടിത്തരാന്‍ കഴിയുന്ന വിളയാണിത്.
വനിലയുടെ സാധ്യതകള്‍
സ്വാഭാവിക ഉത്പന്നങ്ങളോടുള്ള ഡിമാന്‍ഡ്: ഐസ്‌ക്രീം, ചോക്ലേറ്റ്, ബേക്കറി പലഹാരങ്ങള്‍, ഫാര്‍മസ്യൂട്ടിക്കല്‍സ്, പെര്‍ഫ്യൂം നിര്‍മാണം എന്നിവയില്‍ നാച്ചുറല്‍ വനിലയ്ക്ക് വലിയ വിപണിയുണ്ട്.
ഉയര്‍ന്ന വിപണി മൂല്യം: പ്രോസസ്സ് ചെയ്ത ഉണങ്ങിയ വനില ബീന്‍സിന് മികച്ച വില ലഭിക്കുന്നു. വ്യത്യസ്ത ഗ്രേഡുകളനുസരിച്ച് കിലോയ്ക്ക് 10,000 രൂപ വരെ വിലയുണ്ട്.
ഇടവിളയാക്കാനുള്ള സൗകര്യം: തനിവിളയായി മാത്രമല്ല, കമുക്, തെങ്ങ്, റബ്ബര്‍ തോട്ടങ്ങളില്‍ ഇടവിളയായും കൃഷി ചെയ്യാം.
കൃഷിരീതി
ചൂടും ഈര്‍പ്പവുമുള്ള ഉഷ്ണമേഖലാ കാലാവസ്ഥയാണ് വനിലയ്ക്ക് അനുയോജ്യം. 21 മുതല്‍ 32 ഡിഗ്രി സെല്‍ഷ്യസ് വരെയുള്ള താപനിലയും 75% മുതല്‍ 80% വരെ അന്തരീക്ഷ ഈര്‍പ്പവും വളര്‍ച്ചയ്ക്ക് ഉത്തമമാണ്. ജൈവാംശം കൂടുതലുള്ളതും നല്ല നീര്‍വാര്‍ച്ചയുള്ളതുമായ മണല്‍ കലര്‍ന്ന മണ്ണാണ് ഏറ്റവും മികച്ചത്. വെള്ളക്കെട്ട് ചെടിയെ വേഗത്തില്‍ നശിപ്പിക്കും. വനില ഒരു വള്ളിച്ചെടിയായതിനാല്‍ പടര്‍ന്നു കയറാന്‍ താങ്ങുമരങ്ങള്‍ ആവശ്യമാണ്. ശീമക്കൊന്ന, മുരിക്ക്, കരിവേലം എന്നിവയാണ് ഉത്തമമായ താങ്ങുമരങ്ങള്‍. തൈ നടുന്നതിന് 6 മാസം മുന്‍പെങ്കിലും താങ്ങുമരങ്ങള്‍ നടണം. ഇവ 1.5 മുതല്‍ 2 മീറ്റര്‍ വരെ ഉയരത്തില്‍ നിര്‍ത്തി കൊമ്പുകള്‍ കോതി നിര്‍ത്തുന്നത് വള്ളികള്‍ പടര്‍ത്താനും പൂക്കള്‍ പരാഗണം നടത്താനും എളുപ്പമാക്കും.
രോഗമില്ലാത്ത ആരോഗ്യമുള്ള വള്ളികളില്‍ നിന്നുള്ള തണ്ടുകളാണ് നടാന്‍ ഉപയോഗിക്കുന്നത്. സാധാരണയായി 60-100 സെ.മീ നീളമുള്ള തണ്ടുകള്‍ നടാനായി തിരഞ്ഞെടുക്കാം. കാലവര്‍ഷാരംഭത്തോടെ നടുന്നതാണ് ഉചിതം. തണ്ടിന്റെ അടിഭാഗത്തെ രണ്ടോ മൂന്നോ ഇലകള്‍ നീക്കം ചെയ്ത് ചുവട്ടില്‍ നേരിയ കനത്തില്‍ മണ്ണും കമ്പോസ്റ്റും ഇട്ട് മൂടുക. വള്ളികള്‍ താങ്ങുമരത്തോട് ചേര്‍ത്ത് കെട്ടിക്കൊടുക്കണം. 50% മുതല്‍ 60% വരെ തണല്‍ വാനിലയ്ക്ക് ആവശ്യമാണ്. വേനല്‍ക്കാലത്ത് വെയില്‍ കൂടാതെ ശ്രദ്ധിക്കണം.
വേരുകള്‍ മണ്ണിന് ഉപരിതലത്തിലായതിനാല്‍ ഉണങ്ങിയ ഇലകളും ചപ്പുചവറുകളും ഉപയോഗിച്ച് നല്ലതുപോലെ പുതയിടുന്നത് ഈര്‍പ്പവും ജൈവാംശവും നിലനിര്‍ത്താന്‍ സഹായിക്കും.വള്ളികള്‍ താങ്ങുമരത്തിന്റെ മുകളിലേക്ക് വളരുമ്പോള്‍ അവയെ താഴേക്ക് തൂക്കിയിടണം. ഇത് ചെടിയില്‍ പൂമൊട്ടുകള്‍ ഉണ്ടാകാന്‍ സഹായിക്കും.
പരാഗണം
വാനില കൃഷിയിലെ ഏറ്റവും നിര്‍ണായകമായ ഘട്ടമാണിത്. പ്രകൃതിദത്തമായി വാനിലയില്‍ പരാഗണം നടക്കുന്നത് തുച്ഛമായതിനാല്‍, കര്‍ഷകര്‍ നേരിട്ട് കൈകൊണ്ടാണ് പരാഗണം നടത്തുന്നത്. പൂക്കള്‍ വിരിയുന്ന രാവിലെ 6 മണിക്കും ഉച്ചയ്ക്ക് 12 മണിക്കും ഇടയില്‍ ചെറിയ ഈര്‍ക്കിലോ സൂചിയോ ഉപയോഗിച്ച് പരാഗണം നടത്തണം. ഒരു പൂങ്കുലയില്‍ 10 മുതല്‍ 12 പൂക്കള്‍ വരെ മാത്രം പരാഗണം നടത്തുന്നതാണ് കായ്കള്‍ക്ക് വലിപ്പവും ഗുണമേന്മയും ലഭിക്കാന്‍ നല്ലത്.
വിളവെടുപ്പും സംസ്‌കരണവും
പരാഗണം നടന്ന് 8 മുതല്‍ 9 മാസത്തിനുള്ളില്‍ കായ്കള്‍ വിളവെടുപ്പിന് പാകമാകും. കായയുടെ അഗ്രഭാഗം പച്ച നിറം മാറി നേരിയ മഞ്ഞനിറമാകുമ്പോഴാണ് വിളവെടുക്കേണ്ടത്. വിളവെടുത്ത പച്ചക്കായ്കള്‍ക്ക് സുഗന്ധം ഉണ്ടാകില്ല. ചൂടുവെള്ളത്തില്‍ മുക്കിയെടുക്കല്‍ (Scalding), വിയര്‍പ്പിക്കല്‍ (Sweating), വെയിലില്‍ ഉണക്കല്‍ (Drying), തരംതിരിച്ച് സൂക്ഷിക്കല്‍ (Conditioning) എന്നീ ഘട്ടങ്ങളിലൂടെ സംസ്‌കരിക്കുമ്പോള്‍ മാത്രമാണ് വാനിലയ്ക്ക് സവിശേഷമായ സുഗന്ധവും കറുത്ത നിറവും ലഭിക്കുന്നത്.
ശ്രദ്ധിക്കേണ്ട കാര്യങ്ങള്‍
രോഗബാധ: കുമിള്‍രോഗങ്ങളായ തണ്ട് ചീയലും വേര് ചീയലുമാണ് വാനിലയെ ബാധിക്കുന്ന പ്രധാന വില്ലന്മാര്‍. ബോര്‍ഡോ മിശ്രിതമോ ട്രൈക്കോഡെര്‍മയോ ഉപയോഗിച്ച് തുടക്കത്തിലേ രോഗനിയന്ത്രണം ഉറപ്പാക്കണം.
വിപണി ഏകോപനം: ഉത്പാദിപ്പിക്കുന്ന വാനില കൃത്യമായ രീതിയില്‍ സംസ്‌കരിച്ചെടുക്കാനും, കൂട്ടായ മാര്‍ക്കറ്റിങ് ഉറപ്പാക്കാനും കര്‍ഷക കൂട്ടായ്മകള്‍ രൂപീകരിക്കുന്നത് വിലയിലെ ചാഞ്ചാട്ടം മറികടക്കാന്‍ സഹായിക്കും.
വനില കൃഷി കൃത്യമായ ക്ഷമയും സൂക്ഷ്മ പരിചരണവും ആവശ്യമുള്ള ഒന്നാണ്. ശാസ്ത്രീയ മാര്‍ഗ്ഗങ്ങള്‍ അവലംബിക്കുകയും ഗുണമേന്മയുള്ള ഉത്ന്നം വിപണിയിലെത്തിക്കാന്‍ ശ്രദ്ധിക്കുകയും ചെയ്താല്‍ കര്‍ഷകര്‍ക്ക് മികച്ച നേട്ടം നല്‍കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates