സൈക്കിള്‍ ചവിട്ടുന്നതിനിടയില്‍ അറിയാതെ കോഴിക്കുഞ്ഞിന്റെ പുറത്ത് തട്ടിയതോടെ മിസോറാമുകാരനായ സായ് രംഗ് ഓടിച്ചെന്നത് ആശുപത്രിയിലേക്കാണ്. ഇടിയേറ്റ കോഴിക്കുഞ്ഞ് ഒരു കൈയ്യിലും മറ്റേ കയ്യില്‍ പത്ത് രൂപയുടെ ഒരു നോട്ടും. എങ്ങനെയെങ്കിലും രക്ഷിക്കാമോ എന്നായിരുന്നു ഈ കുഞ്ഞു മിടുക്കന്റെ ചോദ്യം. 

സംഗ എന്നയാള്‍ ഫേസ്ബുക്കില്‍ പങ്കുവച്ച കുഞ്ഞ് സായ് രംഗിന്റെ ചിത്രം ഇതോടെ വൈറലാവുകയായിരുന്നു. ഇത് കണ്ടപ്പോള്‍ ചിരിയും കരച്ചിലും ഒരു പോലെ വന്നുവെന്നായിരുന്നു ചിത്രം പങ്ക് വച്ച് സംഗ പറഞ്ഞത്. 

പത്ത് രൂപയും കയ്യിലുയര്‍ത്തി പേടിച്ചരണ്ട് നില്‍ക്കുന്ന സായ് രംഗിന്റെ ചിത്രം ഇതിനകം 70,000ത്തോളം പേര്‍ പങ്കുവച്ചു കഴിഞ്ഞു. കുട്ടിയുടെ നിഷ്‌കളങ്കതയെയും സഹജീവി സ്‌നേഹത്തെയും നിരവധി പേരാണ് അഭിനന്ദിച്ച് രംഗത്തെത്തിയിരിക്കുന്നത്.