അമ്പരപ്പിക്കുന്ന ചില വീഡിയോകള്‍ സാമൂഹിക മാധ്യമങ്ങളില്‍ വൈറലായി മാറാറുണ്ട്. മനുഷ്യന്റെ സാഹസികമായ ശ്രമങ്ങളുടെ കാഴ്ചകളും ഇത്തരത്തില്‍ വലിയ തോതില്‍ പ്രചരിപ്പിക്കപ്പെടാറുണ്ട്. അത്തരമൊരു അതിസഹാസികമെന്ന് വിശേഷിപ്പിക്കാവുന്ന ഒരു വീഡിയോയാണ് ഇപ്പോള്‍ സാമൂഹിക മാധ്യമങ്ങള്‍ കീഴടക്കുന്നത്. 

കൊലയാളി സ്രാവിന്റെ പുറത്ത് കയറി കൂളായി കടലിലൂടെ യാത്ര ചെയ്യുന്ന മനുഷ്യനാണ് സാമൂഹിക മാധ്യമങ്ങളില്‍ ഇപ്പോള്‍ അമ്പരപ്പ് തീര്‍ക്കുന്നത്. സൗദി അറേബ്യയിലെ യന്‍ബു നഗരത്തിന് സമീപത്തുള്ള ചെങ്കടലില്‍ നിന്നുള്ളതാണ് ഈ ദൃശ്യം. 

ബോട്ടില്‍ കടലിലൂടെ സഞ്ചരിക്കുന്നതിനിടെയാണ് ആ മനുഷ്യന്‍ തന്റെ സാഹസിക പ്രവൃത്തി നടത്തിയത്. ബോട്ടിന്റെ വക്കിലിരുന്ന സഞ്ചരിക്കുന്ന ഇയാള്‍ ഒരു വശത്ത് നിന്ന് സ്രാവ് വരുന്നത് കണ്ട് അതിന്റെ പുറത്തേക്ക് കയറാന്‍ ശ്രമിക്കുന്നു. എന്നാല്‍ അത് വിജയിക്കുന്നില്ല. തൊട്ടടുത്ത നിമിഷം തന്നെ ബോട്ടിന്റെ മറ്റൊരു വശത്ത് രണ്ടാമതൊരു സ്രാവ് വന്നതോടെ ഇയാള്‍ അതിന്റെ പുറത്ത് കയറി കടലിലൂടെ സഞ്ചരിക്കുകയാണ്. ഒപ്പമുള്ളയാളാണ് ഇതെല്ലാം ക്യാമറയില്‍ പകര്‍ത്തിയത്. 

ജീവന്‍ പണയം വച്ചുള്ള പ്രവര്‍ത്തി ചെയ്ത ഇയാളെ സാമൂഹിക മാധ്യമങ്ങളില്‍ പലരും വലിയ തോതിലാണ് വിമര്‍ശിച്ചത്. അയാളുടെ ജീവന്‍ ദൈവം രക്ഷിക്കട്ടെ എന്നായിരുന്നു ഒരാളുടെ കമന്റ്. അറസ്റ്റ് ചെയ്യണമെന്ന് ചിലര്‍ ആവശ്യപ്പെട്ടു.