കലാപരിപാടികൾ സംഘടിപ്പിച്ച് പ്രളയദുരന്തത്തിൽ എല്ലാം തകർന്നിരിക്കുന്നവരെ അൽപം സന്തോഷിപ്പിക്കാനുള്ള ശ്രമങ്ങൾ പല ദുരിതാശ്വാസ ക്യാമ്പുകളിലും കാണാനാകും. ഉള്ളിൽ സങ്കടകടലെരിയുമ്പോഴും ഇത്തരത്തിൽ ചിരിച്ചുനിൽക്കുന്ന മുഖങ്ങൾ സമൂഹമാധ്യമങ്ങളിൽ നിറയുന്നുണ്ട്‌. നിരാശയിൽ കഴിയുന്ന ആളുകളിൽ വീണ്ടും സന്തോഷം തിരിച്ചുകൊണ്ടുവരാൻ വോളണ്ടിയർമാരും അധികൃതരും നടത്തുന്ന പ്രവർത്തനങ്ങളുടെ ഫലമാണ് ആ ചിരികളൊക്കെയും. എന്നാൽ വൈക്കത്തെ തോട്ടകംപള്ളി ക്യാംപിലിരുന്ന് ഡേവിഡേട്ടൻ പാടുമ്പോൾ ആരുടെയും കണ്ണുനിറയും. 

പ്രളയം എല്ലാം കവർന്നെടുത്തതിന്റെ വേദനയിലിരുന്നാണ് ​ഗായകൻ കൂടിയായ ഡേവിഡ് 'ഹൃദയവാഹിനി...' എന്ന സിനിമാ​ഗാനം ആലപിക്കുന്നത്. പെയ്ന്റ പണിക്കാരനായ ഡേവിഡേട്ടന്റെ വീട് പ്രളയത്തിൽ മുങ്ങി. വീട്ടിൽ നിന്ന് വെള്ളം ഇറങ്ങിയിട്ടില്ലാത്തതിനാൽ ക്യാമ്പിൽ നിന്ന് തിരിച്ചുപോകാൻ ഇദ്ദേഹത്തിനായിട്ടില്ല. വെള്ളപ്പൊക്കത്തിൽ കോട്ടയത്തെ പടിഞ്ഞാറൻ മേഖല മുഴുവൻ വെള്ളത്തിനടിയിലാണ്.  ക്യാമ്പിലിരുന്ന് ഇദ്ദേ​ഹം പാടിയ പാട്ടിന്റെ വീഡിയോ സുഹൃത്തുക്കളാണ് ഫേസ്ബുക്കിൽ പോസ്റ്റ് ചെയ്തത്.