ബിലാസ്പുര്‍: ഛത്തീസ്ഗഡ് പബ്ലിക് സര്‍വീസ് കമ്മിഷന്റെ ചീഫ് മുന്‍സിപ്പല്‍ ഓഫീസര്‍ പരീക്ഷയുടെ റിസല്‍റ്റ് വന്നതിന് പിന്നാലെ ഒന്നും രണ്ടും റാങ്കുകള്‍ നേടിയവരാണ് കൗതുകം തീര്‍ക്കുന്നത്. ഒന്നാം റാങ്ക് ഭര്‍ത്താവിനും, രണ്ടാം റാങ്ക് ഭാര്യയ്ക്കും എന്നത് തന്നെ കാര്യം. 

അനുഭവ് സിങ്, ഭാര്യ വിഭ സിങ് എന്നിവരാണ് വാര്‍ത്തകളില്‍ നിറയുന്നത്. 11 വര്‍ഷം മുന്‍പാണ് ഇവര്‍ ആദ്യം കാണുന്നത്. അതും പിഎസ് സി പഠന കൂട്ടായ്മയില്‍ തന്നെ. പ്രണയം വിവാഹത്തിലേക്ക് എത്തിയതിന് ശേഷവും ഇവരുടെ പിഎസ് സി പഠനത്തില്‍ മാറ്റമൊന്നുമുണ്ടായില്ല. 298.3744 മാര്‍ക്ക് നേടിയാണ് അനുഭവ് ഒന്നാം റാങ്ക് നേടിയത്. 283.91 മാര്‍ക്കാണ് വിഭയ്ക്ക് ലഭിച്ചത്.

വീട്ടുകാര്യം സംസാരിക്കുന്നതിനേക്കാള്‍ കൂടുതല്‍ പരീക്ഷാ കാര്യങ്ങളാണ് തങ്ങള്‍ക്കിടയിലേക്ക് കടന്നു വന്നിരുന്നതെന്ന് അനുഭവ് പറയുന്നു. ഗ്രാമ വികസന വകുപ്പില്‍ അസിസ്റ്റന്റ് ഡവലപ്പ്‌മെന്റ് ഓഫീസറായി ജോലി നോക്കുകയാണ് കഴിഞ്ഞ 7 വര്‍ഷമായി വിഭ.