കാത്തുസൂക്ഷിച്ച തോട്ടത്തിലെ തെങ്ങും കവുങ്ങും കൺമുന്നിൽ കരിഞ്ഞുണങ്ങുന്നത് നോക്കിനിൽക്കേണ്ടി വരുന്ന ഒരു കർഷകന്റെ സങ്കടം വാക്കുകൾക്ക് അപ്പുറമാണ്. കാസർകോട് ജില്ലയിലെ ഉൾനാടൻ ഗ്രാമങ്ങളിൽ ഇന്ന് ഇത്തരം നൂറുകണക്കിന് കാഴ്ചകളുണ്ട്. ഭൂമിക്കടിയിൽ സമൃദ്ധമായ ജലമുണ്ടെന്ന് ജിയോളജിസ്റ്റ് ഉറപ്പുനൽകിയിട്ടും, അത് പുറത്തെത്തിക്കാൻ ഒരു യന്ത്രമില്ലാത്തതിനാൽ മാത്രം വറുതിയിലായ ഒരു ജനതയുടെ കഥയാണിത്. ഭൂജലവകുപ്പിന്റെ കനിവിനായി കാത്തിരുന്ന് മാസങ്ങൾ തള്ളിനീക്കിയ കർഷകർക്ക് മുന്നിൽ അധികൃതർ ഇപ്പോഴും 'സാങ്കേതിക തടസ്സങ്ങൾ' നിരത്തുകയാണ്.

സർക്കാർ കനിഞ്ഞില്ല; സ്വകാര്യ ഏജൻസികൾക്ക് താങ്ങാനാവാത്ത തുക

സ്വന്തം പറമ്പിൽ ഒരു കുഴൽക്കിണർ എന്നത് പലർക്കും ആഡംബരമല്ല, അതിജീവനത്തിന്റെ മാർഗ്ഗമാണ്. കൃഷി ആവശ്യങ്ങൾക്കായി സർക്കാർ നൽകുന്ന വലിയ സബ്‌സിഡി (മീറ്ററിന് പകുതി നിരക്ക്) കണ്ടാണ് പലരും ആകെയുള്ള സമ്പാദ്യം സ്വരൂപിച്ച് വകുപ്പിൽ പണമടച്ചത്. എന്നാൽ ജില്ലയിലുണ്ടായിരുന്ന പഴയ റിഗ്ഗ് കാലാവധി കഴിഞ്ഞ് 'ആക്രി'യായി വിറ്റതോടെ ഈ മേഖലയിലെ പ്രവൃത്തികൾ പൂർണ്ണമായും സ്തംഭിച്ചു. നിലവിൽ സ്വകാര്യ ഏജൻസികളെ സമീപിച്ചാൽ സർക്കാർ നിരക്കിന്റെ ഇരട്ടിയിലധികം പണം നൽകണം. കർഷകന്റെ ഗതികേട് മുതലെടുത്ത് ചില ഏജൻസികൾ വലിയ തുക ഈടാക്കുമ്പോൾ, അർഹമായ സർക്കാർ സേവനത്തിനായി 16 മാസമായി കാത്തുനിൽക്കുന്നവർ പോലും ജില്ലയിലുണ്ട്.

തിരുവനന്തപുരത്തെ 'തടവറ'യിൽ പുതിയ യന്ത്രങ്ങൾ

വിരോധാഭാസമെന്നു പറയട്ടെ, കാസർകോട് ഉൾപ്പെടെയുള്ള ജില്ലകൾക്കായി കോടികൾ ചെലവഴിച്ച് സർക്കാർ വാങ്ങിയ പുതിയ അഞ്ച് റിഗ്ഗുകൾ തിരുവനന്തപുരത്ത് എത്തിയിട്ട. ഫെബ്രുവരിയിൽ ഇവ കാസർകോട്ടേക്ക് എത്തുമെന്ന് അധികൃതർ ഉറപ്പുനൽകിയിരുന്നെങ്കിലും മെയ് മാസമായിട്ടും അവ വടക്കേ അറ്റത്തെ ഈ ജില്ലയിലേക്ക് എത്തിയിട്ടില്ല. മറ്റു പല ജില്ലകളിലും സർക്കാർ പദ്ധതികൾ സ്വകാര്യ കരാറുകാർ വഴി നടക്കുമ്പോൾ, സബ്‌സിഡിക്ക് അർഹരായ സാധാരണ കർഷകർ മാത്രം വരിക്ക് പുറത്തായിപ്പോകുന്നു. ഈ മെല്ലെപ്പോക്ക് ഓരോ ദിവസവും കർഷകന്റെ വിയർപ്പിനെ ചാരമാക്കുകയാണ്.