വടക്കഞ്ചേരി: വടക്കഞ്ചേരി-മണ്ണുത്തി ദേശീയപാതയിൽ അഞ്ച് കാറുകൾ ഒന്നിനുപുറകെ ഒന്നായി കൂട്ടിയിടിച്ച് അപകടം. പന്തലാംപാടം പെട്രോൾ പമ്പിന് സമീപത്ത് ബുധനാഴ്ച ഉച്ചയ്ക്ക് 12 മണിയോടെയായിരുന്നു സംഭവം. അപകടത്തിൽ ഒരു കാർ ഡ്രൈവർക്ക് പരിക്കേറ്റു.ദേശീയപാതയിലെ ഡിവൈഡറുകളിൽ വളർന്നുനിൽക്കുന്ന പുല്ലുകൾ വെട്ടിമാറ്റുന്ന ജോലികൾക്കായി ട്രാക്കിൽ മുന്നറിയിപ്പ് ബാരിക്കേഡുകൾ സ്ഥാപിച്ചിരുന്നു. ഈ സമയത്ത് തൃശൂർ ഭാഗത്തുനിന്ന് പാലക്കാട് ദിശയിലേക്ക് അമിതവേഗത്തിലെത്തിയ ഒരു കാർ റോഡിൽ വെച്ചിരുന്ന ബാരിക്കേഡ് കണ്ട് പെട്ടെന്ന് വേഗത കുറച്ച് ബ്രേക്കിട്ടു. ഈ കാറിലേക്ക് പിന്നാലെ വന്ന കാറുകൾ ഇടിച്ചുകയറുകയായിരുന്നു.

കാറുകളുടെ മുൻഭാഗവും പിൻഭാഗവും അപകടത്തിൽ സാരമായി തകർന്നു. ഏറ്റവും പിന്നിലുണ്ടായിരുന്ന കാറിലെ ഡ്രൈവർക്കാണ് അപകടത്തിൽ പരിക്കേറ്റത്. നിസ്സാര പരിക്കുകളോടെ ഇയാളെ ഉടൻതന്നെ സമീപത്തെ ഇരട്ടക്കുളത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു.