തൃശൂര്‍: ഉടമയുടെ കൈയ്യില്‍ നിന്ന് കുതറി ഓടിയ കുതിര ചെറുതുരുത്തിയില്‍ ഭീതി പരത്തി. ചെറുതുരുത്തി കൊച്ചിന്‍ പാലം മുതല്‍ ചെറുതുരുത്തി ടൗണിലൂടെ നെടുമ്പര വരെയാണ് കുതിര ഓടിയത്. വാഹനങ്ങള്‍ തകര്‍ത്തു ഓടിയ കുതിര വഴി യാത്രക്കാരനെയും പരിക്കേല്‍പ്പിച്ചു.

നെടുമ്പര സ്വദേശിയുടെ കുതിരയാണ് ചെറുതുരുത്തിയില്‍ ഭീതി പരത്തിയത്. കുതിര ജനങ്ങളുടെയും വാഹനങ്ങളുടെയും ഇടയിലൂടെ അതിവേഗത്തില്‍ ഓടി. ഇതിനിടെ വഴിയാത്രക്കാര്‍ക്കും വാഹനങ്ങള്‍ക്കും ഇരുചക്ര വാഹന യാത്രക്കാര്‍ക്കും പരിക്കേറ്റു.

നെടുമ്പര ഭാഗത്തേക്ക് ആറ്റൂരില്‍ നിന്നും പോവുകയായിരുന്ന ആറ്റൂര്‍ മനപ്പടി നരവം കുന്നത്ത് വീട്ടില്‍ രതീഷിന് (35) കുതിരയുടെ ആക്രമണത്തില്‍ പരിക്കേറ്റു. റോഡരികില്‍ പാര്‍ക്ക് ചെയ്തിരുന്ന ചേലക്കര പങ്ങാരപ്പിള്ളി സ്വദേശി മോഹനന്റെ ഓട്ടോടാക്‌സി തകര്‍ത്തു. ചെറുതുരുത്തി എസ് ഐ ജമാലുദ്ദീന്റെ നേതൃത്വത്തിലുള്ള പൊലീസ് സംഘം സ്ഥലത്തെത്തിയാണ് കുതിരയെ പിടിച്ചു കെട്ടിയത്.