മലയാളികളുടെ ഇഷ്ട താരമാണ് നടി മിയ. കുഞ്ഞ് ജനിച്ചതോടെ അഭിനയത്തിൽ നിന്ന് ചെറിയ ഇടവേളയെടുത്തിരിക്കുകയാണ് താരം. എങ്കിലും സോഷ്യൽ മീഡിയയിലൂടെ തന്റെ വിശേഷങ്ങളെല്ലാം താരം പങ്കുവയ്ക്കാറുണ്ട്. ഇപ്പോൾ ആരാധകരുടെ മനം കവരുന്നത് താരത്തിന്റെ പുതിയ വിഡിയോ ആണ്. മകന് പാട്ടുപാടി കൊടുക്കുന്ന മിയയെയാണ് വിഡിയോയിൽ കാണുന്നത്. 

അമ്മയും മകനും വൈറൽ

സൂഫിയും സുജാതയും എന്ന ചിത്രത്തിലെ പ്രശസ്തമായ വാതിൽക്കല് വെള്ളരിപ്രാവ് എന്ന ​ഗാനമാണ് മകൻ ലൂക്കയ്ക്കുവേണ്ടി മിയ പാടുന്നത്. മകനൊപ്പം കിടന്നുകൊണ്ട് സെൽഫി കാമറയിലാണ് താരം വിഡിയോ പകർത്തിയിരിക്കുന്നത്. മിയയുടെ പാട്ട് കേട്ട് മനോഹരമായി ചിരിക്കുന്ന ലൂക്കയെയാണ് വിഡിയോയിൽ കാണുന്നത്. ലൂക്ക എന്ന അടിക്കുറിപ്പിലാണ് താരം വിഡിയോ പങ്കുവച്ചത്. 

മിയയുടേയും അശ്വിന്റേയും ലൂക്ക

ആരാധകരുടെ മനം കവരുകയാണ് മിയയുടെ പാട്ടു ലൂക്കയുടെ ചിരിയും. താരത്തിന്റെ പാട്ടിനെ പുകഴ്ത്തി നിരവധി പേരാണ് കമന്റ് ചെയ്യുന്നത്. 2020 സെപ്റ്റംബർ 12നായിരുന്നു മിയയും ബിസിനസ്സുകാരനായ അശ്വിനും തമ്മിലുള്ള വിവാഹം. മകൻ ജനിച്ചതിന് പിന്നാലെ ഇരുവരും ഒന്നാം വിവാഹം ആഘോഷിച്ചിരുന്നു.

റെഡ് വൈൻ, അനാർക്കലി, മെമ്മറീസ്, വിശുദ്ധൻ, പാവാട, ബോബി, പട്ടാഭിരാമൻ, ബ്രദേഴ്‌സ് ഡേ, അൽമല്ലു, തുടങ്ങിയ നിരവധി മലയാള സിനിമകളിലും തെലുങ്കിലും താരം അഭിനയിച്ചിട്ടുണ്ട്.പൃഥ്വിരാജ് നായകനായ ഡ്രൈവിങ് ലൈസൻസ്‌ ആണ് മിയയുടെ ഏറ്റവും ഒടുവിൽ റിലീസായ സിനിമ.