ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് രാജീവ് രവി സംവിധാനം ചെയ്യുന്ന നിവിന്‍ പോളി നായകനാകുന്ന തുറമുഖം. പലകുറി റിലീസ് മാറ്റിവെക്കപ്പെട്ട ചിത്രം എന്ന് റിലീസിനെത്തുമെന്ന് ഇനിയും വ്യക്തമല്ല. ഇപ്പോഴിതാ തുറമുഖത്തിനായി കാത്തിരിക്കന്ന പ്രേക്ഷകർക്ക് പ്രതീക്ഷയേകുന്ന ഒരു വാർത്തയാണ് നിവിൻ പങ്കുവച്ചത്. ചിത്രം നവംബര്‍- ഡിസംബര്‍ കാലയളവില്‍ എത്തിയേക്കും എന്നാണ് താരം അറിയിച്ചിരിക്കുന്നത്. 

നിവിന്റെ പുതിയ സിനിമയായ സാറ്റർഡേ നൈറ്റ്സ് റിലീസുമായി ബന്ധപ്പെട്ട പരിപാടിക്കെത്തിയപ്പോഴാണ് താരം തുറമുഖത്തെക്കുറിച്ച് സംസാരിച്ചത്. ഒരു ആരാധകന്‍റെ ചോദ്യത്തിന് മറുപടിയായാണ് നിവിൻ ഇത് പറഞ്ഞത്. "തുറമുഖം എന്‍റെ പോക്കറ്റിലല്ല ഇരിക്കണെ. ആ സിനിമ ഇറങ്ങണമെന്ന് നിങ്ങളെപ്പോലെതന്നെ ആ​ഗ്രഹിക്കുന്ന ഒരാളാണ് ഞാന്‍. അതിന്‍റെ നിര്‍മ്മാതാവിന്‍റെ ചില സാമ്പത്തിക പ്രശ്നങ്ങള്‍ എല്ലാം കാരണം അത് ഇത്തിരി പ്രശ്നത്തില്‍ ഇരിക്കുകയാണ്. അത് നവംബര്‍- ഡിസംബറില്‍ റിലീസ് ആവുമെന്നാണ് കേള്‍വി", നിവിൻ പറഞ്ഞു. 

നിർമാതാവ് ലിസ്റ്റിന്‍ സ്റ്റീഫന്‍ ആണ് സിനിമ റിലീസിനുവേണ്ടി എടുക്കുന്നതെന്നും അതുകൊണ്ട് അത് റിലീസ് ആകുമെന്നാണ് വിശ്വസിക്കുന്നതെന്നും നിവിൻ പറഞ്ഞു. നിവിന് പുറമേ ‌ഇന്ദ്രജിത്ത് സുകുമാരൻ, ജോജു ജോർജ്, അർജ്ജുൻ അശോകൻ, സുദേവ് നായർ, മണികണ്ഠൻ ആചാരി, നിമിഷ സജയൻ, പൂർണിമ ഇന്ദ്രജിത്ത്, ദർശന രാജേന്ദ്രൻ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

ഈ വാര്‍ത്ത കൂടി വായിക്കൂ 

"എനിക്കിതിലും വലിയ ഒരു നേട്ടം നേടാനാകുമോയെന്നറിയില്ല"; ശബ്ദം ഇടറി ജോജു

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ