വിവാഹമോചനം സംബന്ധിച്ച വൈകാരിക കുറിപ്പ് പങ്കുവച്ച് നടി അപര്‍ണ വിനോദ്. രണ്ടു വർഷത്തെ ദാമ്പത്യ ജീവിതം അവസാനിപ്പിച്ചുവെന്നാണ് നടി വെളിപ്പെടുത്തിയിരിക്കുന്നത്. ഇൻസ്റ്റ​ഗ്രാം സ്റ്റോറിയിലൂടെയാണ് ജീവിതത്തിലെ സുപ്രധാന തീരുമാനത്തെക്കുറിച്ച് അപർണ വിനോദ് അറിയിച്ചത്. വിവാഹമോചനമെന്നത് എളുപ്പമുള്ള തിരഞ്ഞെടുപ്പായിരുന്നില്ലെന്നും ജീവിതത്തിൽ മുന്നോട്ടു പോകുന്നതിനായാണ് ഈ തീരുമാനമെടുത്തതെന്നും അവർ വ്യക്തമാക്കി.

‘‘ജീവിതത്തിലെ വലിയൊരു മാറ്റത്തിന്റെ ഘട്ടത്തിലൂടെ ഞാൻ കടന്നുപോകുന്ന കാര്യം നിങ്ങളെ അറിയിക്കുകയാണ്. വളരെയധികം ആലോചിച്ച ശേഷം എന്റെ വിവാഹബന്ധം അവസാനിപ്പിക്കാൻ ഞാൻ തീരുമാനിച്ചു, ഇത് എളുപ്പമുള്ള തിരഞ്ഞെടുപ്പായിരുന്നില്ല, പക്ഷേ മുന്നോട്ടു വളരാനും എന്നിലെ മുറിവുകൾ സുഖപ്പെടാനും ഇത് ശരിയായ ഒന്നാണെന്ന് ഞാൻ വിശ്വസിക്കുന്നു.

എന്റെ വിവാഹം, ജീവിതത്തെ തന്നെ വൈകാരികമായ തളർച്ചയ്ക്കു വഴിവയ്ക്കുന്ന ഏറെ ബുദ്ധിമുട്ടേറിയ ഒരു ഘട്ടമായിരുന്നു. അതിനാൽ ജീവിതത്തിൽ ഇനി മുന്നോട്ട് പോകുന്നതിനായി ഞാൻ ആ അധ്യായം അടച്ചു. ഈ സമയത്ത് എനിക്ക് ലഭിച്ച സ്നേഹത്തിനും പിന്തുണയ്ക്കും ഞാൻ നന്ദിയുള്ളവളാണ്. ഇനി മുമ്പോട്ടുള്ള യാത്ര പ്രതീക്ഷയോടെയും പോസിറ്റീവോടെയും സ്വീകരിക്കാൻ ഞാൻ ആഗ്രഹിക്കുന്നു.’’–അപർണ കുറിച്ചു.

'അസംബന്ധം നിർത്തൂ'! കെട്ടിച്ചമച്ച വാർത്തകൾ നീക്കം ചെയ്തില്ലെങ്കിൽ നിയമനടപടി; കടുപ്പിച്ച് തബു

2023 ലായിരുന്നു റിനിൽ രാജുമായുള്ള അപർണയുടെ വിവാഹം. 2015ൽ പുറത്തിറങ്ങിയ ഞാൻ നിന്നോട് കൂടെയാണ് എന്ന സിനിമയിലൂടെ അപർണ അഭിനയരംഗത്തെത്തി. ആസിഫ് അലിയുടെ കോഹിനൂരിലാണ് ആദ്യമായി നായികയാകുന്നത്. വിജയ് ചിത്രം ഭൈരവിയിലൂടെ തമിഴിലും അരങ്ങേറ്റം കുറിച്ചു. 2021ൽ റിലീസ് ചെയ്ത നടുവൻ എന്ന ചിത്രത്തിലാണ് അപർണ അവസാനം പ്രത്യക്ഷപ്പെട്ടത്.