മലയാളികൾക്ക് സുപരിചിതയാണ് ബോളിവുഡ് നടി യാമി ഗൗതം. ഉറി, വിക്കിഡോണർ തുടങ്ങിയ ചിത്രങ്ങളിൽ നായികയായി തിളങ്ങിയ നടി പൃഥ്വിരാജ് ചിത്രം ഹീറോയിലൂടെയാണ് മലയാളത്തിൽ ശ്ര​ദ്ധനേടിയത്. ചെറിയ സൗന്ദര്യ പ്രശ്നങ്ങൾ പോലും  പുറത്തറിയാക്കാതെ രഹസ്യമായി സൂക്ഷിക്കാൻ ശ്രമിക്കുന്നവർക്കിടയിൽ വ്യത്യസ്തയാണ് നടി യാമി. കെരാട്ടോസിസ് പിലാരിസ് എന്ന ചർമ രോഗം തനിക്കുണ്ടെന്നാണ് സമൂഹ മാധ്യമങ്ങളിലൂടെ നടി തുറന്നുപറഞ്ഞത്.

എഡിറ്റ് ചെയ്യാത്ത ചില ചിത്രങ്ങൾ പങ്കുവച്ചുകൊണ്ടാണ് യാമി തന്റെ അസുഖത്തെക്കുറിച്ച് വിശദീകരിച്ചത്.  തൊലി പുറത്ത് തിണർപ്പും മുഖക്കുരു പോലത്തെ ചെറിയ കുരുക്കളും ഉണ്ടാക്കുന്ന ചർമരോഗമാണ് കെരാട്ടോസിസ് പിലാരിസ്. കൗമാരകാലത്താണ് തനിക്ക് ഈ അസുഖം പിടിപെട്ടതെന്നും ഇതിന് ‌ചിക്തിസ ഇല്ലെന്നും നടി കുറിച്ചു‌. 

ഞാനിത് വർഷങ്ങളായി നേരിടുന്ന ഒന്നാണ്. എന്റെ പേടിയും ഇൻസെക്യൂരിറ്റീസും തരണം ചെയ്ത് ഈ അവസ്ഥയെ സ്‌നേഹിക്കാനും അംഗീകരിക്കാനും ഞാൻ തീരുമാനിച്ചു. എന്റെ സത്യം നിങ്ങളോട് തുറന്നുപറയാനുള്ള ധൈര്യവും ഞാൻ കണ്ടെത്തി, ചിത്രങ്ങൾക്കൊപ്പം യാമി കുറിച്ചു.