മലയാളികളുടെ പ്രിയപ്പെട്ട യുവതാരങ്ങളാണ് അർജുൻ‌ അശോകനും ബേസിൽ ജോസഫും. ഇരുവരും ഒന്നിച്ചെത്തിയ ജാൻ എ മൻ എന്ന ചിത്രത്തിനും വൻ സ്വീകാര്യതയാണ് ലഭിച്ചത്. ചിദംബരം ഒരുക്കിയ സിനിമയ്ക്ക് മികച്ച പ്രതികരണം ആയിരുന്നു ലഭിച്ചത്.

ചിത്രത്തിലെ ഒരു രംഗത്തിൽ എയർപോർട്ടിൽ നിന്ന് വരുന്ന ബേസിൽ ജോസഫ് കയ്യിലിരുന്ന ട്രോളി കൊണ്ട് അർജുൻ അശോകന്റെ കാറിടിലിക്കുന്ന ഒരു രംഗമുണ്ട്. ഈ സീനിനെക്കുറിച്ച് മനസു തുറക്കുകയാണ് അർജുൻ അശോകൻ ഇപ്പോൾ. രേഖ മേനോന് നൽകിയ അഭിമുഖത്തിലാണ് അർജുൻ അശോകൻ ഈ സീനിനെക്കുറിച്ച് തുറന്നു പറഞ്ഞത്.

ആ സീൻ പ്ലാൻ ചെയ്തത് അല്ലായിരുന്നുവെന്നും ആ ഞെട്ടൽ തന്റെ ഉള്ളിൽ നിന്ന് വന്നതാണെന്നും അർജുൻ അശോകൻ പറഞ്ഞു. "ജാൻ എ മനിൽ ഉപയോഗിച്ചിരിക്കുന്നത് എന്റെ സ്വന്തം വണ്ടിയാണ്. ട്രോളി കൊണ്ടുവന്നു വണ്ടിയിൽ ഇടിക്കുമെന്ന് എന്നോട് പറഞ്ഞില്ല. ഒന്നാമത് ഞാൻ ബോണറ്റിന്റെ മുകളിൽ കാമറ വെച്ചിട്ട് അത് ചളുങ്ങിയതിന്റെ ദേഷ്യത്തിൽ ഇരിക്കുകയാണ്.

അച്ഛന്റെ വണ്ടി ആയിരുന്നു ആ ബിഎംഡബ്ല്യൂ. ഇതുവരെ അച്ഛനോട് അത് പറഞ്ഞിട്ടില്ല. ടയറിലാകും മുട്ടിക്കുന്നത് ഒരു റിയാക്ഷൻ കൊടുക്കണേ എന്നേ എന്നോട് പറഞ്ഞിരുന്നുള്ളൂ. പക്ഷേ ബേസിലേട്ടൻ ട്രോളി കൊണ്ട് ഒറ്റ ഇടി, ഞാൻ ഞെട്ടിപ്പോയി. എന്റെ ഉള്ളിൽ നിന്ന് വന്ന ഞെട്ടലാണ് അത്",- അർജുൻ പറഞ്ഞു.

2021 ലാണ് ജാൻ എ മൻ തിയറ്ററുകളിലെത്തിയത്. വലിയ താരങ്ങളില്ലാതെ എത്തിയ ചിത്രം തിയറ്ററുകളില്‍ വലിയ വിജയമാണ് സ്വന്തമാക്കിയത്. ബേസില്‍ ജോസഫ്, അർജുൻ അശോകന്‍, ബാലു വര്‍​ഗീസ്, ഗണപതി തുടങ്ങി വലിയ താരനിര തന്നെ സിനിമയിൽ അണിനിരന്നു. ചിദംബരം, ഗണപതി, സ്വപ്നേഷ് വരച്ചാൽ എന്നിവർ ചേർന്നാണ് സിനിമയ്ക്ക് തിരക്കഥ ഒരുക്കിയത്. ലക്ഷ്മി വാര്യർ, ഗണേഷ് മേനോൻ, സജിത്ത് കൂക്കൽ, ഷോൺ ആൻ്റണി എന്നിവർ ചേർന്നാണ് സിനിമ നിർമിച്ചത്.