ചെകുത്താൻ എന്ന് അറിയപ്പെടുന്ന യൂട്യൂബറുടെ വീട്ടിൽ അതിക്രമിച്ചു കയറി ഭീഷണിപ്പെടുത്തിയെന്ന ആരോപണത്തിൽ മറുപടിയുമായി നടൻ ബാല. ചെകുത്താന്റെ വീട്ടിൽ നിന്നുള്ള വിഡിയോ ആണ് ബാല പോസ്റ്റ് ചെയ്തത്. തോക്കെടുത്ത് ഭീഷണിപ്പെടുത്തുകയോ റൂം അടിച്ചു തകർക്കുകയോ ചെയ്തിട്ടില്ലെന്നും ബാല പറഞ്ഞു. യൂട്യൂബറുടെ സുഹൃത്തിനോട് സംസാരിക്കുന്നതാണ് വിഡിയോയിലുള്ളത്. 

 ‘മിസ്റ്റർ ചെകുത്താൻ, നിങ്ങളുടെ വീട്ടിൽ വന്ന് ഞാൻ തോക്കെടുത്തെന്നും അടിച്ചു തകർത്തു എന്നെല്ലാം പറഞ്ഞില്ലേ. നിങ്ങള്‍ പൊലീസ് സ്റ്റേഷനില്‍ പോകും എന്ന് അറിഞ്ഞ് തന്നെയാണ് ഞാൻ ഈ വിഡിയോ എടുത്തത്. എന്താണ് ഞാൻ സംസാരിച്ചതെന്ന് കാണിച്ചു തരട്ടെ. നിന്റെ സ്വഭാവം എന്താണെന്ന് മനുഷ്യന്മാർക്ക് മനസിലാകും.  ചെറിയ കുട്ടികളെ ഓര്‍ത്ത് നിങ്ങളുടെ നാവ് കുറച്ച് കുറയ്ക്കൂ. ഇത് മുന്നറിയിപ്പ് അല്ല, തീരുമാനമാണ്.’ എന്നാണ് ബാല വിഡിയോയില്‍ പറയുന്നത്.

അജു അലക്സിന്റെ സുഹൃത്തിനോട് ബാല സംസാരിക്കുന്നതാണ് വിഡിയോയിലുള്ളത്. വിമര്‍ശിക്കാന്‍ ആര്‍ക്കും സ്വാതന്ത്ര്യമുണ്ടെന്നും എന്നാല്‍ ചീത്ത വാക്കുകള്‍ ഉപയോ​ഗിക്കാന്‍ പാടില്ലെന്നാണ് ബാല അയാളോട് പറയുന്നത്. ഒരു ഓരോരുത്തരുടേയും സ്വാതന്ത്ര്യമാണെന്നും അതിൽ തനിക്ക് എന്ത് ചെയ്യാൻ പറ്റും എന്നുമാണ് സുഹൃത്ത് ചോദിച്ചത്. ഇതോടെ നിർത്തിക്കോളാൻ പറയണമെന്നാണ് ബാല പറഞ്ഞത്. 

നടൻ ബാല തോക്കുമായി വീട്ടിൽ അതിക്രമിച്ചു കയറി അക്രമം നടത്തിയെന്നാണ് യൂട്യൂബർ ചെകുത്താന്റെ പരാതി. അജു അലക്സ് താമസിക്കുന്ന ഫ്ളാറ്റിൽ എത്തി നടൻ ഭീഷണി മുഴക്കുകയായിരുന്നു. ആറാട്ടണ്ണന്‍ എന്ന് അറിയപ്പെടുന്ന സന്തോഷ് വര്‍ക്കിയും രണ്ട് ​ഗുണ്ടകളും താരത്തിനൊപ്പമുണ്ടായിരുന്നെന്നും പരാതിയിൽ പറയുന്നു. കഴിഞ്ഞ ദിവസം ബാലയ്ക്കെതിരെ താൻ ചെയ്ത വിഡിയോ ആണ് സംഭവത്തിന് കാരണമായത് എന്നാണ് പറയുന്നത്. സന്തോഷ് വർക്കിയെക്കൊണ്ട് മാപ്പ് പറയിക്കുന്ന വിഡിയോ ബാല പങ്കുവച്ചിരുന്നു. ഇതിനെ വിമർശിച്ചുകൊണ്ട് അജു ചെയ്ത വിഡിയോ വൈറലായി. ഇത് ഡിലീറ്റ് ചെയ്യണം എന്നാവശ്യപ്പെട്ടുകൊണ്ടാണ് ബാല അക്രമം നടത്തിയത് എന്നാണ് പറയുന്നത്. 

ഈ വാര്‍ത്ത കൂടി വായിക്കൂ

'ബാല തോക്കുമായി വീട്ടിൽ അതിക്രമിച്ചു കയറി, കൊല്ലുമെന്ന് ഭീഷണി': പരാതിയുമായി യൂട്യൂബർ 'ചെകുത്താൻ'

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ