ദുൽഖർ സൽമാൻ നായകനായെത്തുന്ന കാന്ത മികച്ച അഭിപ്രായങ്ങൾ നേടി തിയറ്ററുകളിൽ മുന്നേറുകയാണ്. സെൽവമണി സെൽവരാജ് സംവിധാനം ചെയ്ത ചിത്രത്തിൽ ഭാഗ്യശ്രീ ബോർസെയാണ് നായികയായെത്തിയത്. ടി കെ മഹാദേവൻ എന്ന കഥാപാത്രമായി ദുൽഖറെത്തിയപ്പോൾ കുമാരിയായാണ് ഭാ​ഗ്യശ്രീ ചിത്രത്തിലെത്തിയത്.

കാന്തയിൽ ​ദുൽഖറിന്റെ മുഖത്ത് ഒന്നിലധികം തവണ ഭാ​ഗ്യശ്രീ അടിക്കുന്ന സീനുണ്ട്. ഈ സീൻ ചെയ്യാൻ താനൊരുപാട് പാടുപെട്ടുവെന്ന് പറയുകയാണ് ഭാ​ഗ്യശ്രീ ഇപ്പോൾ. എന്നാൽ ആ സീനിന്റെ പൂർണതയ്ക്ക് വേണ്ടിയും യഥാർഥ ഭാവങ്ങൾ വരാനായും അടി ദുൽഖർ ആഗ്രഹിച്ചിരുന്നുവെന്നും നടി പറഞ്ഞു.

'അത് ചെയ്യാൻ എനിക്ക് ഒരുപാട് സമയമെടുത്തു. ആ സീൻ ഫേക്കായി ചെയ്യാൻ കഴിയുമോ എന്ന് ഞാൻ ചിന്തിച്ചിരുന്നു. കാരണം എനിക്ക് ഇതുവരെ ആരെയും തല്ലേണ്ടി വന്നിട്ടില്ല. പക്ഷേ ദുൽഖർ സൽമാൻ അത് ശരിക്കും ആഗ്രഹിച്ചിരുന്നു എന്ന് ഞാൻ കരുതുന്നു. ആ യഥാർഥ ഭാവം തന്നിൽ നിന്ന് പുറത്തുവരണമെന്ന് അദ്ദേഹം ആഗ്രഹിച്ചു. അതിനാൽ സഹനടൻ ആഗ്രഹിക്കുന്നത് പോലെ ഞാൻ ചെയ്യേണ്ടിവന്നു,' ഭാഗ്യശ്രീ ബോർസെ പറഞ്ഞു.

അതേസമയം, സിനിമയിലെ നടിയുടെ പ്രകടനത്തിനും മികച്ച അഭിപ്രായമാണ് ലഭിക്കുന്നത്. ദുൽഖർ സൽമാന്റെ ഉടമസ്ഥതയിലുള്ള വേഫെറർ ഫിലിംസ്, റാണ ദ​ഗുബാട്ടിയുടെ ഉടമസ്ഥതയിലുള്ള സ്പിരിറ്റ് മീഡിയ എന്നിവർ ചേർന്നാണ് ചിത്രം നിർമിച്ചത്. 1950 കാലഘട്ടത്തിലെ മദ്രാസിന്റെ പശ്ചാത്തലത്തിലാണ് സിനിമയൊരുക്കിയിരിക്കുന്നത്.