മാരി സെൽവരാജ് സംവിധാനം ചെയ്ത് ധ്രുവ് വിക്രം നായകനായെത്തിയ ചിത്രമാണ് ബൈസൺ. മികച്ച പ്രതികരണമാണ് ചിത്രത്തിന് തിയറ്ററുകളിൽ നിന്ന് ലഭിക്കുന്നത്. ഇപ്പോഴിതാ തന്റെ മകൻ ധ്രുവ് ബൈസണു വേണ്ടി ചെയ്ത കഠിനാധ്വാനത്തെ അഭിനന്ദിച്ച് രം​ഗത്തെത്തിയിരിക്കുകയാണ് വിക്രം. ഷൂട്ടിങ് സമയത്തുള്ള ധ്രുവ് വിക്രമിന്റെ വിഡിയോയ്ക്കൊപ്പമാണ് ചിയാൻ അഭിനന്ദനം അറിയിച്ചത്.

‘നീ എനിക്ക് അഭിമാനിക്കാനുള്ളത് തന്നു’ എന്നാണ് വിക്രം ക്യാപ്ഷനായി കുറിച്ചിരിക്കുന്നത്. ‘ബൈസൺ’ സിനിമയ്ക്ക് വേണ്ടിയുള്ള ധ്രുവിന്റെ പരിശീലന വിഡിയോ ആണ് വിക്രം പങ്കുവച്ചത്. ബസിന്റെ വേഗതയ്ക്കൊപ്പം ഓടുന്ന ധ്രുവിനെ വിഡിയോയിൽ കാണാം. ഇടയ്ക്ക് ബസ് സ്പീഡ് കൂട്ടുന്നതും ധ്രുവ് ഇതിനനുസരിച്ച് വേഗതയിൽ ഓടുന്നതും കാണാം. നിരവധി പേരാണ് വിഡിയോയ്ക്ക് താഴെ കമന്റുമായെത്തിയിരിക്കുന്നത്. 'അച്ഛന്റെ മോൻ തന്നെ', 'അപ്പൻ 8 അടി പാഞ്ഞാൽ പുള്ള 16 അടി പായും' എന്നൊക്കെയാണ് വിഡിയോയ്ക്ക് വരുന്ന കമന്റുകൾ.

കഥാപാത്രത്തിന് വേണ്ടി ധ്രുവ് ഏറ്റെടുത്ത വെല്ലുവിളിയെ ആരാധകർ അഭിനന്ദിക്കുകയാണ്. നേരത്തെ, ‘ബൈസൺ’ സിനിമയുടെ ചിത്രീകരണ വേളയിൽ ഏറ്റ പരിക്കുകളെക്കുറിച്ച് ധ്രുവ് തുറന്നുപറഞ്ഞിരുന്നു. ഷൂട്ടിങ് സമയത്ത് ഇടത് കൈ ഒടിഞ്ഞു. പരിക്ക് മൂലം മൂന്ന് പല്ലുകൾ റൂട്ട് കനാൽ ചെയ്യേണ്ടി വന്നു.

കഴുത്തിൽ വലിയ രീതിയിലുള്ള പരിക്കുകളുണ്ടായി. കൈമുട്ട്, വിരലുകള്‍ തുടങ്ങി പല ഭാഗത്തും പരിക്കുകളുണ്ടായി എന്ന് ധ്രുവ് വിക്രം പത്രസമ്മേളനത്തിൽ പറഞ്ഞിരുന്നു. അനുപമ പരമേശ്വരൻ, രജിഷ വിജയൻ, പശുപതി, ലാൽ എന്നിവരും ബൈസണിൽ പ്രധാന വേഷങ്ങളിലെത്തി. ഇന്ത്യയിൽ നിന്ന് മാത്രം 33 കോടി രൂപയാണ് ചിത്രം ഇതുവരെ നേടിയത്.