അച്ഛന്റെ സിനിമയിലെ പാട്ടിനൊപ്പം ചുവടുവെച്ച് ​ഗിന്നസ് പക്രുവിന്റെ മകൾ ദീപ്ത കീർത്തി. ​ഗിന്നസ് പക്രു തന്നെയാണ് മകളുടെ അടിപൊളി ഡാൻസ് സോഷ്യൽ മീ‍ഡിയയിലൂടെ ആരാധകരുമായി പങ്കുവെച്ചത്. ‍പൃഥ്വിരാജിനൊപ്പം ശക്തമായ കഥാപാത്രമായി ​ഗിന്നസ് പക്രു എത്തിയ അത്ഭുതദ്വീപ് എന്ന ചിത്രത്തിലെ 'ചക്കരമാവിന്റെ കൊമ്പത്തിരിക്കണ മാമ്പഴം പോലത്തെ കള്ളിപ്പെണ്ണേ' എന്ന ​ഗാനത്തിനൊപ്പമായിരുന്നു ദീപ്തയുടെ ഡാൻസ്. 

‘അച്ഛന്റെ പാട്ടിൽ, മകളുടെ ചുവടുകൾ’ എന്ന അടിക്കുറിപ്പിനൊപ്പം താരം തന്നെയാണ് വിഡിയോ പങ്കുവെച്ചത്. വീടിന്റെ മുന്നിൽ നിന്ന് മനോ​ഹരമായി നൃത്തം ചെയ്യുകയാണ് ദീപ്ത. നിരവധി പേരാണ് ​ദീപ്തയെ ഡാൻസിനെ പ്രശംസിച്ചുകൊണ്ട് രം​ഗത്തെത്തിയിരിക്കുന്നത്. അച്ഛന്റെ കലാപരമായ കഴിവുകൾ മകൾക്കും കിട്ടിയിട്ടുണ്ടെന്നും, ഒരു നല്ല കലാകാരിയായി വളരട്ടെയെന്നുമാണ് ആരാധകരുടെ കമന്റുകൾ. 

കഴിഞ്ഞ ദിവസം മകൾക്ക് സർപ്രൈസ് സമ്മാനം നൽകി ​ഗിന്നസ് പക്രു മകളെ ഞെട്ടിച്ചിരുന്നു. നായക്കുട്ടിയെയാണ് സമ്മാനമായി നൽകിയത്. ഇതിന്റെ വിഡിയോയും താരം ആരാധകർക്കായി പങ്കുവെച്ചിരുന്നു.