'ധുരന്ധർ 2' ബോക്സ് ഓഫീസിൽ റെക്കോർഡുകൾ തകർത്ത് മുന്നേറുമ്പോഴും ചിത്രത്തിലെ നായകനായ രൺവീർ സിങ്ങിന്റെ ഭാര്യയും നടിയുമായ ദീപിക പദുക്കോണിന്റെ മൗനം ആരാധകർക്കിടയിൽ വലിയ ചർച്ചയായി മാറിയിരുന്നു. ഇപ്പോൾ ട്രോളന്മാർക്ക് ചുട്ട മറുപടിയുമായി രംഗത്തെത്തിയിരിക്കുകയാണ് ദീപിക.

സിനിമയെക്കുറിച്ച് ദീപിക സോഷ്യൽ മീഡിയയിൽ പോസ്റ്റുകളൊന്നും പങ്കുവെക്കാത്തതായിരുന്നു ചർച്ചകൾക്ക് വഴിവെച്ചത്. സിനിമയുടെ പ്രീമിയർ ഒഴിവാക്കി താരം ഭർതൃപിതാവിനൊപ്പം സിത്താർ കൺസേർട്ടിന് പോയതും പലരെയും ചൊടിപ്പിച്ചു.

ഇത് സംവിധായകനോടുള്ള വിയോജിപ്പാണോ ദാമ്പത്യത്തിലെ അസ്വാരസ്യമാണോ എന്ന് ചോദിച്ചുകൊണ്ടുള്ള ഒരു ഇൻസ്റ്റഗ്രാം റീലിന് താഴെയാണ് ദീപിക തന്റെ പ്രതികരണം രേഖപ്പെടുത്തിയത്. "എന്റെ സുഹൃത്തേ, നിങ്ങളെല്ലാവരും കാണുന്നതിനും എത്രയോ മുൻപേ ഞാൻ സിനിമ കണ്ടു കഴിഞ്ഞു. ഇപ്പോൾ ആരോടാണ് പരിഹാസം?"- ദീപിക കുറിച്ചു.

ദീപികയുടെ മറുപടി വന്നതോടെ താരത്തിന് പിന്തുണയുമായി നിരവധി ആരാധകർ രംഗത്തെത്തി. ഭർത്താവിന്റെ വിജയത്തിൽ നിന്ന് ശ്രദ്ധ തിരിക്കാതിരിക്കാനാണ് താരം പ്രീമിയറിന് വരാതിരുന്നതെന്ന് ചിലർ അഭിപ്രായപ്പെട്ടു. സ്നേഹം പ്രകടിപ്പിക്കാൻ സോഷ്യൽ മീഡിയ പോസ്റ്റുകൾ നിർബന്ധമല്ലെന്നും ദീപിക എപ്പോഴും ഇത്തരം ട്രെൻഡുകളിൽ നിന്ന് വിട്ടുനിൽക്കുന്ന ആളാണെന്നും ആരാധകർ കുറിച്ചു.

ആദിത്യ ധർ സംവിധാനം ചെയ്ത ധുരന്ധർ 2 ഇന്ത്യയിൽ മാത്രം 1032 കോടിയും ആഗോളതലത്തിൽ 1600 കോടിയിലധികവും ചിത്രം നേടിക്കഴിഞ്ഞു. ആർ മാധവൻ, സഞ്ജയ് ദത്ത്, അർജുൻ രാംപാൽ തുടങ്ങിയവരും ചിത്രത്തിൽ പ്രധാന വേഷങ്ങളിലെത്തി. അതേസമയം ഷാരുഖിനൊപ്പമുള്ള കിങ്, അല്ലു അർജുൻ ചിത്രം രാക്ക എന്നിവയാണ് ദീപികയുടേതായി അണിയറയിൽ ഒരുങ്ങുന്ന ചിത്രങ്ങൾ.