മലയാളത്തില്‍ മാത്രമല്ല മറ്റ് ഭാഷകൡും സ്വന്തമായൊരു ഇടം നേടിയ നടനാണ് ദുല്‍ഖര്‍ സല്‍മാന്‍. തമിഴിലും തെലുങ്കിലും ഹിന്ദിയിലും സാന്നിധ്യം അറിയിച്ച നടന്‍. മലയാളത്തിലെന്നത് പോലെ തന്നെ തെലുങ്കിലും വലിയൊരു ആരാധകവൃന്ദമുണ്ട് ദുല്‍ഖര്‍ സല്‍മാന്. ഇതേസമയം മലയാളത്തേക്കാള്‍ കൂടുതല്‍ തെലുങ്കില്‍ സിനിമകള്‍ ചെയ്യുന്നുവെന്ന വിമര്‍ശനവും ദുല്‍ഖര്‍ നേരിടാറുണ്ട്.

ഇപ്പോഴിതാ ദുല്‍ഖറിന്റെ പുതിയ തെലുങ്ക് പടം റിലീസിനെത്തുകയാണ്. ആകാസം ലോ ഒക്ക താരയാണ് ദുല്‍ഖറിന്റെ പുതിയ സിനിമ. ഇതിന്റെ പ്രൊമോഷന്‍ പരിപാടിയില്‍ താന്‍ തെലുങ്ക് സിനിമകള്‍ ചെയ്യുന്നതിനെക്കുറിച്ചുള്ള വിമര്‍ശനങ്ങളെക്കുറിച്ച് ദുല്‍ഖര്‍ പരാമര്‍ശിക്കുകയുണ്ടായി. ആ വാക്കുകള്‍ വൈറലാവുകയാണ്.

''ഡബ്ബ് ചെയ്യുന്ന സമയത്ത് ഞങ്ങളുടെ ടീമിന് ഈ സിനിമ തെലുങ്ക് പടമായിട്ട് തോന്നിയിട്ടേയില്ല. ട്രാന്‍സ്ലേറ്റ് ചെയ്യുന്ന സമയത്ത് ഇത് മലയാളം പടം പോലെയുണ്ടല്ലോ എന്നായിരുന്നു എല്ലാവരും പറഞ്ഞത്. എവിടെയോ ഞാന്‍ വായിച്ചിരുന്നു. ദുല്‍ഖര്‍ തെലുങ്കില്‍ പോയി മലയാളം പടം ചെയ്യുകയും മലയാളത്തില്‍ തെലുങ്ക് പടം ചെയ്യുകയാണ് എന്നത്. വായിച്ചപ്പോള്‍ അത് ശരിയാണല്ലോ എന്ന് തോന്നി'' എന്നാണ് ദുല്‍ഖര്‍ പറഞ്ഞത്.

ചിത്രത്തെക്കുറിച്ചും ദുല്‍ഖര്‍ സംസാരിക്കുന്നുണ്ട്. ''ആകാസം ലോ ഒക്ക താരയിലേക്ക് വന്നാല്‍ ഇന്ത്യയിലെ ഏതൊരു ഗ്രാമത്തിലും നടക്കാന്‍ സാധ്യതയുള്ള കഥയാണ്. നമുക്ക് എല്ലാവര്‍ക്കും ചെറുപ്പം മുതല്‍ക്കേ എന്തെങ്കിലും സ്വപ്‌നം ഉണ്ടാകും. ആ സ്വപ്‌നം നടത്തിയെടുക്കാന്‍ നമ്മള്‍ ചിലപ്പോള്‍ ശ്രമിക്കും. ഈ സിനിമ അത്തരത്തിലൊരു സ്വപ്‌നത്തിന്റെ കഥയാണ്.'' എന്നാണ് ദുല്‍ഖര്‍ പറഞ്ഞത്.