തമിഴ്- മലയാളം സിനിമാ പ്രേക്ഷകർ ഒന്നടങ്കം ഏറ്റെടുത്ത ചിത്രമാണ് ജയിലർ. ചിത്രത്തിന്റെ രണ്ടാം ഭാ​ഗം ഒരുങ്ങുന്നുവെന്ന വാർത്തയും ഇരുകൈയും നീട്ടിയാണ് പ്രേക്ഷകർ സ്വീകരിച്ചത്. കഴിഞ്ഞ കുറച്ചു ദിവസങ്ങളായി ജയിലർ 2വിന്റെ ഷൂട്ടിങ് അട്ടപ്പാടിയിൽ ആയിരുന്നു. ഇപ്പോഴിതാ ചിത്രത്തിൽ ഫഹദ് ഫാസിലും ഉണ്ടാകുമെന്നാണ് പുതിയ റിപ്പോർട്ട്.

പൊലീസ് ഉദ്യോ​ഗസ്ഥനായാണ് ചിത്രത്തിൽ ഫഹദ് എത്തുകയെന്നാണ് റിപ്പോർട്ടുകൾ. അടുത്ത ഷെഡ്യൂൾ മുതൽ ഫഹദ് ഫാസിൽ ചിത്രത്തിൽ ജോയിൻ ചെയ്യുമെന്നാണ് പ്രതീക്ഷിക്കുന്നത്. ഇതിന്റെ ഔദ്യോ​ഗിക സ്ഥിരീകരണം ഉടനെ ഉണ്ടാകുമെന്നാണ് വിവരം. രജനികാന്ത്, രമ്യ കൃഷ്ണൻ, മിർണ മേനോൻ തുടങ്ങിയവരാണ് ജയിലർ 2 ഷൂട്ടിനായി അട്ടപ്പാടിയിലെത്തിയത്.

കഴിഞ്ഞ വർഷം പുറത്തിറങ്ങിയ വേട്ടയ്യൻ എന്ന ചിത്രത്തിലും രജനികാന്തിനൊപ്പം ഫ​ഹദ് എത്തിയിരുന്നു. രജനിക്കൊപ്പമുള്ള ഫഹദിന്റെ കോമ്പോ തമിഴ് - മലയാളം പ്രേക്ഷകരെ ഒന്നടങ്കം ആകർഷിച്ചിരുന്നു. ജയിലർ 2 വിലൂടെ വീണ്ടും ഇരുവരും ഒന്നിക്കുമ്പോൾ പ്രേക്ഷകരും ഇരട്ടി സന്തോഷത്തിലാണ്. നെൽസൺ ദിലീപ്കുമാർ സംവിധാനം ചെയ്യുന്ന ജയിലർ 2 വിൽ വൻ താരനിര അണിനിരക്കുമെന്നാണ് റിപ്പോർട്ട്.

അട്ടപ്പാടിയിലെ ഷൂട്ടിങ് പൂർത്തിയാക്കി രജനി അടക്കമുള്ളവർ ഇന്ന് മടങ്ങുമെന്നാണ് റിപ്പോർട്ട്. സിനിമയുടെ ബാക്കി ഷെഡ്യൂളുകൾ ചെന്നൈയിലാണ് ചിത്രീകരിക്കുക. അട്ടപ്പാടി ഗോഞ്ചിയൂരിലും പരിസര പ്രദേശങ്ങളിലുമായിരുന്നു ജയിലർ 2 വിന്റെ ചിത്രീകരണം. അമ്പതോളം കുടുംബങ്ങളുള്ള ഊരിലെ പലരും സിനിമയുടെ ഭാഗമാണ്.

'പാക് നടന്റെ സിനിമ ഇന്ത്യയില്‍ വേണ്ട'; ഫവാദ് ഖാന്‍ നായകനാകുന്ന ചിത്രം റിലീസ് ചെയ്യില്ല

ജയിലർ 2 സിനിമയുടെ പ്രധാന ഭാഗങ്ങളാണ് ഗോഞ്ചിയൂരിൽ ചിത്രീകരിച്ചത്. കോടികൾ ചെലവഴിച്ച് പടു കൂറ്റൻ സെറ്റുകളാണ് ഇവിടെ നിർമിച്ചതും. വരും ദിവസങ്ങളിൽ സെറ്റ് പൊളിച്ചു നീക്കും. സൺ പിക്ചേഴ്സ് ആണ് ചിത്രം നിർമിക്കുന്നത്. ജയിലർ ആദ്യ ഭാ​ഗം 600 കോടിയാണ് തിയറ്ററുകളിൽ നേടിയത്.