ഇന്ത്യയില്‍ ഏറ്റവും മികച്ച സിനിമകള്‍ ഒരുക്കുന്നത് മലയാളത്തിലാണെന്ന് ജോണ്‍ എബ്രഹാം. മലയാളത്തില്‍ കൂടുതല്‍ സിനിമകള്‍ നിര്‍മിക്കാന്‍ തനിക്ക് ആഗ്രഹമുണ്ടെന്നും ജോണ്‍. നേരത്തെ അനശ്വര രാജന്‍ നായികയായ മൈക്ക് എന്ന ചിത്രം നിര്‍മിച്ച് ജോണ്‍ മലയാളത്തിലേക്കും ചുവടു വച്ചിരുന്നു. മലയാളത്തില്‍ കൂടുതല്‍ സിനിമകളൊരുക്കാനുള്ള ശ്രമത്തിലാണെന്നും ജോണ്‍ എബ്രഹാം പറഞ്ഞു.

ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തിലാണ് ജോണ്‍ എബ്രഹാം മലയാള സിനിമയെക്കുറിച്ച് വാചാലനായത്. മലയാളത്തില്‍ സിനിമകളൊരുക്കാന്‍ താന്‍ കേരളത്തില്‍ ഒരു റൈറ്റേഴ്‌സ് റൂം സജ്ജമാക്കിയിട്ടുണ്ടെന്നും ജോണ്‍ പറയുന്നു.

''ഇന്ന് ഏറ്റവും മികച്ച സിനിമകള്‍ വരുന്നത് മലയാളം ഇന്‍ഡസ്ട്രിയില്‍ നിന്നാണ്. എന്റെ ഇഷ്ടപ്പെട്ട നടന്‍ ആരെന്ന് ചോദിച്ചാല്‍ മോഹന്‍ലാല്‍ എന്നാകും ഉത്തരം. എനിക്ക് മെറില്‍ സ്ട്രീപ്പിനേയും ഇഷ്ടമാണ്. ആ ഇന്‍ഡസ്ട്രി വളരെ ധീരമായാണ് സിനിമകള്‍ ചെയ്യുന്നത്. ഒരു സിനിമയില്‍ മമ്മൂട്ടി രാഷ്ട്രീയ പ്രവര്‍ത്തകനായിട്ടാണ് അഭിനയിക്കുന്നത്. പിന്നീടാണ് നമ്മളറിയുന്നത് അയാള്‍ ഗേ ആണെന്ന്. അദ്ദേഹത്തെപ്പോലൊരാള്‍ ആ കഥാപാത്രം ചെയ്യുന്നത് ധീരമായ കാര്യമാണ്.'' ജോണ്‍ എബ്രഹാം പറയുന്നു.

''ഒരുപക്ഷെ അവരില്‍ നിന്നും ആശയങ്ങള്‍ കടമെടുക്കാന്‍ എനിക്ക് സാധിച്ചേക്കും. ഞാന്‍ കേരളത്തില്‍ ഒരു റൈറ്റേഴ്‌സ് റൂം സെറ്റ് ചെയ്തിട്ടുണ്ട്. നല്ല ആശയങ്ങള്‍ കണ്ടെത്താനും, ദേശീയ തലത്തില്‍ പോകുന്ന സിനിമകളും മലയാളത്തില്‍ മാത്രമായി സാധ്യമാകുന്ന സിനിമകളും ചര്‍ച്ച ചെയ്ത് കണ്ടെത്താനും ശ്രമിക്കുകയാണ്. എനിക്ക് കൂടുതല്‍ മലയാളം സിനിമകള്‍ നിര്‍മിക്കാന്‍ ആഗ്രഹമുണ്ട്. എല്ലാ തരം സിനിമകള്‍ നിര്‍മിക്കാനും എനിക്കാഗ്രഹമുണ്ട്. പക്ഷെ നല്ല മലയാള സിനിമകള്‍ നിര്‍മിക്കാന്‍ പറ്റിയ സമയമാണിത്.'' എന്നും താരം പറയുന്നു.

നടന്‍ എന്നതു പോലെ തന്നെ നിര്‍മാതാവായും സാന്നിധ്യം അറിയിച്ച താരമാണ് ജോണ്‍ എബ്രഹാം. ജെഎ എന്റര്‍ടെയ്ന്‍മെന്റ് ആണ് ജോണിന്റെ നിര്‍മാണ കമ്പനി. ദേശീയ പുരസ്‌കാരം നേടിയ വിക്കി ഡോണര്‍ ആയിരുന്നു ആദ്യ സിനിമ. 2022 ല്‍ പുറത്തിറങ്ങിയ മൈക്ക് ആണ് ആദ്യ മലയാളം സിനിമ. അനശ്വര രാജനും രഞ്ജിത് സജീവുമാണ് ചിത്രത്തിലെ പ്രധാന വേഷങ്ങള്‍ അവതരിപ്പിച്ചത്.