അസാന്നിധ്യത്തിന്റെ പേരിൽ വാർത്തകളിൽ ഇടം നേടുന്ന താരമാണ് പ്രണവ് മോഹൻലാൽ. ഇതിനോടകം നാലു സിനിമകളിൽ അഭിനയിച്ചെങ്കിലും ഇതുവരെ ഒരു അഭിമുഖം പോലും പ്രണവ് നൽകിയിട്ടില്ല. പുതിയ ചിത്രം ഹൃദയത്തിന്റെ ഒടിടി റിലീസിന് മുന്നോടിയായി സംവിധായകൻ വിനീത് ശ്രീനിവാസനും നായികമാരും ഉൾപ്പടെ അണിയറ പ്രവർത്തകരെല്ലാം ഒന്നിച്ച് ലൈവിൽ എത്തിയിരുന്നു. എന്നാൽ അപ്പോഴും പ്രണവ് മാത്രം വന്നില്ല. ലൈവിന് ഇടയിൽ പ്രണവിനെക്കുറിച്ച് കല്യാണി പ്രിയദർശൻ പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്. 

ആദ്യ അഭിമുഖം മുതൽ കേൾക്കുന്ന ചോദ്യം

പ്രണവിനെക്കുറിച്ച് പറയാൻ വേണ്ടി മാത്രമുള്ളതാണ് തന്റെ അഭിമുഖങ്ങളെല്ലാം എന്നാണ് തോന്നുന്നത് എന്നാണ് കല്യാണി പറഞ്ഞത്. ആദ്യ സിനിമ പ്രഖ്യാപിച്ചപ്പോൾ നൽകിയ അഭിമുഖത്തിൽ പോലും പ്രണവിനെക്കുറിച്ചുള്ള ചോദ്യമുണ്ടായിരുന്നെന്നും താരം വ്യക്തമാക്കി. ''എന്നെ അഭിമുഖത്തിന് വിളിക്കുന്നവരെല്ലാം ചോദിക്കുന്നത് പ്രണവിനെ കുറിച്ചാണ്. അവർക്ക് അത് മാത്രമാണ് അറിയേണ്ടത്. എന്റെ അഭിമുഖങ്ങളെല്ലാം പ്രണവിനെ കുറിച്ച് പറയാൻ വേണ്ടി മാത്രമുള്ളതുപോലെയാണ് തോന്നുക. എന്റെ ആദ്യ സിനിമ പ്രഖ്യാപിച്ച സമയത്ത് ഞാൻ നൽകിയ അഭിമുഖത്തിൽ പോലും അവർ ചോദിച്ചത് പ്രണവിനെ കുറിച്ചായിരുന്നു.- കല്യാണി പറഞ്ഞു. 

എല്ലാ വർഷവും ഞങ്ങളുടെ വിവാഹ വാർത്ത എത്തും

കൂടാതെ തന്റെയും പ്രണവിന്റേയും വിവാഹത്തെക്കുറിച്ചും താരം പറയുന്നുണ്ട്. എല്ലാവർഷവും ഞാനും പ്രണവും വിവാഹിതരാകാൻ പോകുന്നുവെന്ന തരത്തിൽ ഞങ്ങളുടെ ഫോട്ടോകൾ വെച്ച് വാർത്തകളും വരാറുണ്ട്. അവൻ അഭിമുഖങ്ങളിൽ നിന്നും ഒഴിഞ്ഞ് മാറി നടക്കുകയാണെന്നും കല്യാണി പറഞ്ഞു. റേ‍ഞ്ചില്ലാത്ത സ്ഥലത്തായതിനാലാണ് പ്രണവ് ലൈവിൽ എത്താതിരുന്നത് എന്നാണ് വിനീത് ശ്രീനിവാസൻ പറഞ്ഞത്. 

ഏറെ കാത്തിരിപ്പുകൾക്കൊടുവിലാണ് ഹൃദയം ജനുവരി 21ന് തിയറ്ററിൽ എത്തിയത്. മികച്ച അഭിപ്രായം നേടിയതിന് പിന്നാലെ ഇന്നലെ ഹോട്ട്സ്റ്റാറിലൂടെ ഒടിടിയിൽ റിലീസ് ചെയ്യുകയായിരുന്നു. പ്രണവിനും കല്യാണിക്കുമൊപ്പം ദർശനയും ശക്തമായ കഥാപാത്രമായി എത്തിയിരുന്നു. ഇതിനോടകം 50 കോടിയാണ് ചിത്രം ബോക്സ്ഓഫിസിൽ നിന്ന് വാരിയത്.