ജോജു ജോര്‍ജിനെതിരായ പോസ്റ്റ് പിന്‍വലിച്ച് ലിജോ ജോസ് പെല്ലിശ്ശേരി. ചുരുളി വിവാദത്തിന്റെ പശ്ചാത്തലത്തില്‍ ജോജുവിന് മറുപടി നല്‍കിയ തന്റെ പോസ്റ്റാണ് ഇപ്പോള്‍ ലിജോ പിന്‍വലിച്ചിരിക്കുന്നത്. ന്യു ഇന്ത്യന്‍ എക്‌സ്പ്രസിന്റെ എക്‌സ്പ്രസ് ഡയലോഗ്‌സില്‍ അതിഥിയായി എത്തിയപ്പോഴാണ് ജോജു ചുരുളി സിനിമയ്ക്കെതിരെ വിവാദ പരാമര്‍ശം നടത്തുന്നത്. പിന്നാലെ സംഭവം വിവാദമായി.

ചുരുളിയില്‍ അഭിനയിച്ചതിന് പ്രതിഫലം ലഭിച്ചില്ലെന്നും ചിത്രത്തിന്റെ തെറിയുള്ള പതിപ്പ് തന്നോട് പറയാതെയാണ് റിലീസ് ചെയ്തതെന്നുമായിരുന്നു ജോജുവിന്റെ ആരോപണം. എന്നാല്‍ ഇത് നിഷേധിച്ച ലിജോ ജോജുവിന് പണം നല്‍കിയതിന്റെ തെളിവ് പുറത്ത് വിടുകയായിരുന്നു. ഈ പോസ്റ്റാണ് ഇപ്പോള്‍ പിന്‍വലിച്ചിരിക്കുന്നത്.

'എ സര്‍ട്ടിഫിക്കറ്റ് ഉള്ള സിനിമ തീയേറ്ററുകളില്‍ ഇതുവരെ റിലീസ് ചെയ്തിട്ടില്ല. കമ്മിറ്റിയെ വെച്ചന്വേഷിച്ച, ഭാഷയെകുറിച്ചുള്ള ഹൈക്കോടതി വിധിയുണ്ട് . സിനിമ ചിത്രീകരണ വേളയില്‍ ഞങ്ങളാരും ജോജുവിനെ തെറ്റിദ്ധരിപ്പിച്ചതായി ഓര്‍മയില്ല. ഈ ഭാഷയെ കുറിച്ചൊക്കെ നല്ല ധാരണയുള്ളയാളാണ് തങ്കന്‍ ചേട്ടന്‍ ' എന്നായിരുന്നു ജോജുവിനുള്ള ലിജോയുടെ മറുപടി. മൂന്ന് ദിവസത്തെ അതിഥി വേഷത്തിനായി ജോജുവിന് കൊടുത്ത ശമ്പള വിവരവും പങ്കുവച്ചിരുന്നു. ഇതിന് പിന്നാലെ ലിജോയ്ക്ക് മറുപടിയുമായി ജോജുവും രംഗത്തെത്തിയിരുന്നു.

ഐഎഫ്എഫ്‌കെയില്‍ തെറിയില്ലാത്ത പതിപ്പാണ് പ്രദര്‍ശിപ്പിച്ചത്. താന്‍ തെറിയില്ലാത്ത ഭാഗവും ഡബ്ബ് ചെയ്തിട്ടുണ്ട്. കൂടുതല്‍ പണം കിട്ടിയതോടെ തെറിയുള്ള ഭാഗം ഒടിടിയ്ക്ക് നല്‍കുകയായിരുന്നുവെന്നാണ് ജോജു പറഞ്ഞത്. എന്നാല്‍ സിനിമയെയോ ലിജോ എന്ന സംവിധായകനെയോ തള്ളിപ്പറയുന്നില്ലെന്നും ജോജു പറഞ്ഞു. തന്റെ മക്കളെ ചുരുളിയിലെ തെറിയുടെ പേരില്‍ സ്‌കൂളിലടക്കം കളിയാക്കുന്ന സാഹചര്യമുണ്ടായി. അതുകാരണമാണ് പ്രതികരിച്ചതെന്നാണ് ജോജു പറഞ്ഞത്.

അതേസമയം തനിക്ക് പ്രതിഫലം നല്‍കിയിരുന്നുവെന്ന ലിജോയുടെ വാദം ജോജു നിഷേധിച്ചു. തനിക്ക് പ്രതിഫലം ലഭിച്ചിട്ടില്ലെന്ന് ആവര്‍ത്തിച്ച ജോജു താനുമായുള്ള കരാര്‍ പുറത്ത് വിടാന്‍ ലിജോയെ വെല്ലുവിളിക്കുകയും ചെയ്തു. മൂന്ന് ദിവസമല്ല തന്റെ ഷൂട്ടിങ് ഉണ്ടായിരുന്നതെന്നും ജോജു പറഞ്ഞിരുന്നു. ഇതിന് പിന്നാലെയാണ് ഇപ്പോള്‍ ലിജോ ജോസ് പെല്ലിശ്ശേരി തന്റെ പോസ്റ്റ് പിന്‍വലിച്ചിരിക്കുന്നത്.